UJesu wafundisa abantu ukuthi babe nokuthula. Kobunye ubujamo, wabatjela wathi: “Ningacabangi ukuthi ngizele ukuletha ukuthula ephasini; angikazeli ukuletha ukuthula, kodwana ngilethe isabula. Ngombana ngizele ukubangela ukuhlukana, phakathi kwendodana noyise, indodakazi nonina, umakoti nonosokana.” (Mat. 10:34, 35) Bekatjho ukuthini?

UJesu bakangafuni ukuhlukanisa amalunga wemindeni kodwana bekazi ukuthi iimfundiso zakhe zizokubangela ukuhlukana kweminye imindeni. Yeke, labo abanesifiso sokuba balandeli bakaKrestu bebabhajadiswe kuzokufuze baqalane nemiphumela yokukhetha abakwenzileko. Ngezinye iinkhathi umlingani womtjhado namkha amalunga womndeni bangabaphikisa benze kube budisi bona bahlale bathembekile eemfundisweni zakaKrestu.

IBhayibheli likhuthaza amaKrestu ukuthi, ‘abenokuthula nabantu boke.’ (Rom. 12:18) Iimfundiso zakaJesu zingaba ‘njengesabula’ kweminye imindeni. Lokho kungenzeka lokha ilunga lomndeni nalamukela iimfundiso zakaJesu kukulapho abanye bangazamukeli namkha baphikisana nazo. Ebujamwenobo, iinhlobo zabo nalabo abasemndenini, bangaba ‘manaba’ waloyo owamukele iqiniso.—Mat. 10:36.

Abalandeli bakaKrestu abasemndenini ohlukene phakathi ngokwekolo ngezinye iinkhathi bangaqalana nobujamo obulinga ithando abanalo ngoJehova noJesu. Ngokwesibonelo, iinhlobo ezingalotjhi uZimu zingabakhuthaza bona bagidinge amaholideyi wezekolo. Ebujamwenobo, bazokuqunta ukuthabisa ubani? UJesu wathi: “Othanda uyise namkha unina ukudlula mina akakangifaneli; nothanda indodana namkha indodakazakhe ukudlula mina akakangifaneli.” (Mat. 10:37) Liqiniso, uJesu bekangatjho ukuthi nabazakuba balandeli bakhe abafanelekako, kufuze bangasabathandi ababelethi babo. Kunalokho, wabafundisa indlela yokuqunta bona ngiziphi izinto eziqakatheke khulu ekuphileni. Nange amalunga womndeni angakholwako aphikisana nemizamwethu yokulotjha uJehova, kufuze siragele phambili nokuwathanda kodwana sikhumbule ukuthi umuntu ekufuze simthande qangi ukudlula abanye, nguZimu.

Asinakuzaza ukuthi ukuphikiswa mndenethu, kubuhlungu. Njengabalandeli bakaJesu kufuze sihlale siwakhumbula amezwi kaJesu athi: “Naloyo ongathwali isigodo sakhe sokuhlunguphazwa angilandele akakangifaneli.” (Mat. 10:38) Ngamanye amezwi, amaKrestu aqala ukuphikiswa mndeni njengengcenye yokuhlunguphazwa abafundi bakaKrestu abakwamukela ngokuzithandela. Ngesikhathi esifanako, banethemba lokuthi ukuziphatha kuhle kwabo kungenza amalunga wemindenabo bona atjhugulule imikhumbulwabo begodu afune ukwazi okungeziweko ngomlayezo weBhayibheli.—1 Pit. 3:1, 2.