Talahau he tau tagata kumikumi na maeke e kulī ke fakaaoga e hohogi ke iloa e tau, ko e kulī fifine po ke taane mo e aga he falu kulī. Maeke foki e tau kulī ke fakaako ke hohogi e tau pomu mo e tau tulaki kona. Fakaaoga he tau tagata e tau mata ke onoono ke he takatakaiaga ha lautolu, ka e fakaaoga he kulī e hohogi ke mailoga e tau namu. Fakaaoga he kulī e ihu ke hogihogi.

Manamanatu: Totou afe e aoga he hohogi he kulī ne mua atu ke he tau tagata. Mai he U.S. National Institute of Standards and Technology, na maeke e kulī ke “hohogi e tau vala ikiiki he tau mena ne fakaaoga.”

Ko e heigoa e kakano ne mua atu e hohogi he kulī?

• Ha kua pala e ihu he kulī ti mukamuka ke hohogi e tau valavala ikiiki he tau namu kehekehe.

• Ua e hala fafagu he ihu he kulī​—taha ke fafagu mo e taha ke hohogi. Ka hogihogi e kulī, maeke e matagi ke hake ke he taha faahi he ihu ne hohogi e tau namu kehekehe.

• Ko e vala i loto he ihu he kulī ke hohogi e tau namu kehekehe ne molea 130 sikuea senetimita, ka e 5 ni e sikuea senetimita he tau tagata.

• Hoko ke he 50 e loga he tau tegatega hohogi he kulī ne mua ke he tau tagata.

Maeke he mena nei ke iloa he kulī e tau vala kehekehe he tau namu ne nakai mahani ki ai. Ma e fakatai, manogi e supo ki a tautolu, ka e maeke he kulī ke iloa e tau vala mena kai oti ne fakaaoga, ne talahau he falu tagata pulotu.

Ko e tau tagata kumikumi he Pine Street Foundation, ko e aoga kumikumi he kenesā, ne pehē ko e gahua fakalataha he uho niu mo e ihu he kulī “ko e taha mena mahuiga lahi a nei ke fakaaoga mo hohogi aki e tau namu kehekehe he lalolagi nei.” Hane talaga he tau saienetisi e tau “ihu” hila ke moua e tau pomu, tau koloa ne pa he fakatufono mo e tau gagao tuga e kenesā.

Ko e heigoa e manatu haau? Na tupumainoa e hohogi he kulī? Po ke talaga kia?