UA E TAU ato tupu e mena nā i luga, ne kautū a Evelyn Trabert, ko e hoa misionare haaku mo au mai he vahega ke fāaki he Aoga Tohi Tapu a Kiliata he Kolo Toko ne haia i Ithaca i New York. Kua kotofa a maua ke fekafekau i Santa Ana. Ka e to matutaki au mo e tala kū haaku ke he fekafekau misionare ne teitei 29 e tau, to tala atu e au e kakano ne fifili e au ke taute e gahua ia.

Ne nonofo e tau matua haaku ko John mo Eva Olson i Spokane, Washington i U.S.A., he 1923, ko e tau ia ne fanau au. Ko laua ko e tau tagata Lutheran ka e nakai talia e fakaakoaga he tapu ke he afi tote, ha kua nakai felauaki ai mo e taofiaga ha laua ke he Atua fakaalofa. (1 Ioa. 4:8) Gahua e matua taane he fale tao falaoa, ti taha pō ne tala age e tagata gahua ki a ia kua nakai fakaako he Tohi Tapu ko e matakavi fakakikiveka e afi tote. Nakai leva ti kamata fakaako e tau matua haaku mo e Tau Fakamoli a Iehova ti iloa e mena ne fakaako mooli he Tohi Tapu hagaao ke he moui ka mole e mate.

Hiva laia e tau haaku he moui, ka e manatu e au he fanogonogo ke he tau talahauaga hakahakau he tau matua haaku hagaao ke he ha laua a kupu mooli moua foou he Tohi Tapu. Ne tupu lahi foki e hakahakau ha laua he iloa e higoa he Atua mooli, ko Iehova, ti fakatoka noa mai he taofiaga halahū  he Tolu Taha. Kamata au ke hufia ke he tau fakaakoaga ofoofogia faka-Tohi Tapu tuga e omomi, he fakaako ‘ko e mena moli foki ke toka noa ai e tagata.’ (Ioane 8:32) Nakai manamanatu au ke he fakaako he Tohi Tapu ko e mena ahumate, ka e fiafia tumau au he kumikumi ke he Kupu he Atua. Pete he mā au, ne fano au mo e tau matua haaku he gahua fakamatala. Papatiso a laua he 1934. He 1939, he 16 e tau he moui, ne fakalataha au mo laua ko e fekafekau papatiso ha Iehova.

He vahā mafana he 1940, ne sela he tau matua haaku e kaina ha laua, ti kamata a mautolu tokotolu ke he fekafekauaga mau ko e tau paionia i Coeur d’Alene i Idaho. Nonofo a mautolu he poko totogi i luga he fale taute motokā. Ne eke foki e kaina ha mautolu mo matakavi he feleveiaaga. He mogoia, ne gahoa e fakapotopotoaga ne fai Fale he Kautu, ti feleveia a lautolu he tau kaina nonofo po ke tau poko totogi.

He 1941 ne fano au mo e tau matua haaku ke he toloaga i St. Louis i Missouri. Ko e Aho Tapu ko e “Aho he Tau Tama,” ti ko lautolu he vahāloto he 5 mo e 18 e tau tau he moui ne nonofo i mua. He tapunu he lauga haana, ne vagahau e Matakainaga Joseph F. Rutherford ki a mautolu ne ikiiki: “Ko mutolu oti . . . ma tau fanau . . . ne talia ke omaoma ke he Atua mo e haana Patuiki, fakamolemole tutū ki luga!” Tutū hake oti a mautolu. Ti fakailoa mogoia e Matakainaga Rutherford: “Kitiala, molea 15,000 he tau fakamoli foou ke he Kautu!” Ko e mogo tonu ia ne lagomatai au ke fakamatapatu e fifiliaga haaku ke eke e paionia mo fekafekauaga he moui haaku.

