Nakai fakakite he tau Tohiaga Tapu e fakavēaga ke he totokoaga ke tugi e tino mate.

Ne ha ha i ai e tau fakamauaga he Tohi Tapu hagaao ke he tau tino po ke tau huimotua he tau tagata mamate ne tugi. (Iosua 7:25; 2 Nofo. 34:4, 5) Liga fakakite he mena nei ko lautolu ia ne tuga kua nakai lata ma e tanuaga lilifu. Ka ko e tugi he tino mate ne nakai kakano pihia tumau.

Kua kitia e tautolu e mena nei mai he tala hagaao ke he mate he Patuiki ko Saulo mo e fanau taane tokotolu haana. Ne mamate a lautolu tokofā he tau mo e tau Filisitia. Taha he tau tama taane ko Ionatana, ko e kapitiga mitaki mo e lalago fakamooli ha Tavita. He mogo ne iloa he tau Isaraela malolō ne nonofo i Iapesa-Kiliata e mena ne tupu, ne moua e lautolu e tau gati tino ne fā mo e tugi ai ti tanu e tau huimotua. Ne fakaheke e Tavita e tau Isaraela ia he magaaho fakamui ha ko e tau gahua ha lautolu.​—1 Samu. 31:2, 8-13; 2 Samu. 2:4-6.

Ko e amaamanakiaga he Tohi Tapu ma lautolu ne mamate ko e liu tu mai​—kua liuaki mai he Atua e tagata ke he moui. He tugi po ke nakai tugi e tagata mate, ne nakai fakakaupā e iloilo ha Iehova ke liuaki mai e tagata ke he moui he tino foou. Ko e tau Heperu tua fakamooli tokotolu ne feleveia mo e mate ke he gutuumu ne puho ai e afi kua poaki he Patuiki ko Nepukanesa, ne nakai lata ke matakutaku ka mamate a lautolu, ha ko e mena to nakai fakaliu tu mai he Atua a lautolu. (Tani. 3:16-18) Pihia foki e tau fekafekau fakamooli ha Iehova ne fehagai mo e mate ti tugi he tau kemuaga pagotā Nasi. Tokologa e tau fekafekau fakamooli he Atua ne mamate he tau pāpā hagahaga kelea po ke he falu puhala foki ne nakai fai valavala tino ne moua. Ka e to fakaliu tu mai mooli a lautolu.​—Fakakite. 20:13.

Nakai lata a Iehova ke liu talaga e tino fakamua he tagata ke maeke ke fakaliu tu mai a ia. Kua fakakite ai he puhala kua fakaliu tu mai he Atua e tau Kerisiano fakauku ke moui he lagi. Tuga a Iesu, ne kua “fakamoui a ia ke he Agaga,” ko e tau Kerisiano fakauku kua fakaliu tu mai ko e tagata agaia ni ka e fakalataha mo e tino fakaagaaga. Nakai fai vala he tino fakamua ha lautolu ka fakalataha mo lautolu ke he lagi.​—1 Pete. 3:18; 1 Kori. 15:42-53; 1 Ioa. 3:2.

Ko e amaamanakiaga ha tautolu ke he liu tu mai kua liga nakai fakavē ke he mena ka taute aki e gati tino, ka ko e tua ke he iloilo he Atua mo e manako ke fakamooli haana tau maveheaga. (Gahua 24:15) Mooli, liga nakai maama katoatoa e tautolu e puhala ne taute he Atua e mana he fakaliu tu mai he tau magahala fakamua po ke puhala ka taute e ia anoiha. Ka e falanaki agaia a tautolu ki a Iehova. Ne “fakamoli” e ia ha kua fakaliu tu mai a Iesu.​—Gahua 17:31; Luka 24:2, 3.

Kua mitaki he tau Kerisiano ke mailoga e tau tuaga fa mahani, tau manatu he matakavi, mo e tau poaki matafakatufono hagaao ke he tuaga he tau tino mamate. (2 Kori. 6:3, 4) Ti, ko e tugi po ke nakai tugi he tino he tagata kua mate ko e fifiliaga fakatagata po ke fakamagafaoa a ia.