Ne fanau au i Baku, Azerbaijan, ko e tama ke uaaki he tau tama tokoua. Ko e matua taane haaku ko e Musilimi mo e matua fifine haaku ko e Iutaia. Fefakaalofaaki e tau matua haaku mo e fetaliaaki e tau taofiaga kehekehe ha laua. Ne lalago e Mami a Tete ka fakakanopogi he Ramadan, ti lalago e Tete a Mami ka fakamanatu e ia e Paseka. He kaina ha mautolu ne ha hā e Koran, ko e Torah, mo e Tohi Tapu.

Manatu e au ko e Musilimi au. Pete ne nakai fakauaua kua fai Atua, ha i ai e falu matakupu ne nakai maama e au. Ne manamanatu au, ‘Ko e ha ne tufuga he Atua e tau tagata, ti ko e heigoa e aoga ke matematekelea e tagata he moui katoa haana ti fakakikiveka tukulagi he afi tote?’ Ha kua talahau e tau tagata, ko e tau mena oti kua tutupu ko e finagalo he Atua, ne manamanatu au, ‘Fakatupu kia he Atua e tau lekua ti fiafia ke kitekite ke he tau tagata ka matematekelea?’

He 12 e tau he moui, ne kamata au ke liogi e namaz, ko e liogi pauaki fakalotu Musilimi ne taute lagalima he aho. He mogoia, ne fakafano he Matua Taane au mo e taokete haaku ke he aoga Iutaia. Ne fakaako a maua ke he tau aga tuai he Torah mo e vagahau Heperu mo e falu mena foki. He tau aho takitaha ato kamata e tau fakaakoaga he poko aoga, ne lata ke liogi he muitua ke he tau aga Iutaia. Ti he mogo pogipogi, ne liogi e au e namaz he kaina, mo e taha mogo he aho, ne fakalataha au mo e tau liogi Iutaia he aoga.

Ne manako lahi au ma e tau tali mooli ke he tau hūhū haaku. Lagaloga ne hūhū au ke he tau faiaoga lotu he aoga: “Ko e ha ne tufuga he Atua e tau tagata? Onoono fēfē e Atua ke he matua taane haaku ko e Musilimi? Ko e tagata mitaki a ia, ti ko e ha kua tuga e tagata nakai meā a ia? Ko e ha ne tufuga he Atua a ia?” Ko e tau tali gahoa ne moua e au ne goagoa mo e nakai mooli.

Ne malipilipi e tua haaku ke he Atua he 2002. Kua hiki atu laia a mautolu ki Sihamani, ti taha ni e faahi tapu he mole, ne moua fakalutukia e matua taane haaku he stroke ti nakai ala mo e lutu. Loga  e tau ne liogi au ke tino malolō mo e haohao mitaki e magafaoa haaku. He mauokafua ko e Mua Ue Atu ni kua pule ke he moui mo e mate, ti olelalo fakamakutu au he tau aho takitaha ma e moui he matua taane haaku. Manatu au, ‘Ko e mena tote ma e Atua ke fakamooli e manako hokulo he tama fifine tote.’ Mauokafua au to tali e ia e tau olelalo haaku. Ka e mate e matua taane haaku.

Ofomate ke he fakateaga he Atua, ne malipilipi e loto haaku. ‘Liga kua hepe e puhala liogi haaku,’ he manatu e au, ‘po ke nakai fai Atua.’ Ne ofo lahi au ti nakai maeke ke liogi e namaz. Ko e falu lotu ne nakai aoga ki a au, ti pehē ni au kua nakai fai Atua.

Ono e mahina he mole, ne ahiahi mai e Tau Fakamoli a Iehova ki a maua. Ha kua nakai fiafia lahi a maua ke he tau Kerisiano, ne manako e taokete haaku mo au ke fakakite age he puhala totonu kua hepe a lautolu. Ne hūhū age a maua: “Maeke fēfē e tau Kerisiano ke tapuaki ki a Iesu, ke he akau fakalava, ki a Maria, mo e falu tupua ta ka e kelea ai he talahau he Tau Fakatufono Hogofulu?” Ne fakakite he Tau Fakamoli mai he Tohi Tapu e tau fakamooliaga mauokafua kua nakai fakaatā e Tau Kerisiano mooli ke tapuaki ke he tau tupua ta mo e lata ke liogi katoatoa ke he Atua ni hokoia. Ne ofo lahi au he mena ia.

