Tokologa ne talahau e tau hūhū nei kua matematekelea lahi he galo e tau mena fakatagata ti nakai ni kumi he tau tali ka e pihia foki mo e fakamafanatia. Falu ne kitia e Holocaust ko e tapunu he kelea muitua he tagata ti taufetului a lautolu ke talitonu ke he Atua.

 Tala nakai mooli: Hepe ke hūhū e kakano ne fakaatā he Atua e Holocaust.

 Tala Mooli: Ko e tau tagata ne lahi e tua ne tuahā ke he kakano ne fakaatā he Atua e kelea muitui. Tuga anei, hūhū e perofeta ke he Atua: ‘Ko e ha kua fakakite mai ai e koe kia au e mahani kelea, matematekelea, favale, taufetoko, tupu ai foki e latau.’ (Hapakuka 1:3) He nakai vale ki a Hapakuka, talahau he Atua e tau hūhū ne fakamau he Tohi Tapu ma e tau tagata oti ke totou.

 Tala nakai mooli: Nakai manamanatu e Atua ke he matematekelea he tagata.

 Tala Mooli: Vihiatia he Atua e mahani kelea mo e matematekelea ne tupu mai ai. (Tau Fakatai 6:16-19) He vahā ha Noa, “mamahi foki hana [Atua] finagalo” ha kua tupu holofa e favale he lalolagi. (Kenese 6:5, 6) Logona hifo pihia foki e Atua ke he Holocaust.​—Malaki 3:6.

 Tala nakai mooli: Ko e Holocaust ko e fakahala he Atua e tau tagata Iutaia.

 Tala mooli: Nakai fakaatā he Atua a Ierusalema ke moumou he tau Roma he senetenari fakamua. (Mataio 23:37–24:2) Tali mai ai, nakai fakakite he Atua kua mua hake e mitaki po ke lata ke fakahala e taha lanu tagata. He onoonoaga he Atua, “nakai kehekehe e Iutaia mo e Heleni.”​—Roma 10:12.

 Tala nakai mooli: Ane mai moui e Atua fakaalofa mo e malolō, to nakai fakaatā e ia e Holocaust.

 Tala mooli: Pete kua nakai fakatupu he Atua e matematekelea, ka e fakaatā fakakū e ia he falu magaaho.​—Iakopo 1:13; 5:11.

 Fakaatā he Atua e Holocaust tatai ni mo e kakano ne fakaatā e ia e tau matematekelea oti he tagata: ke fakatotoka e tau lekua he mahani ne lagā mai he loga e tau tau kua mole. Fakakite fakamaali he Tohi Tapu ko e Tiapolo mogonei, nakai ko e Atua ne pule ke he lalolagi. (Luka 4:1, 2, 6; Ioane 12:31) Ua e tala mooli mai he Tohi Tapu ka lagomatai ke fakamaama e kakano ne fakaatā he Atua e Holocaust.

1.   Tufuga he Atua e tau tagata mo e atāina ke fifili. Tala age e Atua ke he tau tagata fakamua ko Atamu mo Eva e amaamanakiaga haana ki a laua ka e nakai fakaohooho e ia a laua ke omaoma. Fifili a laua ke taute e fifiliaga ma ha laua ke he mena kua mitaki mo e kelea, ti ko e fifiliaga kelea ne taute foki he tau tagata he tau fakamauaga tala ne kua tupu mai e fua kelea lahi mahaki ke he tau tagata. (Kenese 2:17; 3:6; Roma 5:12) Tuga ne tala mai he tohi Statement of Principles of Conservative Judaism pehē: “Lahi he matematekelea he lalolagi kua fua mai he fakaaoga fakahehē he atāina ke fifili ne foaki mai ki a tautolu.” He nakai utakehe e atāina ha tautolu ke fifili, foaki he Atua ke he tau tagata e magaaho ke taute e tau mena ka e tu kehe mai ia ia.

2.   Maeke mo e to utakehe he Atua e tau kelea oti he Holocaust. Mavehe mai e Atua to fakamomoui e ia e tau tagata tokologa ne mamate, putoia a lautolu ne mamate he Holocaust. To utakehe e ia e mamahi he tau logonaaga he tau tagata ne hao he Holocaust ha ko e manatu e tau mena kelea lahi mahaki. (Isaia 65:17; Gahua 24:15) Ko e fakaalofa he Atua ma e tau tagata to mooli to fakamooli e ia e tau maveheaga nei.​—Ioane 3:16.

 Tokologa e tagata ne lauia he Holocaust ne hao kua maeke ke fakatumau e tua ha lautolu mo e moua e kakano he moui ha kua maama e manatu ne fakaatā he Atua e kelea muitui mo e tau amaamanakiaga haana ke utakehe e tau lauiaaga ne tupu mai ai.