Isiporofido 3. Amalwelwe
Isiporofido 3. Amalwelwe
“Abantu . . . bazokuphathwa malwelwe asabekako.”—LUKA 21:11, Contemporary English Version.
● UBonzali, sikhulu sezamaphilo somphakathi kwenye inarha ye-Afrika erathulwe yipi yomphakathi, wenza okuncani angakwenza ukulapha iinsebenzi zemayini zedorobheni lekhabo ezibulawa mumulwana weMarburg. * Ukubawa kwakhe irhelebho eenkhulwini zedorobho elikhulu kufane nokubethisa amazinyo ngomoya. Ngemva kweenyanga ezine, irhelebho liyafika kodwana uBonzali selahlongakele. Iinsebenzi zemayini egade alinga ukuziphulusa zimthelele ngeMarburg.
NGIKUPHI OKUTJENGISWA MAQINISO? Amalwelwe abangela ukungaphefumuli kuhle (njenge-pneumonia), ubulwelwe bokukhanjiswa yindeni, i-HIV/AIDS, i-TB, nemalariya aphakathi kwamanye wamalwelwe abulala khulu natshwenya abantu. Emnyakeni wamva nje, iingaba ezihlanu zamagulwezi kulinganiselwa bona zibulele abantu abaziingidi ezi-10.7. Ngamanye amezwi, amalwelwe la pheze abulala umuntu munye qobe ngeemzuzwana eemthathu, unyaka woke.
NGIKUPHI UKUPHIKISA OKUJAYELEKILEKO? Inani labantu liragela phambili landa, ngalokho, akurari bona kuba nezehlakalo ezinengi zokugula. Banengi abantu abangagula.
UKUPHIKISOKHO KULIQINISO? Inani labantu lande ngokurarako. Kodwana kwenzeke okufanako nekghonweni labantu lokuhlola, ukulawula, nokulapha amalwelwe. Ngalokho akukalindeleki bona lehle izinga ubulwelwe obutshwenya ngalo abantu? Nokho, kwenzeka okuphambene nalokho.
UCABANGANI? Abantu batlhagiswa malwelwe asabekako njengombana iBhayibhili labikezela?
Ukusikinyeka kwephasi, indlala, namalwelwe mamandla abangela iingidi zabantu amatlhuwo. Iingidi ezinengi zabantu zitlhagiswa babanye abantu—abanengi batlhoriswa ngibo kanye abantu okufuze ngathana bayabavikela. Tjheja lokho isiporofido seBhayibhili esathi kuzokwenzeka.
[Umtlolo waphasi]
^ isig. 3 I-Marburg Hemorrhagic Fever ibangelwa mumulwana ohlobene ne-Ebola.
[Umkhangiso osekhasini 6]
“Kumbi ukudliwa yibhubezi namtjhana okhunye, kodwana kumbi ngokufanako ukudliwa ngaphakathi mumulwana othileko osabekako nokubona lokho kwenzeka kiyo yoke indawo ekubhodileko.”—ISAZI SAMALWELWE UMICHAEL OSTERHOLM.
[Umthombo wesithombe ekhasini 6]
© William Daniels/Panos Pictures