Fakamooli Nakai he Tau Perofetaaga ko Iesu e Mesia?

TĀ

Ko e tali he Tohi Tapu

Ē. He haia a Iesu he lalolagi, ne loga e perofetaaga ne fakamooli ko ia e “Mesia ko e Iki,” ko e “Fakamoui he lalolagi.” (Tanielu 9:25; 1 Ioane 4:14) He mole e mate a Iesu, ne matutaki a ia ke fakamooli e tau perofetaaga faka-Mesia.—Salamo 110:1; Gahua 2:34-36.

Ko e heigoa e kakano he “Mesia”?

Ko e kupu Heperu Ma·shiʹach (Mesia) mo e kupu ne tatai he faka-Heleni ko e Khri·stos (Keriso) ne hagaao ua ke he “Ko Ia ne Fakauku.” Ko e mena ia kua kakano e “Iesu Keriso” ko “Iesu ko Ia ne Fakauku,” po ko “Iesu ko e Mesia.”

He vahā Tohi Tapu, ne fakauku e tagata he liligi e puke lolo ke he ulu haana ka kotofa ke he tuaga pauaki ke pule. (Levitika 8:12; 1 Samuela 16:13) Ne fakauku he Atua a Iesu ke eke mo Mesia—ko e tuaga ne lahi e pule. (Gahua 2:36) Ka e nakai fakauku he Atua a Iesu aki e puke lolo, ne fakauku he Atua a Iesu aki e agaaga tapu.—Mataio 3:16.

Maeke nakai ke loga e tagata ka fakamooli e tau perofetaaga ke he Mesia?

Nakai. Tuga ni e tau pite he matalima ko e fakamailoga he taha ni e tagata, ti ko e fakamooliaga he tau perofetaaga he Tohi Tapu kua hagaao ni ke he taha e Mesia, po ke Keriso. Pete ia, ne hataki he Tohi Tapu “ha ko e mena tutu mai e tau Keriso pikopiko, mo e tau perofeta pikopiko, ti eke e lautolu e tau fakamailoga lalahi mo e tau mana, kia fakahehe aki a lautolu ni kua fifili, kaeke ke maeke ai.”—Mataio 24:24.

Liga kitia mai kia e Mesia he magaaho i mua?

Nakai. Talahau tuai he Tohi Tapu ko e Mesia to tupu mai he Patuiki ko Tavita i Isaraela. (Salamo 89:3, 4) Ka ko e tau fakamauaga he matohiaga he tau Iutaia ke hoko ki a Tavita nukua galo tuai, liga he moumou he tau Roma a Ierusalema he 70 V.N. a Tali mai he mogoia ne nakai maeke ha tagata ke fakakite mooli ko ia taha mai he magafaoa patuiki ha Tavita. Kehe ai, pete kua fai fakamauaga ke he tau matohiaga ia he magahala ha Iesu, nakai maeke agaia ni e tau fī haana ke totoko e talahauaga haana na tupu mai a ia ia Tavita.—Mataio 22:41-46.

Fiha e perofetaaga ke he Mesia i loto he Tohi Tapu?

Nakai maeke ke iloa tonu e numera katoa he tau perofetaaga faka-Mesia. Ma e fakatai, ko e puhala ne fakanumera e tau perofetaaga kua maeke ke kehekehe, pihia foki ke he tau vala ne maaliali ke he Mesia. Ko e Isaia 53:2-7 ne hagaao ke he loga e vala he perofetaaga ke he Mesia. Falu ne liga totou e vala katoa nei ko e taha ni e perofetaaga, ka e liga onoono falu ki ai ko e tau vala takitaha ko e tau perofetaaga kehekehe.

