Uyakuhloya Na Okumbi?

“[UJesu] uhloya ikohlakalo.”—HEB. 1:9.

1. UJesu wafundisani malungana nethando?

AGANDELELA ukuqakatheka kwethando, uJesu Krestu watjela abafundi bakhe: “Khona nje nginipha umlayo omutjha ngithi: Thandanani. Njengombana gade nginithanda, nje-ke, nani nifanele ukuthandana. Nanithandanako, boke abantu bazakwazi bona nibafundi bami.” (Jwa. 13:34, 35) UJesu walayela abalandeli bakhe bona babe nethando lokuzidela komunye nomunye. Ithandwelo belizokuba litshwayo ababonakala ngalo. Godu uJesu wabakhuthaza: “Thandani amanaba wenu nithandazele nalabo abanizumako.”—Mat. 5:44.

2. Abalandeli bakaKrestu kufuze bahlawulele ukuhloya ini?

² Nokho, ngaphezu kokufundisa abafundi bakhe ngethando, uJesu wabafundisa nalokho okufuze bakuhloye. Kuqaliswe kuJesu kwathiwa: “Ukulunga uyakuthanda, uhloya ikohlakalo [ubumbi].” (Heb. 1:9; Rha. 45:7) Lokhu kutjengisa bona akukafaneli bona sihlawulele ithando lokulungileko kwaphela kodwana kufuze sihloye isono, namtjhana ukweqa umthetho. Kuyatjhejeka bona umpostoli uJwanisi watjho ngokunqophileko bona: “Loyo oweqa umthetho wenza isono ngombana isono kukukweqa umthetho.”—1 Jwa. 3:4.

3. Malungana nokuhloya okumbi, ngiziphi iingcenye zokuphila isihlokwesi esizokucoca ngazo?

 ³ Ngalokho, njengamaKrestu senza kuhle ngokuzibuza, ‘Ngiyakuhloya okumbi?’ Asihlole bona singakutjengisa njani ukuhloya okumbi eengcenyeni ezine zokuphila ezilandelako: (1) indlela esikuqala ngayo ukusebenzisa kumbi utjwala, (2) umbono wethu ngokusebenzelana nemimoya, (3) indlela esikuqala ngayo ukuziphatha kumbi ngokomseme, (4) nombono wethu ngalabo abathanda okumbi.

Busebenzise Kuhle Utjwala

4. Kubayini uJesu gade anekululeko yokukhuluma nekayelelisa ngokusela khulu?

⁴ Ngeenkhathi ezithileko uJesu wasela iwayini, atjheja bona lisisipho esivela kuZimu. (Rha. 104:14, 15) Nokho, akhenge asisebenzise kumbi isiphwesi ngokuzitika ngokusela ngokudluleleko. (Iziy. 23:29-33) Ngalokho uJesu bekanekululeko yokukhuluma nekaluleka ngokujamelene nomukghwa lo. (Funda uLuka 21:34.) Ukusebenzisa kumbi utjwala kungabangela ezinye izono ezikulu. Ngalokho umpostoli uPowula watlola: “Ningadakwa nizakhendla ipilo yenu; kunalokho nizaliswe ngomoya ocwengileko.” (Efe. 5:18) Godu wakhuthaza abafazi abakhulileko ebandleni bona ‘bangabi ziingqila zewayini elinengi.’—Tit. 2:3.

5. Ngimiphi iimbuzo labo abakhetha ukusela utjwala abangazibuza yona?

⁵ Newukhetha ukusela utjwala, uzabe wenza kuhle ngokuzibuza: ‘Nginombono ofana newakaJesu malungana nokusela khulu? Nekutlhogeka ngiluleke abanye ngendaba le, nginayo ikululeko yokukhuluma? Ngisela bona ngibalekele ukutshwenyeka namtjhana ukuqeda ukugandeleleka? Bungangani utjwala engibusela qobe veke? Ngisabela njani omunye nekalinganisa bona kungenzeka ngisela khulu? Ngiyazivikela namtjhana ngikwate?’ Ukuzivumela bona sibe ziingqila zewayini elinengi kungakhinyabeza ikghono lethu lokucabanga kuhle nokwenza iinqunto ezihlakaniphileko. Abalandeli bakaKrestu balwela ukuvikela ikghono labo lokucabanga.—Iziy. 3:21, 22.

Balekela Ukusebenzelana Nemimoya

6, 7. (a) UJesu waberegelana njani noSathana namadimoni? (b) Kubayini imikghwa yokusebenzelana nemimoya yande kangaka namhlanjesi?

