1, 2. (a) Ko e ha kua mauokafua a koe kua fakaalofa a Iehova ke he tau tagata haana? (e) Tufugatia e tau tagata aki e manako fe?

KO E ha kua mauokafua a koe kua fakaalofa a Iehova ke he tau tagata haana? Ato tali e koe e hūhū ia, manamanatu ke he tau fakataiaga nei: Loga e tau ne fakamalolō totonu he tau matakainaga e matakainaga fifine ko Taylene. Tala age a lautolu ki a ia ke ua manamanatu lahi ki a ia. Pehē a ia: “Ane mai nakai fakaalofa a Iehova ki a au, to nakai fakatumau e fakatonuaga haana.” Feaki hake tokotaha e Brigitte e fanau tokoua he mole e mate he haana taane, ne pehē: “Ko e feaki hake he tau fanau he fakatokaaga ha Satani ko e taha mena ne mua e paleko lahi, mua atu ke he matua tokotaha. Ka e mauokafua au he fakaalofa ha Iehova ha kua takitaki e ia au mai he haaku a tau hihina mata mo e loto mamahi, ti nakai fakaatā e ia au ke lauia he tau mena ne nakai fahia au ke fakauka.” (1 Korinito 10:13) Ne moua a Sandra he gagao kelea lahi mahaki ne nakai fai tuluiaga. He fonoaga, ne fakakite he matakainaga fifine e fiafia fakatagata ki a Sandra. “Pete he nakai iloa fakatagata e maua a ia,” he ui he taane ha Sandra, “ko e  manamanatuaga hokulo haana ne tamai e fiafia lahi ke he tau loto ha maua. Ko e tau fakakiteaga ikiiki foki he fakaalofa mai he tau matakainaga ha maua kua fakakite ki a au e lahi he fakaalofa ha Iehova ki a tautolu.”

² Ne tufuga e Iehova e tau tagata aki e manako ke fakaalofa mo e ke logona e fakaalofa. Ka e mukamuka ke loto lolelole ha ko e gagao po ke tau lekua fakatupe po ke nakai fai fua he gahua fakamatala ha tautolu. Ka kamata a tautolu ke logona kua nakai fakaalofa a Iehova ki a tautolu, lata ia tautolu ke manatu kua uho a tautolu ki a ia ti ko ia haia ne totō e lima matau ha tautolu mo e lagomatai a tautolu. To nakai nimo e ia a tautolu kaeke ke mahani fakamooli a tautolu ki a ia.​—Isaia 41:13; 49:15.

3. Ko e heigoa ka fakamalolō e mauokafua ha tautolu kua tukulagi e fakaalofa ha Iehova ma tautolu?

³ Ko e Tau Fakamoli ne totoku fakamua ne mauokafua kua ha ha e Atua mo lautolu he tau magaaho uka. Maeke ia tautolu ke mauokafua pihia ko Ia kua ha ha mo tautolu. (Salamo 118:6, 7) He vala tala nei, to fakatutala a tautolu ke he fā e mena fakaalofa ne fakamooli kua fakaalofa a Iehova ki a tautolu. Ko e tau mena nei ko e (1) haana tufugatia, (2) Tohi Tapu, (3) liogi, mo e (4) lukutoto. He manamanatu fakahokulo ke he tau mena mitaki ne taute e Iehova ka lagomatai a tautolu ke loto fakaaue lahi ma e fakaalofa tukulagi haana.​—Totou Salamo 77:11, 12.

4. Ko e heigoa ne fakaako e tautolu mai he tufugatia ha Iehova?

⁴ Ka kitekite a tautolu ke he tufugatia ha Iehova, fakaako e tautolu e fakaalofa lahi mahaki haana ki a tautolu. (Roma 1:20) Ma e fakatai, ne talaga e Iehova e fua lalolagi ke maeke ia tautolu ke nakai momoui ni hokoia. Ne tuku mai e ia e tau mena oti kua lata mo tautolu ke fiafia e moui. Lata ia tautolu ke kai, ka e foaki mai e Iehova ki a tautolu e tau mena kai kehekehe ke fiafia ai ka kai! (Fakamatalaaga 9:7) Ko e matakainaga fifine ne higoa ko Catherine ne fiafia he kitia e ia e tau mena ne tufugatia, mua atu he vahā tau tupu i Kanatā. Pehē a ia: “Ofoofogia mooli ai ke kitia e tau mena oti ne momoui​—ko e tau fiti lakau ne fakatokatoka ke matala mai he kelekele mo e tau manu lele ne liliu mai he o fenoga, pihia mo e hummingbird tote ne moua e tau mena ke fagai i fafo he pu fakamaama he peito haaku. Liga fakaalofa a Iehova ki a tautolu ke foaki ki a tautolu e fiafia lahi mahaki.” Fiafia lahi e Matua ha tautolu ke he tufugatia haana, ti manako a ia ki a tautolu ke fiafia foki ki ai.​—Gahua 14:16, 17.

