I loto he Tohi Tapu ko e kupu ne fakaliliu “liu tu mai” ne moua mai he kupu Heleni a·naʹsta·sis, ne kakano “fakatu hake” po ke “liu matike hake.” Ko e tagata ne fakaliu tu mai kua matike mai he mate ti liu moui ko e tagata tuga fakamua.​—1 Korinito 15:12, 13.

 Pete kua nakai tu e kupu “fakaliu tu mai” he Tau Tohiaga Tapu Heperu, ne fa fakahigoa ko e Maveheaga Tuai, ka e ha i ai e tau fakaakoaga ke he liu tu mai. Ma e fakatai, puhala mai he perofeta ko Hosea e mavehe he Atua: “To laveaki e au a lautolu mai he malolo he tukuaga; to fakamoui e au a lautolu mai he mate.”​—Hosea 13:14; Iopu 14:13-15; Isaia 26:19; Tanielu 12:2, 13.

 To fakaliu tu mai ki fe e tau tagata? Falu tagata ka fakaliu tu mai ke moui he lagi ke pule ko e tau patuiki mo e Keriso. (2 Korinito 5:1; Fakakiteaga 5:9, 10) Fakahigoa he Tohi Tapu e mena nei ko e “liu tu mai fakamua” mo e “liliu foki tutu mai,” fakakite he tau talahauaga ua nei kua fai liu tu mai ka mui mai. (Fakakiteaga 20:6; Filipi 3:11) Ko e liu tu mai ke uaaki nei to nonofo mua tua he lalolagi, to pihia e laulahi ha lautolu ka liliu tu mai.​—Salamo 37:29.

 Fakaliu tu mai fēfē e tau tagata? Foaki he Atua ki a Iesu e malolō ke fakaliu tu mai e tau tagata ne mamate. (Ioane 11:25) To fakaliu momoui e Iesu a “lautolu katoa ha he tau tukuaga” ke igatia mo e aga mo e tau manatu haana ni. (Ioane 5:28, 29) Ko lautolu ka fakaliu tu mai ke he lagi to moua e tino ko e agaaga, ko lautolu ka fakaliu tu mai ke moui he lalolagi to moua e tino malolō mo e mitaki katoatoa.​—Isaia 33:24; 35:5, 6; 1 Korinito 15:42-44, 50.

 Ko hai ka liliu tu mai? Pehē e Tohi Tapu “ke liu foki tutu mai a lautolu kua mamate, ko lautolu ne tututonu katoa mo lautolu ne hepehepe.” (Gahua 24:15) Ko e tau tagata tututonu kua putoia e tau tagata fakamooli tuga a Noa, Sara, mo Aperahamo. (Kenese 6:9; Heperu 11:11; Iakopo 2:21) Ko lautolu ne hepehepe kua putoia a lautolu ne nakai hokotia ke he tau tuaga he Atua ka kua nakai moua e magaaho ke fakaako mo e muitua e tau mena ia.

 Ka ko lautolu ne muitui e kelea ti nakai maeke ke hiki to nakai liliu tu mai. Ka mamate a lautolu ia, kua fakaotioti tukulagi mo e nakai fai amaamanakiaga ke liu momoui.​—Mataio 23:33; Heperu 10:26, 27.

 Fakahoko he magaaho fe e liu tu mai? Talahau mai tuai he Tohi Tapu to fakahoko e fakaliu tu mai ke he lagi he magaaho ka pule a Iesu he lagi ne kamata he 1914. (1 Korinito 15:21-23) Ko e fakaliu tu mai ke he lalolagi to hoko he magahala he Pule Afe Tau ha Iesu Keriso, ka liu e lalolagi ke eke mo parataiso.​—Luka 23:43; Fakakiteaga 20:6, 12, 13.

 Ko e ha kua lata ke talitonu ke he liu tu mai? Foaki mai he Tohi Tapu e tau fakamaamaaga ke he hiva e liu tu mai, igatia mo e tokologa e tagata ne kitia mata ai. (1 Tau Patuiki 17:17-24; 2 Tau Patuiki 4:32-37; 13:20, 21; Luka 7:11-17; 8:40-56; Ioane 11:38-44; Gahua 9:36-42; 20:7-12; 1 Korinito 15:3-6) Ko e fakaliu tu mai ha Iesu ia Lasalo kua ofoofogia lahi, ha kua fā tuai e aho ne mate a Lasalo mo e taute e Iesu e mana i mua he moto tagata tokologa. (Ioane 11:39, 42) Ko lautolu ne totoko ki a Iesu ne nakai maeke ke fakatikai e mena mooli ne tupu, ti taute lagatau a lautolu ke tamate tokoua a Iesu mo Lasalo.​—Ioane 11:47, 53; 12:9-11.

 Fakakite he Tohi Tapu kua maeke mo e finagalo e Atua ke liuaki mai a lautolu ne mamate. Ha ha he tokaaga katoatoa haana e fakamauaga matafeiga he tau tagata takitaha ka fakaliu tu mai e ia he malolō ue atu haana. (Iopu 37:23; Mataio 10:30; Luka 20:37, 38) Maeke e Atua ke liu fakamoui a lautolu ne mamate ti manako a ia ke taute pihia! He fakamaama e liu tu mai he vahā i mua, pehē e Tohi Tapu hagaao ke he Atua: Kua “finagalo fakaalofa a koe ke he gahua he hau a tau lima.”​—Iopu 14:15.

Tau tala nakai mooli ke he liu tu mai

 Tala nakai mooli: Ko e fakaliu tu mai ko e matutaki he moui mo e tino.

 Tala mooli: Fakaako he Tohi Tapu ko e moui ko e tagata katoa, nakai fai vala ne moui ka mate. (Kenese 2:7; Esekielu 18:4) Ko e tagata ka liu tu mai kua nakai ko e matutaki he moui mo e tino; ka kua liu eke mo tagata moui.

 Tala nakai mooli: Falu tagata to fakaliu tu mai ti liu mamate he mogoia ni.

 Tala mooli: Talahau he Tohi Tapu “ko lautolu ne mahani kelea” to “tutu mai ke he fakahala.” (Ioane 5:29) Ka ko e fakafili nei kua fakavē ke he tau gahua ha lautolu ka taute he mole e liliu tu mai, nakai he magaaho fakamua. Pehē a Iesu: To “logona ai e lautolu ne mamate e leo he Tama he Atua; ko lautolu foki ke logona ai to momoui ai a lautolu.” (Ioane 5:25) Ko lautolu ne “logona” po ke omaoma ke he tau mena ne iloa e lautolu he mole e liliu tu mai to tohia e tau higoa ha lautolu he “tohi haia he moui.”​—Fakakiteaga 20:12, 13.

 Tala nakai mooli: Ka fakaliu tu mai, to moua he tagata e tino tuga to mate a ia.

 Tala mooli: Ka mole e mate, to liliu e tino he tagata ke he efuefu.​—Fakamatalaaga 3:19, 20.