Ti hūhū foki e maua: “Ka e kua e Atua Tolu Taha? Kaeke ko e Atua a Iesu, maeke fēfē a ia ke nofo he lalolagi ti tamate he tau tagata?” Ti liu a laua tali mai he Tohi Tapu mo e fakamaama ko Iesu nakai ko e Atua po ke tatai mo Ia. Ne fakamaama he Tau Fakamoli ko e kakano nei ati nakai talitonu a lautolu ke he Atua Tolu Taha. Ne ofo lahi au ti manatu, ‘Kehe ha ia he Tau Kerisiano nei.’

Pete ia, ne manako au ke iloa e kakano ne mamate e tau tagata mo e kakano kua fakaatā he Atua e matematekelea. Ko e Tau Fakamoli ia ne fakakite ki a au e tohi Iloilo ne Takitaki Atu ke he Moui Tukulagi, a kua ha hā i loto e tau veveheaga katoa ne tali e tau hūhū haaku. Ne kamata agataha a laua ke fakaako Tohi Tapu mo au.

He tau fakaakoaga takitaha, ne moua e au e tau tali fai kakano ne fakavē ke he Tohi Tapu ke he tau hūhū haaku. Ne iloa e au ko e higoa he Atua ko Iehova. (Salamo 83:18) Ko e matapatu aga haana ko e fakaalofa mooli. (1 Ioane 4:8) Ne tufuga e ia e tau tagata he manako a ia ke foaki e mena fakaalofa he moui. Ne hokotia au ke maama pete ni kua fakaatā he Atua e nakai fakafili tonu, ne vihiatia ai e ia ti nakai leva to utakehe tukulagi ai. Ne fakaako e au ko e totoko ha Atamu mo Eva ne fakatupu mai e tau fua kelea ke he tau tagata. (Roma 5:12) Ko e taha he tau fua kelea ia ko e mamate he tau fakahele, tuga e matua taane haaku. Ka e to utakehe e tau matematekelea pihia ka hoko mai e lalolagi foou, ti liu momoui a lautolu ne mamate.​—Gahua 24:15.

Ko e kupu mooli he Tohi Tapu ne fakamakona e manako haaku ma e tau tali. Ne kamata au ke liu talitonu ke he Atua. He iloa fakahaga e Tau Fakamoli a Iehova, ne mailoga e au ko lautolu ko e tau matakainaga ne kaufakalataha he lalolagi katoa. Ne nava au ke he kaufakalataha mo e fakaalofa ha lautolu. (Ioane 13:34, 35) Ne omoi au he tau mena ne fakaako e au hagaao ki a Iehova ke manako ke fekafekau ki a ia, ti fifili au ke eke mo taha he Tau Fakamoli a Iehova. Ti papatiso au ia Ianuari 8, 2005.

Ko e tau kupu mooli he Tohi Tapu ne hiki e onoonoaga katoa haaku ke he moui ke mitaki ai. Ko e tau fakamaamaaga moolioli ne ha hā he Kupu he Atua kua tamai ki a au e mafola mooli he loto. Kua moua e au e fiafia lahi mo e mafanatia mai he amaamanakiaga ka liu kitia e matua taane haaku ha ko e liu tu mai ne mavehe he Kupu he Atua.​—Ioane 5:28, 29.

Kua ono tuai e tau he fakamauaga fiafia haaku ki a Jonathan, ko e taane matakutaku Atua. Ne fakaako e maua ko e kupu mooli hagaao ke he Atua kua maama mo e mukamuka, ka e he mogo taha ia kua uho lahi. Ko e kakano anei kua fiafia lahi a maua ke tutala mo e falu ke he tua mo e amaamanakiaga ofoofogia ha maua. Mogonei, kua iloa e au ko e Tau Fakamoli a Iehova kua nakai “kehe” ka ko e tau Kerisiano mooli.