⁶ Nekasephasini, uJesu waphikisana ngokuqinileko noSathana namadimonakhe. Wahlula uSathana nekasahlela ukuthembeka kwakhe ngokunqophileko. (Luka 4:1-13) Godu waveza bewaphikisana nemizamo efihlakeleko yokonakalisa ukucabanga nezenzo zakhe. (Mat. 16:21-23) UJesu warhelebha nabafanelekako bona batjhaphuluke egandelelweni elinelunya lamadimoni.—Mar. 5:2, 8, 12-15; 9:20, 25-27.

⁷ Ngemva kokubekwa kwakaJesu bona abe yiKosi ngo-1914, wahlanza amazulu emtheleleni osilaphazako kaSathana namadimonakhe. Ngebanga lalokho, uSathana—nje kunanini ngaphambili—uzimisele ‘ukukhohlisa iphasi loke.’ (ISam. 12:9, 10) Ngalokho kufuze kungasirari bona ukuthanda ukusebenzelana nemimoya kujayelekile begodu kuyanda. Yini esingayenza bona sizivikele?

8. Ngikuphi ukuzihlahluba okufaneleko malungana nokukhetha kwethu zokuzithabisa?

⁸ IBhayibhili ngokukhanyako ikhalima ngeengozi ezihlangene nemimoya. (Funda uDuteronomi 18:10-12.) Namhlanje, uSathana namadimoni bonakalisa ukucabanga kwabantu  ngamabhayisikobho, iincwadi nemidlalo ye-electronic ethuthukisa ukusebenzisa imimoya. Ngalokho, nesikhetha zokuzithabisa, ngamunye kufuze azibuze: ‘Eenyangeni ezidlulileko, ngikhethe ukuthatjiswa mabhayisikobho, amahlelo we-TV, imidlalo ye-electronic, iincwadi namtjhana amahlaya abukisa ngemilingo? Ngiyakulemuka ukuqakatheka kokwala umthelela wemimoya namtjhana ngizithathela phasi iingozezi? Ngiyacabanga bona uJehova angazizwa njani ngezokuzithabisa engizikhethako? Nengabe ngivumela umthelela kaSathana onjalo, ithando lami ngoJehova neenkambisolawulo zakhe zokulunga zingitjhukumisela bona ngenze ngokuhlakanipha begodu ngiyibalekele imikghwa le?’—IZe. 19:19, 20.

Lalela Isiyeleliso SakaJesu Malungana Nokuziphatha Okumbi Ngokomseme

9. Umuntu angalikhulisa njani ithando lokungabi namthetho?

⁹ UJesu wasekela iinkambisolawulo zakaJehova malungana nokuziphatha kuhle ngokomseme. Wathi: “Azange khenifunde imitlolo ethi emathomeni uMbumbi wabumba omduna nomsikazi na? Yeke uZimu wathi: ‘Ngesizathwesi indoda izatjhiya uyise nonina ihlale nomkayo, ababilaba bazaba munye.’ Abasesebabili, kodwana banye. Yeke umuntu akangahlukanisi okuhlanganiswe nguZimu.” (Mat. 19:4-6) UJesu gade azi bona esikubonako kungathinta iinhliziyo zethu. ETjumayelwenakhe Yentabeni, wathi: “Nizwile bona kwathiwa: ‘Ningahlobongi.’ Kodwana ngiyanitjela-yi: Nanyana ngubani oqala umfazi amkhanuke bona ibe ngewakhe, uhlobongile naye ehliziyweni yakhe.” (Mat. 5:27, 28) Labo abatjhalazelela isiyeleliso sakaJesu eqinisweni bakhulisa ithando lokungabi namthetho.

10. Landisa okuhlangabezwane nakho okutjengisa bona umuntu angatjhaphuluka ekubukeleni iinthombe zomseme ezisilapheleko.

¹⁰ USathana uthuthukisa ukuziphatha kumbi ngokomseme ngeenthombe zomseme ezisilapheleko. Iphasi lanamhlanje lizele zona. Labo ababukela iinthombe zomseme ezisilapheleko bakufumana kubudisi ukususa iinthombezo emkhumbulwenabo. Bangagcina sebazirhuluphele iinthombe zomseme ezisilapheleko. Cabanga ngalokho okwenzeka komunye umKrestu. Uthi: “Gade ngibukela iinthombe zomseme ezisilapheleko ngerhorhomejeni. Ngazakhela iphasi lamabhudango lelo ebengidlumbanyana alikahlangani nephasi engikhonza kilo uJehova. Bengazi bona umukghwa lo mumbi kodwana ngazitjela bonyana ikonzwami kuZimu isamukeleka.” Khuyini okwatjhentjha ukucabanga komzalwana lo? Uthi: “Nanyana bekuyinto ebudisi ukuzidlula zoke engikhe ngazenza, ngakhetha ukutjela abadala ngomrarwami lo.” Umzalwana lo emaswapheleni wawuhlula umukghwa ophathisa iinhloni lo. Wavuma, “Ngemva kokuhlanza ipilwami esonwenesi, ekugcineni ngezwa bona kwamambala nginesazelo esihlwengileko.” Labo abahloya okumbi kufuze bahloye neenthombe zomseme ezisilapheleko.

