Isiporofido 2. Indlala

“Kuzakuba nendlala.”—MARKOSI 13:8.

● Indoda ethileko yaya endaweni yeQuaratadji, eNiger bona izokuphephela khona. Abomzawayo, abanakwabo nabodadwabo nabo baya lapho bavela emaphakathini wenarha babalekela indlala. Nokho, indoda le ilele yodwa phasi emadeni. Kubayini ilele yodwa? USidi, ikosi yendawo leyo uhlathulula uthi, “Ayikghoni ukutlhogomela [umndenayo] begodu ayikghoni nokuragela phambili iwuqala ngemehlweni.”

NGIKUPHI OKUTJENGISWA MAQINISO? Ephasini mazombe, pheze umuntu oyedwa kwabalikhomba akakufumani ukudla okulingeneko qobe langa. Isibalo siphezulu e-sub-Saharan Africa, lapho umuntu oyedwa kwabathathu ahlala alambile. Ukukuzwisisa bhedere lokho, cabanga ngomndeni onobaba, umma nomntwana. Nekunokudla okulingene abantu ababili, ngubani okufuze alambe? Ngubaba? ngumma? mntwana? Lesi siqunto iimndeni enjengalo eqalana naso qobe langa.

NGIKUPHI UKUPHIKISA OKUJAYELEKILEKO? Iphasi likhiqiza ukudla okulingene woke umuntu. Iinsetjenziswa zephasi zitlhoga kwaphela ukulawulwa kuhle.

UKUPHIKISOKHO KULIQINISO? Kwamambala, abalimi bangakhiqiza begodu bathuthe ukudla okunengi kunanini ngaphambili emlandweni. Kuhlekuhle, aborhulumende babantu kufuze bakghone ukulawula kuhle ukudla kwephasi bona bazokwazi ukurarulula iimraro yendlala. Nokho, ngitjho nangemva kweemnyaka elitjhumi balinga, khenge bakghone ukwenza njalo.

UCABANGANI? UMarkosi 13:8 sekazalisekile? Naphezu kokuthuthuka kwetheknoloji, ukutlhogakala kokudla kusabathinta abantu abanengi ephasini loke?

Ukusikinyeka kwephasi nendlala kuvame ukuba sithomo seemraro ephakanyiswa litshwayo elinye lemihla yokuphela.

[Umkhangiso osekhasini 5]

“Abantwana abangaphezu koyedwa ababulawa yi-pneumonia, isifo sokuthulula namanye amalwelwe bebangaphuluka ngathana bebondlekile.”—U-ANN M. VENEMAN, UMNQOPHISI WALOKHA WESIGUNGU WE-UN CHILDREN’S FUND.

[Umthombo wesithombe ekhasini 5]

© Paul Lowe/Panos Pictures