Umpostoli uPowula watlolela amaKrestu weThesalonika ukuthi, “Nangabe kukhona ongalilaleli ilizwi lethu eliza ngencwadi le, akahlale atshwayiwe.” (2 Thes. 3:14) Esikhathini esidlulileko besithi ngilokho abadala ekufuze bakwenze. Nange umuntu aragela phambili angalaleli iinkambiso zeBhayibheli ngitjho nanyana abadala bamnikele isiyalo kanengi, bekufuze babeke ikulumo yokumkhalima. Ngemva kwalokho, abarhuweleli bebangekhe bazithabise naye, bebazokukhuluma naye esimini nebandleni kwaphela.

Nanyana kunjalo, kutlhogeka ukulungiswa. Isiyalo sakaPowula sitjengisa ukuthi umKrestu omunye nomunye kufuze enzeni ebujamweni obuthileko. Akutlhogeki abadala babeke ikulumo yokukhalima umuntu. Kubayini kwenziwe amatjhuguluko la? Cabanga ngalokho uPowula ebekakhuluma ngakho nakanikela isiyalwesi.

UPowula watjheja ukuthi abanye ebandleni ‘bebakhamba ngokungakahleleki.’ Bebangasilaleli isiyalo esivela eliZwini lakaZimu. Nakasevakatjhweni lakhe wathi, “Nangabe umuntu akafuni ukusebenza nokudla angadli.” Nanyana kunjalo, bekunabanye abangafuni ukusebenza bona baziphilise nanyana bebakghona ukwenza njalo. Begodu bebazifaka eendabeni zabantu. AmaKrestu bekufuze abaphathe njani abantu abangakahleleki njalo.—2 Thes. 3:​6, 10-12.

UPowula wathi, “akahlale atshwayiwe.” Igama lesiGirigi kilokhu linomqondo wokutjheja nokuyelela umuntu onjalo bona ungagcini sele wenza njengaye namkha akukhube. UPowula watjho lokho kilo loke ibandla ingasi abadala kwaphela. (2 Thes. 1:1; 3:6) Yeke, umKrestu obona omunye umKrestu akunye naye angalaleli isiyalo esisekelwe eBhayibhelini, bekangakhetha ukulisa ‘ukuzihlanganisa’ nomuntu ongakahleleki loyo.

Kghani lokho bekutjho ukuthi umKrestu lo bekaphathwa njengomuntu osusiweko? Awa, uPowula wathi, “Ragelani phambili nimkhuthaza njengomfowethu.” AmaKrestu bekaba nomuntu otshwayiweko esifundweni nasesimini kodwana bekangakhetha ukungazihlanganisi naye ngeenkhathi zokuzithabisa. Kubayini? Umpostoli uPowula wathi, “Ukuthi abe neenhloni.” Ngebanga lokutshwaywa, umKrestu ongaziphathi ngokuhleleka angaba neenhloni begodu alungise iindlela zakhe.—2 Thes. 3:​14, 15.

AmaKrestu azokwazi njani nakufuze atshwaye umuntu othileko? Kokuthoma, sifuna ukuqinisekisa ukuthi kwamambala umuntu loyo uziphatha ‘ngendlela engakahleleki’ njengombana kwahlathulula uPowula. Ingasi abantu abenza izinto unembezethu angavumelani nazo kodwana ezingaphuli iinkambisolawulo namkha imithetho yeBhayibheli. Bekangakhulumi ngabantu abathanda izinto ezihlukileko kilezi thina esizithandako begodu bekangatjho umuntu okungenzeka usizwise ubuhlungu. Kunalokho uPowula bekakhuluma ngabantu abangalaleli umthetho kaZimu ngabomu nesiyalo esivela eliZwini lakhe.

Nasibona ukuthi umfowethu namkha udadwethu uragela phambili angalaleli isiyalo seliZwi lakaZimu, a singakhetha ukungazihlanganisi naye nasizithabisako. Njengombana lesi kusiqunto thina esizenzela sona, angekhe sitjele abanye abangasimalunga womndenethu. Begodu sisazozihlanganisa nomuntu loyo esifundweni nesimini. Nakalungisa iindlela zakhe, sizozithabisa naye godu.