Falu perofetaaga faka-Mesia ne fakamooli e Iesu

Perofetaaga	Moua he	Fakamooliaga
Tupu mai ia Aperahamo	Kenese 22:17, 18	Mataio 1:1
Tupu mai he tama taane ha Aperahamo ko Isaako	Kenese 17:19	Mataio 1:2
Fanau mai he magafaoa Isaraela he magafaoa ha Iuta	Kenese 49:10	Mataio 1:1, 3
Mai he magafaoa patuiki he Patuiki ko Tavita	Isaia 9:7	Mataio 1:1
Fanau mai he tamafine tote	Isaia 7:14	Mataio 1:18, 22, 23
Fanau i Petelehema	Mika 5:2	Mataio 2:1, 5, 6
Fakahigoa ko Emanuela b	Isaia 7:14	Mataio 1:21-23
Tupumaiaga tokolalo	Isaia 53:2	Luka 2:7
Tamate e tau fanau mukemuke he mole e fanau mai haana	Ieremia 31:15	Mataio 2:16-18
Ui mai i Aikupito	Hosea 11:1	Mataio 2:13-15
Fakahigoa ko e Nasareta c	Isaia 11:1	Mataio 2:23
Mua mai e utafekau ia ia	Malaki 3:1	Mataio 11:7-10
Fakauku ko e Mesia he 29 V.N. d	Tanielu 9:25	Mataio 3:13-17
Fakahigoa he Atua ko e Haana a Tama	Salamo 2:7	Gahua 13:33, 34
Fakamakutu ma e fale he Atua	Salamo 69:9	Ioane 2:13-17
Fakamatala he tala mitaki	Isaia 61:1	Luka 4:16-21
Gahua fakamatala i Kalilaia ko e maama lahi	Isaia 9:1, 2	Mataio 4:13-16
Tagata ne omoomoi he agaaga e tau gahua, tuga a Mose	Teutaronome 18:15	Gahua 2:22
Tuga a Mose, talahau e ia e tau manatu he Atua	Teutaronome 18:18, 19	Ioane 12:49
Fakamaulu e tau tagata tokologa ne gagao	Isaia 53:4	Mataio 8:16, 17
Nakai fakamatalahi a ia ni	Isaia 42:2	Mataio 12:17, 19
Fakaalofa hofihofi ke he tau tagata matematekelea	Isaia 42:3	Mataio 12:9-20; Mareko 6:34
Fakakite e fakafili tonu he Atua	Isaia 42:1, 4	Mataio 12:17-20
Ko e Fakatonu Mua Ue Atu	Isaia 9:6, 7	Ioane 6:68
Fakapuloa e higoa a Iehova	Salamo 22:22	Ioane 17:6
Vagahau fakatai	Salamo 78:2	Mataio 13:34, 35
Ko e Takitaki	Tanielu 9:25	Mataio 23:10
Tokologa ne nakai talitonu ki a ia	Isaia 53:1	Ioane 12:37, 38
Ko e maka ke fakatupetupe	Isaia 8:14, 15	Mataio 21:42-44
Tiaki he tau tagata	Salamo 118:22, 23	Gahua 4:10, 11
Fakavihia teao	Salamo 69:4	Ioane 15:24, 25
Fenoga ne mua ki Ierusalema he asini	Sakaria 9:9	Mataio 21:4-9
Fakaheke he tau fanau	Salamo 8:2	Mataio 21:15, 16
Haele mai ke he higoa a Iehova	Salamo 118:26	Ioane 12:12, 13
Afo he tagata ne ofania	Salamo 41:9	Ioane 13:18
Afo aki e 30 e tupe ario e	Sakaria 11:12, 13	Mataio 26:14-16; 27:3-10
Tiaki he tau kapitiga a ia	Sakaria 13:7	Mataio 26:31, 56
Talahau he tau tagata fakamooli fakavai hagaao ki a ia	Salamo 35:11	Mataio 26:59-61
Fakanono i mua he tau tagata ne hokotaki	Isaia 53:7	Mataio 27:12-14
Tauanu ki ai	Isaia 50:6	Mataio 26:67; 27:27, 30
Ta haana ulu	Mika 5:1	Mareko 15:19
Fahi	Isaia 50:6	Ioane 19:1
Nakai totoko ki a lautolu ne ta a ia	Isaia 50:6	Ioane 18:22, 23
Totoko atu e tau takitaki fakatufono ki a ia	Salamo 2:2	Luka 23:10-12
Pao fao e tau lima mo e tau hui haana ke he akau fakatautau	Salamo 22:16	Mataio 27:35; Ioane 20:25
Vili e tau tagata ma e tau tapulu haana	Salamo 22:18	Ioane 19:23, 24
Totou fakalataha mo e tau tagata holifono	Isaia 53:12	Mataio 27:38
Ekefakakelea, amuamu	Salamo 22:7, 8	Mataio 27:39-43
Mamahi ma e tau tagata agahala	Isaia 53:5, 6	1 Peteru 2:23-25
Tuga na tiaki he Atua	Salamo 22:1	Mareko 15:34
Age e vineta mo e inu ne fiofio aki e akau kona	Salamo 69:21	Mataio 27:34
Fia inu ato mate	Salamo 22:15	Ioane 19:28, 29
Tuku age e agaaga ke he Atua	Salamo 31:5	Luka 23:46
Foaki haana moui	Isaia 53:12	Mareko 15:37
Foaki e lukutoto ke utakehe e agahala	Isaia 53:12	Mataio 20:28
Nakai fati e tau huimotua	Salamo 34:20	Ioane 19:31-33, 36
Hoka a ia	Sakaria 12:10	Ioane 19:33-35, 37
Tanu mo e tagata maukoloa	Isaia 53:9	Mataio 27:57-60
Liu tu mai he mate	Salamo 16:10	Gahua 2:29-31
Fai hukui e tagata ne afo	Salamo 109:8	Gahua 1:15-20
Nofo he lima matau he Atua	Salamo 110:1	Gahua 2:34-36

