“Uzowutjhisakalela”
Tjhidela KuZimu
“Uzowutjhisakalela”
KUBUHLUNGU ukubona umuntu esimthandako atlhaga begodu afa. Ngokwemvelo, kusibangela isizi ukulahlekelwa okunjalo. Nokho, kuyaduduza ukwazi bona uMbumbi wethu, uJehova uZimu, uyabazi ubuhlungu bethu. Ngaphezu kwalokho, uqale phambili ekusebenziseni amandlakhe angeze alinganiswa ukuvusa abafileko. Tjheja ithemba elivezwe emezwini kaJobhi, atlolwe kuJobhi 14:13-15.
Cabangela isizinda sendaba le. UJobhi indoda enekholo elibabazekako, iqalene neenlingo ezibudisi kwamanikelela—ezihlanganisa ukulahlekelwa ngizo zoke izinto zakhe eziphathekako, ukuhlongakalelwa ngibo boke abantwabakhe, begodu nokugula abangwe neenzibi. Asesizini elikhulu, wathi kuZimu: “Kwanga ungangifihla eShiyoli [izindla]!” (Ivesi-13) UJobhi uqala iShiyoli njengendawo azofumana kiyo ipumuzo. Alapho, njengokungathi uyigugu elifihlwe nguZimu, ngeze asezwa ubudisi nobuhlungu. *
UJobhi uzokuhlala eShiyoli unomphela? UJobhi ukholelwa bona lokho ngekhe kwenzeke. Uraga umthandazwakhe uthi: “Ngathana . . . bewungangibekela isikhathi ungikhumbule!” Ngokuqiniseka uJobhi ukholelwa bona ukuhlala kwakhe eShiyoli kuzokuba ngokwesikhatjhana nokobana uJehova ngeze amkhohlwe. UJobhi ufanisa isikhathi azosihlala eShiyoli ‘nekonzo ekatelelwako’—isikhathi esikatelelweko sokulinda. Bekube nini? Wathi, “Bekufike ipumuzo yami.” (Ivesi-14) Ipumuzo leyo izokutjho ukutjhatjhululwa eShiyoli—ngamanye amezwi, ukuvuswa kwabafileko!
Kubayini uJobhi aqiniseka bona ipumuzo leyo izokufika? Ngombana uyazi bona uMbumbi wethu othandekako uzizwa njani ngabakhulekeli bakhe abahlongakalako. UJobhi uthi: “Uzokubiza, mina ngizokuphendula. Uzokutjhisakalela umberego wezandla zakho.” (Ivesi-15) UJobhi bekazi bona umberego wezandla zakaZimu. UMnikelikuphila obekanomthwalo wefanelo ekwakhekeni kwakaJobhi ngesibelethweni ngokuqinisekileko angakghona ukumbuyisela ekuphileni ngemva kobana ahlongakele.—Jobhi 10:8, 9; 31:15.
Amezwi kaJobhi asifundisa bona uJehova unethando elingangani: Unobuhlobo obukhethekileko nalabo abanjengoJobhi, abazibeka esandleni sakhe, bamvumele ababumbe abenze babe babantu abafiselekako emehlwenakhe. (Isaya 64:8) UJehova ubaqala njengabaligugu abakhulekeli bakhe abathembekileko. ‘Unetjisakalo’ ngabathembekileko abahlongakalako. Esinye isazi sithi ibizwelo lesiHebheru “ngokunganakuzaza lingelinye lamabizo anamandla atjengisa amazizo wokutjhisakalela.” Kwamambala, uJehova akakhumbuli abakhulekeli bakhe kwaphela kodwana godu unetjisakalo yokubabuyisela ekuphileni.
Ngokuthabisako, encwadini kaJobhi—okungenye yeencwadi zokuthoma zeBhayibhili ukutlolwa—uJehova wakubona kufaneleka ukwambula ihloswakhe yokuvusa abahlongakeleko. * Ufuna ukukuhlanganisa nabathandekako bakho abahlongakalako. Umbono lowo ungenza kube lula ukukghodlhelela ukubuhlungu bokuhlongakalelwa. Kubayini ungafundi okungeziweko ngoZimu othandekako lo nangokobana angakwenza njani ube mumuntu ozokubona ihloswakhe izaliseka?
[Imitlolo yaphasi]
^ isig. 4 Enye incwadi ithi amezwi kaJobhi athi “ungifihle” angatjho ‘ukungibeka ngokuvikeleka njengelitje eliyigugu.’ Omunye umthombo uthi amezwi la alinganisa bona “ungifihle njengegugu.”
^ isig. 8 Ukufunda okungeziweko malungana nesithembiso sakhe esiseBhayibhilini sokuvusela abahlongakeleko ephasini elitjha, qala isahluko-7 sencwadi ethi Khuyini Kwamambala Okufundiswa YiBhayibhili? egadangiswa boFakazi BakaJehova.