IBhayibhili Itjhugulula Amaphilo

KHUYINI eyatjhukumisela umntazana osesemutjha bona abuyele ekolweni akhulela kiyo asesemncani? Funda njengombana ahlathulula.

“Nje, Nginomnqopho Wamambala Ekuphileni.”—ULISA ANDRÉ

UMNYAKA ABELETHWA NGAWO: 1986

INARHA ABELETHELWA KIYO: ILUXEMBOURG

UMLANDO: UMNTWANA WELAHLEKO

UKUPHILA KWAMI KWANGAPHAMBILI: Ngakhulela eBertrange, edorobhaneni elihlanzekileko, eliphephileko nelinothileko hlanu kwedorobha elikhulu leLuxembourg. Ngibuphetjhani ebantwaneni bakwethu abahlanu. Ababelethi bami boFakazi BakaJehova, begodu basebenza budisi bona badzimelelise iinkambisolawulo zobuKrestu kimi, kibomnakwethu nakibodadwethu.

Nengingena eemnyakeni yobutjha, ngathoma ukuba nokuzaza okukhulu ngalokho okufundiswa boFakazi BakaJehova. Ekuthomeni, akhenge ngikutjheje ukuzazokho, kodwana kancanikancani ikholo lami laba buthakathaka. Ababelethi bami benza koke abangakwenza bona banginqophise endleleni elungileko, kodwana ngalala isizo labo. Bangazi, ngaba nesikhathi nabantu abatjha egade banehlonipho encani ngegunya. Bengifuna itjhaphuluko egade kubonakala kwanga indlelabo yokuphila inalo. Besikhamba amaphathi, siziphatha kumbi ngokomseme, sidla iindakamizwa sisela notjwala. Ngathoma ngakuthabela ukuba nabantu ebebabonakala bathabela ipilo ngokuzeleko.

Nokho, eqinisweni bengingakathabi. Ukuphila nabangani abanjalo bekunganamnqopho; akekho namunye owacabanga ngokutjhingileko ngananyana yini. Ngokuhlukileko, bengitshwenywa zizinto ezinjengokungabi nobulungisa obuzele ephasini. Njengombana isikhathi sikhamba, ngazizwa ngigandeleleka khulu.

INDLELA IBHAYIBHILI EYATJHUGULULA NGAYO UKUPHILA KWAMI: Langelinye nesele ngineemnyaka eli-17, ngazizwa ngigandelelekile. Umma nakakubonako lokhu, wangibawa bona ngifunde iBhayibhili godu. Wangikhuthaza bona ngihlole iimfundiso zayo begodu ngizikhethele bona ngiyafuna ukuphila ngokuvumelana nazo nofana awa. Ukukhulumisana okutjhaphulukileko nokuncamilekokho kwangitjhentjha. Ngavuma ukufunda iBhayibhili nodadwethu omkhulu uCaroline nendodakwakhe u-Akif. U-Akif akhenge akhuliswe bokaFakazi BakaJehova kodwana waba ngomunye wabo nesele amkhulu. Ngebanga lokuphila kwaka-Akif kwesikhathi esidlulileko, ngacabanga bona ngingakghona ukukhuluma naye ngokutjhaphulukileko, ebekuyinto eqakathekileko kimi.

 Bengazi bona ipilo ebengiyiphila beyingakufaneli ukuba nguFakazi, kodwana ekuthomeni, bengicabanga bona engikwenzileko ngokuphila kwami bekuziindaba zami mathupha. Nokho, ekufundeni kwami iBhayibhili, ngalimuka bona ukuziphatha kwami kulimaza amazizo kaJehova. (IRhalani 78:40, 41; Iziyema 27:11) Godu ngabona bonyana kuyabalimaza nabanye abantu.

Njengombana ngiragela phambili nokuhlola iBhayibhili, ngafumana bona kuneenzathu ezinenqgondo nezikholisako zokukholelwa bona iliLizwi lakaZimu. Isibonelo, ngafunda iimporofido ezimbalwa eBhayibhilini ezizalisekileko—ezinembe ngendlela erarako. Ilwazelo lingisize bona ngiqede ukuzaza kwami kwangaphambili.

Pheze ngemva komnyaka ngifunde iBhayibhili, mina nababelethi bami savakatjhela umnakwethu omkhulu obekasisebenzi sokuzithandela e-ofisini legatja laboFakazi BakaJehova eGermany. Nengibona indlela umnakwethu ebekathabe ngayo, ngathinteka khulu. Ithabwelo bekungilelo ebe ngilifuna! Godu ngakarwa ngabanye aboFakazi abaziinsebenzi zokuzithandela lapho. Bebahluke khulu ebantwini egade ngizihlanganisa nabo abangakathembeki, abathanda ithabo. Msinyana ngemva kwalokho, ngathandaza ngehliziywami yoke kuJehova, ngimthembisa bona ngizomkhonza ipilwami yoke. Nengineemnyaka eli-19, ngabonakalisa ukuzinikela kwami kuJehova ngokubhabhadiswa.

INDLELA ENGAZUZA NGAYO: Nje, senginomnqopho wamambala ekuphileni. Ngifumana ithabo ekufundiseni abanye iBhayibhili, ngibasiza bona bafunde ngoJehova nangeenthembiso zakhe zesikhathi esizako. Ekhaya nabo bazuzile—abasatshwenyeki ngami.

Ngiyayazi iimtjhapho engayenza esikhathini esidlulileko, kodwana ngilinga bona ngingahlali kiyo. Kunalokho, ngidzimelele ekulibalelweni nguJehova nethandweni angibonisa lona. Ngehliziyo yami yoke ngivumelana namezwi weZiyema 10:22 athi: “Isibusiso sakaJehova—ngiso esinothisako, akangezeleli ubuhlungu kiso.”

[Umkhangiso osekhasini 10]

“Besikhamba amaphathi, siziphatha kumbi ngokomseme, sidla iindakamizwa sisela notjwala”

[Umkhangiso osekhasini 11]

“Ngiyayazi iimtjhapho engayenza esikhathini esidlulileko, kodwana ngilinga bona ngingahlali kiyo”