11, 12. Singalitjengisa njani ihloyo ngokungabi namthetho nekuziwa ekukhetheni umbhino?

¹¹ Umbhino namezwawo ungaba nomthelela onamandla endleleni esizizwa ngayo nehliziywenethu engokomfanekiso. Umbhino ngokwawo sisipho esivela kuZimu begodu sewunesikhathi eside usetjenziswa ekukhulekeleni kweqiniso. (Eks. 15:20, 21; Efe. 5:19) Kodwana iphasi lakaSathana elonakeleko lithuthukisa  umbhino odumisa ukuziphatha okumbi ngokomseme. (1 Jwa. 5:19) Wazi njani bona umbhino owulalelako uyakusilaphaza namtjhana awa?

¹² Ungathoma ngokuzibuza: ‘Iingoma engizilalelako zidumisa ukubulala, ukuhlobonga, ubufebe nehlamba? Nengabe kufuze ngifundele omunye amezwi weengoma zawo, umuntu loyo angabona bonyana ngiyakuzonda okumbi, namtjhana amezwawo atjengisa bona ihliziywami isilaphele?’ Angeze sahloya ukungabi namthetho ngamezwi kungilapho sikudumisa ngombhino. UJesu wathi: “Zoke izinto eziphuma emlonyeni zivela ehliziyweni, lezi zizinto ezisilaphaza umuntu. Ngombana ngehliziyweni kuvela izinto ezimbi ezenza umuntu abulale, ahlobonge enze nokhunye okumbi, agalaje, akhulume amanga, ahlambalaze abanye.”—Mat. 15:18, 19; madanisa noJakobosi 3:10, 11.

Yiba Nombono KaJesu Ngalabo Abathanda Ukungabi Namthetho

13. UJesu wabaqala njani labo abaphikelela ekwenzeni isono?

¹³ UJesu wathi uzele ukuzokubiza izoni namtjhana abambi bona batjhuguluke. (Luka 5:30-32) Ngalokho, wabaqala njani labo abaphikelela ekwenzeni isono? UJesu wanikela isiyeleliso esinamandla ngokurhorhwa ngabanjalo. (Mat. 23:15, 23-26) Godu ngokukhanyako wathi: “Ingasiwoke othi kimi, ‘Kosi, Kosi’ ozangena embusweni wezulwini, kodwana ngilabo abenza okufunwa nguBaba osezulwini. Mhlana kufika ilanga lokwahlulela, abanengi bazakuthi kimi: ‘Kosi, Kosi!’ Ebizweni lakho sakhuluma umlayezo kaZimu, ngebizo lakho saqotha imimoya eminengi emimbi senza neemmangaliso ezinengi!’” Nokho, uzobala labo ngokungaphendukiko abenza okumbi, athi: “Sukani kimapha.” (Mat. 7:21-23) Kubayini bafumana isahlulelo esinjalo? Ngombana abanjalo abamhloniphi uZimu balimaza nabanye ngemikghwa yabo emimbi.

14. Kubayini izoni ezingaphendukiko zisuswa ekuhlanganyeleni?

¹⁴ ILizwi lakaZimu lilayela bona izoni ezingaphendukiko zisuswe ekuhlanganyeleni. (Funda u-1 KwebeKorinte 5:9-13.) Lokhu kuqakatheke ngamabanga amathathu: (1) ukususa isihlamba ebizweni lakaJehova, (2) ukuvikela ibandla ekonakalisweni, (3) nokusiza izoni bona ziphenduke nekukghonekako.

15. Nesihlala sithembekile kuJehova, ngimiphi iimbuzo eqakathekileko okufuze sizibuze yona?

¹⁵ Sinombono ofana newakaJesu na ngalabo esele banamathele ekwenzeni okumbi? Kufuze sicabangele iimbuzo nasi: ‘Ngingakhetha ukuzihlanganisa qobe nomuntu osusiweko namtjhana ozihlukanise nebandla lobuKrestu? Kuthiwani nengabe sihlobo esiseduze esingahlali ekhaya?’ Ubujamo obunjalo bungaba livivinyo lamambala ekuthandeni kwethu ukulunga nokuthembeka kwethu kuZimu. *

16, 17. Ngibuphi ubudisi umma omKrestu aqalana nabo, begodu yini eyamrhelebha walisekela ilungiselelo lokususa isoni esingaphendukiko ekuhlanganyeleni?

