Ne pehē e Tohi Tapu ko e tau aloe ne fakaaoga ke fakamanogi aki e tau tapulu mo e tau mohega. (Salamo 45:8; Tau Fakatai 7:17; Lologo a Solomona 4:14) Ko e tau aloe he Tohi Tapu ne liga moua mai he Agarwood (ko e vahega he Aquilaria). He popo e vala akau, ne tafe mai e lolo mo e puke manogi. Kua tukituki e vala akau fakavalavala ke pauta, ti sela ko e “tau aloe.”

Ne fakatatai he Tohi Tapu e tau fale uta fano ha Isaraela ke he “tau aloe foki kua to e Iehova.” (Numera 24:5, 6) Liga hagaao e mena nei ke he foliga he akau Agarwood, ne maeke ke tokoluga ke teitei 30 e mita ti lālā. Pete kua nakai kitia e akau nei i Isaraela mogonei, ne talahau he A Dictionary of the Bible “ne nakai fai mena ke fakatikai e manatu ko e akau nei mo e falu akau foki ne nakai iloa mogonei [he matakavi] kua tō he Pahua i Ioritana ne monuina mo e tokologa e tagata he magahala ia.”

Ne talahau e Fakatufono he Atua kua lata e tau poa oti ne foaki he faituga ke mua atu e mitaki. To nakai talia he Atua e tau poa kua fai kelea. (Esoto 23:19; Levitika 22:21-24) Hagaao ke he tagata tohia Iutaia ko Philo he senetenari fakamua V.N., ko e tau ekepoa he vahā ia ne tivi e tau manu “mai he ulu ke he tau hui” ke iloa kua katoatoa e mitaki he tau vala oti mo e “nakai fai ila po ke ha mena kelea.”

Ko e Pulotu ko E. P. Sanders ne talahau na liga tuku age ke he tau leveki he faituga e “pule ke kotofa e tau tagata fakafua he tau manu mo poa ke fakafua ni e tau manu mo e tau manu lele ne kua fitā he tivi fakamua he tau ekepoa. He mena nei, ko e tagata fakafua koloa ne lata ke age ke he tagata fakatau e laupepa fakamailoga, ke fakakite kua nakai fai kelea e manu.”

He 2011, ko e tau tagata keli kelekele ne moua e laupepa po ke fakamailoga pihia he matakavi he faituga​—ne lahi tuga e tupe maō ne taute mai he kelekele, kavi ke he senetenari fakamua F.V.N. mo e 70 V.N. Ne ua e matatohi Aramaika ne tohia ai “Meā ma e Atua.” Na manatu ai ko e tau leveki he faituga ne fa tuku e tau fakamailoga pihia mo e tau koloa ma e faiagahau po ke tau manu ne amanaki ke poa.