5. Fakakite fēfē e fakaalofa ha Iehova he puhala ne tufuga aki e tau tagata?

⁵ Ne tufuga e Iehova a tautolu aki e lotomatala ke taute e gahua fai kakano lahi mo e fiafia ai. (Fakamatalaaga 2:24) Ne tuku age e ia e kotofaaga ke he tau tagata ke fakapuke e lalolagi, fakatokologa ai, ti leveki e tau ika, tau manu lele, mo e falu mena momoui foki i ai. (Kenese 1:26-28) Ti tufugatia foki e ia a tautolu aki e tau mahani fulufuluola ke maeke ia tautolu ke fifitaki a ia!​—Efeso 5:1.

6. Kua lata he ha ke hokulo e loto fakaaue ha tautolu ma e Kupu he Atua?

⁶ Foaki mai e Iehova e Tohi Tapu ki a tautolu ha ko e fakaalofa lahi haana ki a tautolu. Talahau ai e tau mena kua lata ia tautolu ke iloa hagaao ki a ia mo e logonaaga haana ke he tau tagata. Ma e fakatai, talahau he Tohi Tapu ki a tautolu e logonaaga ha Iehova hagaao ke he tau Isaraela ne fa liuliu ki a ia. Pehē e Salamo 78:38: “Ka ko ia, kua fakaalofa hofihofi, ne fakamagalo e ia ha lautolu a tau mahani kelea; nakai fakaotioti e ia a lautolu; kua mafoki kehe lagaloga e ia hana ita, nakai fakatupu foki e ia hana ita katoatoa.” Ko e manamanatu fakahokulo ke he kupu ia ka lagomatai a koe ke kitia e fakaalofa lahi mo e levekiaga ha Iehova ki a koe. Maeke ke mauokafua a tautolu kua lahi mahaki e manamanatuaga ha Iehova ki a tautolu.​—Totou 1 Peteru 5:6, 7.

7. Ko e ha kua lata e Tohi Tapu ke uho lahi ki a tautolu?

 ⁷ Kua lata e Tohi Tapu ke uho lahi ki a tautolu. Ko e ha? Ha kua matutaki a Iehova mo tautolu puhala he Kupu haana. Ka moua he matua mo e tama e matutakiaga mitaki, kua fakamalolō ha laua a fefakaalofaaki mo e fefalanakiaki. Ko Iehova ko e ha tautolu a Matua fakahele. Ti pete ne nakai kitia po ke logona e tautolu e leo haana, kua tuga na matutaki fakahako mai a ia ki a tautolu puhala he Tohi Tapu. Kua lata ia tautolu ke fanogonogo tumau ki a ia! (Isaia 30:20, 21) Ka totou e tautolu e Kupu he Atua, kua iloa mo e falanaki a tautolu ki a Iehova, ne takitaki mo e puipui a tautolu.​—Totou Salamo 19:7-11; Tau Fakatai 1:33.

8, 9. Ko e heigoa kua manako a Iehova ki a tautolu ke iloa? Talahau e fakataiaga mai he Tohi Tapu.

⁸ Manako a Iehova ki a tautolu ke iloa kua fakaalofa a ia ki a tautolu ti onoono muatua atu a ia he tau kūkū ha tautolu. Kua kumi a ia ke he mitaki ha tautolu. (2 Nofoaga he Tau Patuiki 16:9) Kia fakatutala la tautolu ke he puhala ne kitia e Iehova e mitaki he Patuiki ko Iehosafata i Iuta. Ne taute e Iehosafata e fifiliaga kelea ke fakalataha mo e Patuiki ko Ahapo ha Isaraela ke tau atu ke he tau Suria i Ramota-Kiliata. Pete he tala age e tau perofeta fakavai ne toko 400 ki a Ahapo ne mahani kelea to kautū a ia he tau, ne tala age e perofeta mooli ha Iehova ko Mikaio ki a Iehosafata mo Ahapo, ka tau a laua to kaumahala a laua. Ko e mena tonu ia ne tupu. Ne mate a Ahapo he malētau, ti hao fetamaki a Iehosafata. Mole e tau, ne fakaaoga e Iehova a Iehu ke fakatonu a Iehosafata ma e hehē haana. Ka e talahau foki a Iehu ki a ia: “Kua moua e tau mena mitaki kia koe.”​—2 Nofoaga he Tau Patuiki 18:4, 5, 18-22, 33, 34; 19:1-3.

