Nomsa: Namhlanje ngicoca nawo woke umuntu endaweni le ngephetjhaneli. Linesihloko esithi Ungathabela Ukulazi Iqiniso? Nasi ikhophi yakho.

Lindiwe: Limalungana nekolo?

Nomsa: Iye. Tjheja imibuzo esithandathu evezwe esigubuzesweni salo. Ngimiphi eminye yemibuzo le—

Lindiwe: Ngibawa ujame khona lapho. Uzabe uzimorosela isikhathi ngokukhuluma nami.

Nomsa: Kubayini utjho njalo?

Lindiwe: Iqiniso kukobana angiqiniseki bona ngiyakholelwa kuZimu.

Nomsa: Ngiyathokoza ngokukhuluma kwakho iqiniso. Ngingabuza, Uhlala uzizwa ngendlela le?

Lindiwe: Awa, ngakhula ngiya esondweni. Kodwana ngalisa ukuya khona esikhathini eside esidlulileko.

Nomsa: Ngiyakuzwa. Akhe ngizazise. Ibizo lami nginguNomsa.

Lindiwe: Mina nginguLindiwe.

Nomsa: Ngithabela ukukwazi, Lindiwe.

Lindiwe: Nami ngokufanako.

Nomsa: Angikezi la ukuzokukatelela iinkolelo zami kuwe, Lindiwe. Nokho kunokuthileko engifuna ukukwazi. Ikhona na into ngokukhethekileko ekwenza uzaze ukuba khona kwakaZimu?

Lindiwe: Iye. Umma wabandakanyeka engozini yekoloyi eminyakeni eli-17 edlulileko.

Nomsa: Kubuhlungu ukuzwa lokho. Walimala?

Lindiwe: Iye, warholophala kusukela lapho.

Nomsa: Lokho kuzwisa ubuhlungu. Kufuze bona kwakuphatha kumbi.

Lindiwe: Iye kwangiphatha kumbi. Kungebangelo ngizibuza ukuthi, Ngathana uZimu ukhona, bekazokuvumela njani lokhu kwenzeke? Kubayini uZimu asivumela sitlhage kangaka?

Nomsa: Ngiyawazwisisa amazizo nemibuzo yakho. Nesitlhagako, kuvamile ukuzibuza bona kubayini. Eqinisweni, ngitjho namanye amadoda nabafazi abathembekileko bangeenkhathi zeBhayibheli bebazibuza lokho!

Lindiwe: Kwamambala?

Nomsa: Iye. Kulungile na ukuthi ngikutjengise isibonelo eBhayibhelini?

Lindiwe: Ngingakuthabela lokho.

Nomsa: Tjheja lokho umphorofidi uRhabakhukhu akubuza uZimu, njengombana kutlolwe kuRhabakhukhu, isahluko 1, ivesi 2 no-3: ‘Kunini ngikubiza Jehova ngifunana nesizo kodwana soloko awuphenduli? Kufuze ngikurhuwelele kangangani ngifuna isizo emgurugurwini ophambi kwami, kodwana kubayini ungangisindisi? Kubayini ungibonisa ukungalungi?’ Imibuzo le ayizwakali ifana naleyo ozibuza yona?

Lindiwe: Iyafana.

Nomsa: UZimu akhenge amkhalime uRhabakhukhu ngokubuza kwakhe imibuzo leyo, nofana amtjele bona utlhoga ikholo elingeziweko.

Lindiwe: Ngiyezwa.

Nomsa: IBhayibheli ifundisa bona uZimu uyakubona ukutlhaga kwethu begodu kuyamtshwenya.

Lindiwe: Utjho ukuthini?

Nomsa: Ngibawa ukukutjengisa isibonelo esiku-Eksodusi 3:7. Ungakghona na ukufunda iveseli?

 Lindiwe: Kulungile. Lithi: “Godu uJehova wathi: ‘Ngambala ngibonile amatlhuwiso wabantu bami eGibhide. Ngisizwile isililo sabo ngebanga labatjhotjhozeli. Iye, ngiyalazi isizi labo.’”

Nomsa: Ngiyathokoza. Ngokomtlolo lo, uZimu uyabona na abantu bakhe nebatlhagako?

Lindiwe: Iye, kubonakala ngasuthi uyabona.

Nomsa: Akagcini ngokubona okwenzekako. Qala godu ingcenye yamaswaphela yeveseli. UZimu wathi: “Ngiyalazi isizi labo.” Kghani amezwi la azwakala njengavela kuZimu onganandaba nofana onganabuntu?

Lindiwe: Awa, akusinjalo.

Nomsa: UZimu akaboni imirarwethu kwaphela kodwana godu uyadana nesinemiraro.

Lindiwe: Uqinisile.

Nomsa: Ukhumbula lokho, akhe sifunde ngesinye isenzakalo lapho abantu bakaZimu bebatlhaga khona. Sitlolwe ku-Isaya 63:9. Ingcenye yokuthoma yeveseli ithi: “Kiwo woke amatshwenyekwabo naye watshwenyeka.” Ungatjho bona uZimu bewumthinta umtlhago wabantu bakhe?

Lindiwe: Iye, kuzwakala njalo.

Nomsa: Iqiniso Lindiwe kukobana, uZimu usikhathalela khulu, begodu uyakuhloya ukusibona sitlhaga. Nesizwa ubuhlungu, naye uzwa ubuhlungu.

Nomsa: Ngaphambi kobana ngikhambe, kukhona okhunye engifuna ukukuhlanganyela nawe.

Lindiwe: Kulungile.

Nomsa: Cabanga ngalokho iBhayibheli esifundisa khona ngamandla kaZimu. Ivesi elisemkhumbulwenami nguJoromiya 10:12. Ungayifunda?

Lindiwe: Iye. Ithi: ‘UZimu wenze iphasi ngamandlakhe, wasekela indawo ngokuhlakanipha kwakhe, wendlala amazulu ngelwazi lakhe.’

Nomsa: Ngiyathokoza. Akhe sicabange ngeveseli kancani. UZimu bekazokutlhoga amandla amakhulu bona abumbe indawo yoke nakho koke okukiyo?

Lindiwe: Iye kunjalo.

Nomsa: Kwanje, nengabe uZimu unamandla wokubumba zoke izinto ezisibhodileko, angeze na salindela bona abe namandla wokulawula indalwakhe?

Lindiwe: Iye singakulindela.

Nomsa: Cabanga godu ngommakho. Kubayini kukuzwisa ubuhlungu ukumbona atlhaga?

Lindiwe: Kungombana ngiyamthanda. Ngumma.

Nomsa: Nengabe bewunamandla wokumlapha namhlanjesi, bewuzomlapha?

Lindiwe: Iye bengizomlapha.

Nomsa: Cabanga bona lokho kutjho ukuthini. IBhayibheli ifundisa bona uZimu uyakubona ukutlhaga kwethu, uyasirhawukela, begodu unamandla amakhulu. Ngalokho akhe ucabange, kufuze bona kutlhoga ukuzibamba okungangani ngoZimu ngokungathathi igadango msinyana lokuqeda umtlhagwethu?

Lindiwe: Bengingakucabangi ngendlela leyo.

Nomsa: Awucabangi bona unebanga elizwakalako lokungangeneli msinyana aqede imirarwethu? a

Lindiwe: Hmm, ngicabanga bona unalo.

Nomsa: Ngizwa ifoni yakho iyalila, ngibawa ukubuya ngesinye isikhathi, sizokucoca ngendaba le ngokungeziweko.

Lindiwe: Ngiyathokoza. