Kghani Bewazi?
Ngaphandle kobufakazi obuseBhayibhelini, ngibuphi obunye ubufakazi obukhona obutjengisa ukuthi ama-Israyeli bewaziingqila eGibhide?
IBhayibheli ithi ngemva kobana bakwaMidiyani bathathe uJosefa baya naye eGibhide, uJakopo nomndenakhe bafudukela eGibhide basuka eKanana. Bafika bahlala esifundeni seGibhide, ebeyibizwa ngokuthi yiGotjheni ngemlanjeni iNayili. (Gen. 47:1, 6) Ama-Israyeli ‘aragela phambili anda.’ Yeke amaGibhide athoma ukutshwenyeka khulu ngama-Israyeli, athoma ukuqinisa isandla phezu kwawo.—Eks. 1:7-14.
Abaphikisi beBhayibheli bahlekisa ngokulandisokhu, bathi yinganekwane. Nanyana kunjalo, kunobufakazi obukhona obutjengisa ukuthi iinzukulwana zakaTjhemu * beziphila njengeengqila eGibhide.
Ngokwesibonelo, abosomlandu bafumene iinsalela zakade etlhagwini yeGibhide. UDr. John Bimson wabika ukuthi kunobufakazi obunengi ababufumene eendaweni ebekukhulunywa kizo isiTjhemu etlhagwini yeGibhide. Ngaphezu kwalokho, isazi seGibhide uJames K. Hoffmeier wathi: “Eminyakeni yabo-1800 kuya ku-1540 iGibhide bekuyindawo ehle nethandwako ebantwini ebebakhuluma isiTjhemu abavela e-Asia bafudukela eGibhide.” Ungezelela ngokuthi: “Isikhatheso sikhathi ebekuphila ngazo iiNzalamizi, ubujamo bakhona bebufana begodu sifunda ngabo encwadini kaGenesisi.”
Godu kunobunye ubufakazi obufumaneka esewula yeGibhide. Eminyakeni yabo-2000 kuya ku-1600 kwafunyanwa imisongo enamabizo weengqila ebezisebenza esewula yeGibhide. Amabizo angaphezu kwama-40 bekangewabantu abakhuluma isiTjhemu. Iingqilezi bezisebenza ukupheka, ukuthunga neminye imisebenzi. UHoffmeier uthi: “Njengombana amaTjhemu ama-40 bekasebenza endlini eyodwa esewula yeGibhide, isibalo sabantu beGibhide khulukhulu eDelta ngiso ebesisikhulu.”
USomlando uDavid Rohl watlola wathi amanye amabizo weengqila aserhelweni “bewavela emakhasini weBhayibheli.” Ngokwesibonelo, ezinye iinsalela bezinamabizo athi, Isakari, Atjheri nelithiTjhifira. (Eks. 1:3, 4, 15) URohl nakaphethako uthi, “Lobu bufakazi bamambala bangesikhathi ama-Israyeli enziwe iingqila eGibhide.”
UDr. Bimson uthi: “Izinto okukhulunywa ngazo eBhayibhelini zokuthi abantu benziwe iingqila eGibhide nenarheni ye-Eksodusi, zinomlando onobufakazi obuqinileko.”
^ isig. 4 Ibizo lesitjhaba samaTjhemu livela ebizweni lakaTjhemu enye yamadodana amathathu kaNowa. Iinzukulwana zakaTjhemu kungenzeka bezihlanganisa ama-Elamu, ama-Asiriya, amaKasidi, amaHebheru, amaSiriya, nezinye iintjhaba zama-Arabhu.