⁹ He tau tau fakamua atu, ne tala age a Iehosafata ke he tau iki, tau Levi, mo e tau ekepoa ke ahiahi atu ke he tau maaga oti ha Iuta ke fakaako e tau tagata ke he Fakatufono ha Iehova. Ne kautū lahi a lautolu ati maeke foki he tau tagata he falu motu kehe ke iloa a Iehova. (2 Nofoaga he Tau Patuiki 17:3-10) Ti pete he taute e Iehosafata e fifiliaga kelea he mogo fakamui, ne nakai nimo e Iehova e tau mena mitaki ne taute e ia he mogo fakamua he moui. Mafanatia lahi e fakafifitakiaga ia ma tautolu ha kua taute e tautolu e tau hehē he falu magaaho. Ka e, ka fekafekau katoatoa a tautolu ki a Iehova, to matutaki a ia ke fakaalofa ki a tautolu mo e to nakai nimo e ia e tau mena mitaki ne taute e tautolu.

10, 11. (a) Ko e ha e liogi ko e mena fakaalofa uho lahi mai ia Iehova? (e) Maeke fēfē he Atua ke tali e tau liogi ha tautolu? (Kikite fakatino he kamataaga.)

¹⁰ Ko e matua taane fakahele ne fai magaaho ke fanogonogo ke he tau tama haana ka manako a lautolu ke tutala ki a ia. Manako a ia ke iloa e tau logonaaga ha lautolu ha kua lahi mahaki e manamanatuaga haana ki a lautolu. Taute pihia he ha tautolu a Matua fakahele ko Iehova. Fanogonogo a ia ki a tautolu ka liogi a tautolu ki a ia. Ko e tutala ke he ha tautolu a Matua ko e lilifu uho lahi!

¹¹ Maeke a tautolu ke liogi ki a Iehova he ha magaaho. Ko ia ko e ha tautolu a Kapitiga, mo e mautali tumau a ia ke fanogonogo ke he tau liogi ha tautolu. Ko Taylene ne totoku fakamua, ne pehē, “Maeke a koe ke talahau ha mena mo e tau mena oti ki a ia.” Ka tala age e tautolu ki a Iehova e tau fatuakiloto ha tautolu, liga tali e ia a tautolu puhala he kupu tohi, vala tala he tohi ha tautolu, po ke fakamalolōaga mai he matakainaga. Logona e Iehova e olelalo fakamooli ha tautolu, ti maama e ia a tautolu pete he nakai fai tagata ne maama a tautolu. Ko e tau tali haana ke he tau  liogi ha tautolu kua fakamooli kua tukulagi e fakaalofa haana ki a tautolu.

12. Ko e ha kua lata ia tautolu ke fakaako e tau liogi i loto he Tohi Tapu? Talahau e fakataiaga.

¹² Maeke ia tautolu ke iloa e tau fakaakoaga aoga mai he tau liogi i loto he Tohi Tapu. He falu mogo, kua aoga ke fakaako e falu liogi nei he magaaho tapuakiaga he magafaoa. Ko e tuaga he tau liogi ha tautolu to holo ki mua ka manamanatu fakahokulo a tautolu ke he tau liogi he tau fekafekau he Atua, he tau vahā i tuai. Ma e fakatai, fakaako e liogi fakatokolalo ha Iona mai he manava he ika lahi. (Iona 1:17–2:10) Fakatutala ke he liogi fakamooli ha Solomona ki a Iehova he mogo ne fakaulu e faituga. (1 Tau Patuiki 8:22-53) Ti manamanatu fakahokulo ke he liogi fakatai ha Iesu. (Mataio 6:9-13) Mua atu, fakatumau ke “fakailoa atu ke he Atua e tau manako ha mutolu.” Ti ko e fua, “ko e monuina foki mai he Atua kua mua ue atu ke he tau mena oti kua manamanatu ki ai, to leveki ai e tau loto ha mutolu, katoa mo e tau manatu ha mutolu.” Ko e ha tautolu a fakaaue ke he fakaalofa tukulagi ha Iehova to matutaki ke tupu.​—Filipi 4:6, 7.

13. Ko e heigoa e magaaho kua moua e tautolu ha ko e lukutoto?

¹³ Foaki mai e Iehova ki a tautolu e mena fakaalofa he lukutoto ke maeke ke “momoui a tautolu.” (1 Ioane 4:9) Hagaao ke he fakakiteaga homo ue atu nei he fakaalofa he Atua, ne tohi he aposetolo ko Paulo: “Ne matulei a Keriso ke he vaha ne lata ai, . . . ko e hukui he tau tagata matahavala. Ha kua nakai ligaliga maeke ia taha ke mate ke hukui aki e tagata tututonu; ka ko e tagata mahani mitaki, na kua fakamalolo taha ke mate ke hukui aki a ia heute he pihia; Ka kua fakakite mai he Atua hana fakaalofa kia tautolu he matulei a Keriso ke hukui aki a tautolu, ka ko e tau tagata hala agaia a tautolu.” (Roma 5:6-8) Ko e lukutoto ko e fakafifitakiaga mua ue atu he fakaalofa he Atua, ti foaki ke he tau tagata e magaaho ke moua e fakafetuiaga tata mo ia.