Fai mahina he mole he toloaga i St. Louis, ne hiki e magafaoa ha mautolu ke he faahi toga ha California. He taone ko Oxnard, ko e kotofaaga ha mautolu ke fakatū e fakapotopotoaga. Nonofo a mautolu he tulela tote ne taha ni e mohega. Ko e “mohega” haaku kua fakatoka he tau pō takitaha i luga he laulau kai ha mautolu​—hiki lahi ha ia mai he poko mohe ni haaku!

Ato hohoko a mautolu ki California, ne totoko atu a Sapanī ki Pearl Harbor i Hawaii ia Tesemo 7, 1941. He aho hake, ne matutaki atu a Amerika ke he Felakutaki II he Lalolagi. Ne peehi he tau tui ne mua ke tamate e tau mena, ti kua lata ia mautolu ke tamate e tau molī oti he pō. Ko e tau sapamalini he tau Sapanī hane leoleo e kautahi ha California, ti ko e pouli katoatoa ne lagomatai ke taofi a lautolu neke fana mai ke he taone.

Fai mahina he mole ia Sepetema 1942, ne o atu a mautolu ke he New World Theocratic Assembly i Cleveland i Ohio. Ne fanogonogo a mautolu i ai ki a Matakainaga Nathan H. Knorr ne lauga “Mafola​—Maeke Nakai ke Tumau?” Fakatutala a ia ke he Fakakiteaga veveheaga 17, ne fakamaama e “manu favale” ne “moui a ia, ti kua nakai moui foki to hake foki a ia mai he pahua nakai gata mai.” (Fakakite. 17:8, 11) Fakamaama he Matakainaga Knorr ko e “manu favale” e Kautaha he Tau Motu ne nakai liu gahuahua he 1939. Talahau tuai he Tohi Tapu to hukui e Kautaha, ti takitaki atu ke he magahala he mafola. Ti pihia tonu he 1945, ne oti e Felakutaki II he Lalolagi. Mole ia, liu kitia e “manu favale” ko e Tau Motu Kaufakalataha. Ne fakalaulahi he Tau Fakamoli a Iehova ha lautolu a gahua fakamatala he lalolagi katoa, ti ha ha ai e tupu lahi mahaki ne nakaila pihia fakamua!

Lagomatai he perofetaaga ia au ke kitia e mena ne fakatoka mai i mua. He mogo ne fakailoa to  kamata e Aoga Kiliata he tau hake, ne fakalagā e manako haaku ke eke mo misionare. He 1943, ne kotofa au ke paionia i Portland i Oregon. He tau aho ia, fakaaoga e mautolu e lapakofe ke tā e tau lauga ke he tau tagata he kaina he tau gutuhala ha lautolu, ti foaki e mautolu e tau tohi faka-Tohi Tapu hagaao ke he Kautu he Atua. He tau katoa ia, manamanatu tumau au ke he fekafekauaga misionare.

He 1944, fiafia lahi au ke moua e uiina ke fano ki Kiliata mo e kapitiga uho haaku ko Evelyn Trabert. Lima e mahina, ne fakakite mai he tau faiaoga ha maua e puhala ke moua e fiafia mai he fakaako ha maua ke he Tohi Tapu. Ne nava a maua ke he mahani fakatokolalo ha lautolu. He falu mogo he kai a mautolu, ko e tau tagata tufa kai e tau matakainaga taane ia. Ne kautū a maua ia Ianuari 22, 1945.