¹⁶ Cabangela okuhlangabezwane nakho kwakadade onendodana esele ikhulile eyakhe yamthanda uJehova. Nokho, ngokukhamba kwesikhathi, yakhetha ukwenza okumbi  ngokungaphenduki. Ngalokho, yasuswa ekuhlanganyeleni. Udadwethu uyamthanda uJehova, uyayithanda nendodanakhe begodu wakufumana kubudisi ukusebenzisa isiyalo esingokoMtlolo sokugegeda ukuzihlanganisa nayo.

¹⁷ Ngisiphi isiluleko ongasinikela udade lo? Umdala wamrhelebha wazwisisa bona uJehova uyabazi ubuhlungu abuzwako. Umdala wambawa bona acabange ngobuhlungu uJehova ekufuze bonyana wabuzwa amanye wamadodanakhe aziingilozi nahlubukako. Umdala wabonisana naye bonyana ngitjho nanyana uJehova abazi ubujamo obunjalo bona bubuhlungu kangangani, ufuna izoni ezingaphendukiko zisuswe ekuhlanganyeleni. Wazamukela iinkhumbuzo begodu walisekela ngokuthembeka ilungiselelo lokususa ekuhlanganyeleni. * Ukuthembeka okunjalo kuthabisa ihliziyo kaJehova.—Iziy. 27:11.

18, 19. (a) Ukuzihlukanisa nomuntu owenza okumbi kunikela ubufakazi bokuhloya ini? b) Ukuthembeka kuZimu nelungiselelweni lakhe kungaba namuphi umphumela?

¹⁸ Newuqalene nobujamo obunjalo, khumbula bona uJehova uzwelana nawe. Ngokulisa ukuzihlanganisa nosusiweko namtjhana ozihlukanisileko, utjengisa bona uhloya imikghwa nezenzo ezimdosele emphumeleni loyo. Nokho, godu utjengisa bona uyamthanda umenzi wobumbi begodu umfunela okubhedere khulu. Ukuthembeka kwakho kuJehova kungandisa amathuba wokobana olaywako aphenduke abuyele kuJehova.

¹⁹ Omunye owakhe wasuswa begodu ngokukhamba kwesikhathi wabuyiselwa watlola: “Kuyangithabisa bona uJehova ubathanda khulu abantu bakhe kangangobana ufuna bona ihlanganwakhe ihlale ihlwengile. Okungabonakala kulilunya ebantwini bangaphandle, kuqakathekile begodu kulithando lamambala ukukwenza.” Ucabanga bona umuntu lo bekangarhelejwa afikelele isiphetho esinjalo ukube amalunga webandla, kuhlanganise nomndenakhe bebazihlanganisa naye qobe nekasasusiweko ekuhlanganyeleni? Ukusekela ilungiselelo elingokoMtlolo lokususa ekuhlanganyeleni kunikela ubufakazi bokobana sithanda ukulunga begodu siyalitjheja ilungelo lakaJehova lokubeka iinkambisolawulo zokuziphatha.

“Hloyani Okumbi”

20, 21. Kubayini kuqakathekile ukufunda ukuhloya okumbi?

²⁰ Umpostoli uPitrosi wayelelisa, “Tjhejani, nilinde.” Kubayini atjho njalo? Ngombana “inaba lenu uSathana, utjhagala hlangana nani njengengwenyama ebhodlako, efuna ezomudla.” (1 Pit. 5:8) Kungaba nguwe umuntu loyo? Okunengi kusame ekutheni ufunda kuhle kangangani ukuhloya okumbi.

²¹ Ukuhlawulela ukuhloya okumbi akusilula. Sibelethwe sinesono, begodu siphila ephasini elisikhuthaza bona silandele iimfiso zenyama. (1 Jwa. 2:15-17) Ngokulingisa uJesu Krestu nangokuhlawulela ithando elidephileko ngoJehova uZimu, singaphumelela ekuhlawuleleni ihloyo ngokwenza okumbi. Asizimiseleni ‘ukuhloya okumbi,’ siqiniseka ngokuzeleko bona uJehova “utjheja . . . abathembekileko bakhe; uyabatjhaphulula esandleni sabambi.”—Rha. 97:10.

[Imitlolo yaphasi]

Ungaphendula Njani?

• Khuyini engasirhelebha sihlole indlela esiqala ngayo utjwala?

• Ngisiphi isivikelo esingasithatha malungana nokusebenzelana nemimoya?

• Kubayini ukubukela iinthombe zomseme ezisilapheleko kuyingozi?

• Singalitjengisa njani ihloyo ngokumbi umuntu esimthandako nekasusiweko ekuhlanganyeleni?

[Iimbuzo Yesifundo]

[Isithombe ekhasini 29]

Newukhetha ukusela utjwala, khuyini okufuze uyicabangele?

[Isithombe ekhasini 30]

Yelela umthelela kaSathana kezokuzithabisa

[Isithombe ekhasini 31]

Umuntu obukela iinthombe zomseme ezisilapheleko ukhulisa ithando lani?