a Talahau he McClintock and Strong’s Cyclopedia: “Nakai fakauaua lahi na malona e tau fakamauaga he tau magafaoa Iutaia he moumouaga ha Ierusalema, nakai he fakamua atu.”

b Ko e higoa Heperu ko Emanuela, ne kakano “Kua Ha ha e Atua mo Tautolu,” ne fakamaama e matagahua ha Iesu ko e Mesia. He ha ha hinei haana he lalolagi mo e tau gahua haana ne fakamooli kua ha ha e Atua mo e tau tagata tapuaki Haana.—Luka 2:27-32; 7:12-16.

c Ko e kupu “Nasareta” ne moua mai he kupu Heperu neʹtser, ne kakano “vaka [po ke huli].”

d Ma e falu vala tala ke he fakapapahiaga he tau mena tutupu he Tohi Tapu hagaao ke he 29 V.N. ko e tau ne hoko mai e Mesia, kikite e vala tala “Puhala ne Talahau Tuai he Perofetaaga ha Tanielu e Hoko Mai he Mesia.”

e Ko e perofetaaga nei i loto he tohi a Sakaria, ka e pehē e tagata tohia he Tohi Tapu ko Mataio ko e “kupu he perofeta ko Ieremia.” (Mataio 27:9) Ne tuga ko e tohi a Ieremia ne fa tuku fakamua he tau Tohiaga Tapu ne fakahigoa ko e “tau perofeta.” (Luka 24:44) Mailoga ai ne fakaaoga e Mataio a “Ieremia” ke hagaao ke he potaaga katoa he tau tohi, putoia e tohi a Sakaria.

Liga Manako Foki a Koe

TAU FAKAAKOAGA TOHI TAPU

Kamata e Fakaakoaga Tohi Tapu ha Mautolu

Taute e fakaako Tohi Tapu ne nakai fai totogi mo e faiaoga.

TAU HŪHŪ TOHI TAPU KUA TALI