Ko au mo Evelyn, fakalataha mo Leo mo Esther Mahan, ne hohoko mai ke he kotofaaga foou ha mautolu i El Salvador ia Iuni 1946. Moua e mautolu e fonua ia “kua hina mai nai ke he heleheleaga saito.” (Ioane 4:35) Ko e mena ne tupu ne totoku he kamataaga he tala nei kua fakakite e ita lahi mahaki he tau akoako. He tapu fakamua, ne taute e mautolu e toloaga takaiaga fakamua i Santa Ana. Ne fakatātā fakalaulahi e mautolu e lauga ke he toloaga ti fiafia lahi he teitei 500 ne hohoko mai. He fakamatakutaku ke o kehe he taone, ne malolō lahi e logonaaga ha mautolu ke eketaha ke nonofo mo e lagomatai a lautolu ne loto fakamooli. Pete kua hataki he akoako e tau tagata ke nakai totou e Tohi Tapu mo e tokofiha ni ne moua e lagaki, tokologa kua hoge ma e kupu mooli. Loto fakaaue a lautolu ke he tau laliaga ha mautolu ke fakaako e vagahau Sepania ke maeke ia mautolu ke fakaako a lautolu hagaao ke he Atua mooli, ko Iehova, mo e hagaao ke he amaamanakiaga uho lahi he fakafoou e Parataiso he lalolagi.

Ko Rosa Ascencio ko e taha he tau tagata fakaako fakamua atu haaku. He mole e kamata a ia ke fakaako e Tohi Tapu, ne vevehe a ia mai he tagata taane ne nofo mo ia. Ti kamata e tagata taane ke fakaako e Tohi Tapu. Ne mau a laua, papatiso mogoia, ti eke ai mo Tau Fakamoli fakamakutu ha Iehova. Ko Rosa e paionia fakamua he matakavi i Santa Ana. b

Ne fai fale koloa tote a Rosa. Ka fano a ia he fonua, ne pā e ia e fale koloa haana ti falanaki ki a Iehova ke leveki e tau mena kua lata mo ia. He liu a ia hafagi e fale koloa haana he fai tulā gahoa he mole, ne hou e tau tagata ki loto ke fakatau. Logona fakamua e ia e mooli he Mataio 6:33 ti mahani fakamooli ato hoko e mate haana.

Taha magahala, ne ahiahi e akoako he matakavi ke he tagata ne nonofo totogi e mautolu ko e tau misionare tokoono e fale ti hataki ki a ia ka matutaki a ia ke nonofo totogi a mautolu he fale, to utakehe a ia mo e hoana haana. Ko e tagata pule he kaina, ko e tagata pisinisi talahaua, ne fakateteki  ke he mahani he akoako ti nakai hihiga ke he fakaohoohoaga. Tala age foki e ia ke he akoako kua nakai tupetupe a ia ka vega kehe mai he tapu. Ne fakamafana e ia a mautolu ke nonofo ke leva ka manako a mautolu.

He taone lahi ko San Salvador, taha misionare foki ne fakaako e Tohi Tapu mo e hoana he enisinia ne higoa ko Baltasar Perla. Ko e tagata loto mitaki ia kua galo e tua ke he Atua he kitia e fakatupua he tau takitaki lotu. Mogo ne hoko mai ke tā e la ofisa, ne ole a Baltasar ne nakaila haia he kupu mooli, ke fakatoka mo e talaga e fale ka e nakai totogi e gahua haana.

He fakalataha mo e tau tagata ha Iehova he gahua talaga, ne talitonu a Baltasar kua moua e ia e lotu mooli. Ne papatiso a ia he Iulai 22, 1955, ti nakai leva papatiso e hoana haana ko Paulina. Fekafekau fakamooli e fanau tokoua ha laua ki a Iehova. Ko e tama taane haana ko Baltasar, Jr., ne fekafekau he Peteli i Brooklyn ke 49 e tau, ne lalago e ia e gahua fakamatala he lalolagi katoa hane tupu lahi ti kua fekafekau mogonei he La Komiti i Amerika. c

He kamata a mautolu ke taute e tau fonoaga i San Salvador, lagomatai he Matakainaga Perla a mautolu ke fakaaoga e fale faofao tino lahi. Mogo fakamua, fakaaoga ne mautolu e falu atu nofoa; ka ko e fakamonuinaaga ha Iehova, ne tupu tokologa a mautolu he tau tau takitaha ato puke e fale ti ai hao oti ai! He tau feleveiaaga fiafia ia, kitia e au a lautolu ne fakaako e Tohi Tapu mo au. Manamanatu la ke he logonaaga haaku he mogo ne fakafeleveia he tau fakaako Tohi Tapu fakamua haaku au ke he “tau mokopuna” haaku​—ko lautolu kua papatiso foou ne fakaako mo lautolu!