14, 15. Ko e heigoa e kakano he lukutoto (a) ma e tau Kerisiano fakauku? (e) ma lautolu kua amaamanaki ke momoui ke he lalolagi?

¹⁴ Ko e matakau tote he tau Kerisiano ne logona e fakaalofa tukulagi ha Iehova he puhala pauaki. (Ioane 1:12, 13; 3:5-7) Ne fakauku he Atua a lautolu nei aki e agaaga tapu, ti ko e mena nei ko e fanau Haana mogonei a lautolu. (Roma 8:15, 16) Ha kua haia agaia e falu ha lautolu he lalolagi, ko e ha ne pehē a Paulo kua nonofo a lautolu “fakalataha . . . mo Keriso Iesu ke he tau mena ha he lagi”? (Efeso 2:6) Kakano kua foaki e Iehova ki a lautolu e amaamanakiaga he moui tukulagi ke he lagi.​—Efeso 1:13, 14; Kolose 1:5.

¹⁵ Ko lautolu oti ne nakai fakauku ka eke mo tau kapitiga he Atua ka tua a lautolu ke he lukutoto. Moua foki e lautolu e amanakiaga ke hiki ke eke mo fanau he Atua mo e momoui tukulagi he lalolagi parataiso. Fakakite he lukutoto e fakaalofa ha Iehova ma e tau tagata oti kana. (Ioane 3:16) Ko e fiafia mooli ke iloa ka fekafekau fakamooli a tautolu ke he Atua, to maeke a ia ke foaki ki a tautolu e moui  ne mua atu he lalolagi foou! Kia fakakite e tautolu kua uho lahi ki a tautolu e lukutoto, ko e fakamooliaga mua ue atu he fakaalofa tukulagi he Atua ma tautolu.

16. Ko e heigoa ha tautolu ka taute ka mole e manamanatu fakahokulo ke he fakaalofa he Atua?

¹⁶ Nakai maeke ke totou e tau puhala loga ne fakakite e Iehova e fakaalofa haana ma tautolu. Lologo he Patuiki ko Tavita: “Ko e Atua na e, kua uhoaki ni kia au hāu a tau manamanatu, kua loga ue atu e katoatoa ha lautolu ka lafilafi. Ka totou ai e au kua loga ni ka e gahoa e oneone.” (Salamo 139:17, 18) He manamanatu fakahokulo ke he tau puhala loga ne fakaalofa a Iehova ki a tautolu to omoomoi a tautolu ke fakaalofa foki ki a ia mo e fekafekau katoatoa ki a ia.

17, 18. Ko e heigoa falu puhala ka fakakite e tautolu e fakaalofa ha tautolu ma e Atua?

¹⁷ Loga e puhala ke fakakite kua fakaalofa a tautolu ki a Iehova. Ma e fakatai, maeke ia tautolu ke fakakite e fakaalofa ha tautolu ki a Iehova he tala age fakamakutu ke he falu hagaao ke he tala mitaki he Kautu. (Mataio 24:14; 28:19, 20) Maeke foki ia tautolu ke fakakite e fakaalofa ma e Atua he fakauka fakamooli ke he tau kamatamata ke he ha tautolu a tua. (Totou Salamo 84:11; Iakopo 1:2-5.) Pete kua hagahaga kelea e tau kamatamata ha tautolu, maeke ia tautolu ke iloa tonu kua kitia e Iehova e matematekelea ha tautolu mo e to lagomatai a tautolu ha kua uho a tautolu ki a ia.​—Salamo 56:8.

¹⁸ Ko e fakaalofa ha tautolu ki a Iehova kua omoomoi a tautolu ke manamanatu fakahokulo ke he tau mena homo ue atu oti ne tufuga e ia. Fakakite e tautolu ki a Iehova kua fakaalofa a tautolu ki a ia mo e fiafia ke he Kupu haana he eke mo tau tagata fakaako mitaki he Tohi Tapu. Liogi tumau a tautolu ki a Iehova ha kua fakaalofa a tautolu ki a ia ti manako ke fakamalolō e fakafetuiaga ha tautolu mo ia. Ti ka manamanatu fakahokulo a tautolu ke he mena fakaalofa uho haana he lukutoto, kua tupu lahi mahaki e fakaalofa ha tautolu ki a ia. (1 Ioane 2:1, 2) Ko e falu ni anei he tau puhala loga kua fakakite e tautolu ki a Iehova kua tokiofa e tautolu e fakaalofa tukulagi haana ki a tautolu.