He taha toloaga, taha e matakainaga taane ne hau ki a au ti pehē kua manako a ia ke fai manatu fakakite. Nakai mailoga e au a ia mo e fia iloa ai au. Pehē a ia, “Ko au taha tama taane ne tauliti patuō a koe i Santa Ana.” Kua fekafekau a ia mo au ki a Iehova! Ne malagaki e loto haaku he olioli. Ko e fakatutalaaga ia ne fakamooli ki a au ko e fekafekauaga mau e gahua ne mua atu e palepale mitaki ka fifili he ha tagata.

Teitei 29 e tau ne matutaki au he gahua misionare i El Salvador, fakamua he taone ko Santa Ana, ti Sonsonate, ti Santa Tecla, ti fakahiku ki San Salvador. He 1975, he mole e manamanatu fakalahi he liogi, ne fifili au ke toka e kotofaaga misionare haaku mo e liu ki Spokane. Kua lata e tau matua fuakau fakamooli haaku mo e lagomataiaga haaku.

He mole e mate he matua taane haaku he 1979, ne leveki e au e matua fifine ne kua holo ki mua e lolelole mo e nakai fahia lahi. Ne moui a ia ke 8 foki e tau ti mate he 94 e tau. He magaaho uka ia, ne mategūgū e tino mo e logonaaga haaku. Ne tupu mai e gagao shingle ha ko e tupetupe lahi. Ka ko e liogi mo e tau lima fakaalofa ha Iehova ne peka viko ia au ke fakamalolō au, ne maeke au ke fakauka ke he kamatamata ia. Tuga kua pehē a Iehova, “ke hoko foki ke he uluhina, . . . to toto foki e au, to uta ai e au, mo e laveaki e au a koe.”​—Isaia 46:4.

He 1990, hiki au ki Omak i Washington. Ne logona e au e aoga lahi he fonua vagahau Sepania, ti tokologa e fakaako Tohi Tapu haaku ne papatiso. Ia Novema 2007, ne nakai maeke au ke leveki e kaina haaku i Omak, ti hiki au ke he poko he taone ne tata i Chelan i Washington. Ko e fakapotopotoaga Sepania hinei kua leveki fakamitaki au tali mai, ko e mena kua loto fakaaue lahi ai au. Ha ko au ni e Fakamoli fuakau hinei, ne “hiki” he tau matakainaga au mo “tupuna fifine” ha lautolu.

Pete ne nakai fifili au ke fai taane mo e fai magafaoa ke maeke au ke fekafekau fakalahi he fekafekauaga mo e “nakai fakalavelave,” ne tokologa e fanau fakaagaaga haaku. (1 Kori. 7:34, 35) Fakakakano e au he moui nei, nakai moua e au e tau mena oti kana. Ti tuku fakamua e au e tau mena fakamua​—ko e tukuleleaga loto katoa haaku ke fekafekau ki a Iehova. He lalolagi foou, to lahi e magaaho ke olioli ke he tau matagahua oti kua atihake. Ko e kupu tohi mahuiga haaku ko e Salamo 145:16, ne fakamafana a tautolu to “fakamakona e manako he tau mena momoui oti.”

He 91 e tau, mitaki agaia e malolō tino haaku, ti matutaki au ke paionia. Ko e gahua paionia kua lagomatai au ke fuata tumau e loto ti foaki ki a au e kakano he moui. He hoko mai fakamua haaku ki El Salvador, kua kamata laia e gahua fakamatala. Pete tau totokoaga mamahi ha Satani, kua molea 39,000 e tagata fakailoa mogonei he motu ia. Fakamalolō mooli he mena nei e tua haaku. Maaliali ai, ko e agaaga tapu mooli ha Iehova kua lalago e tau laliaga he tau tagata haana!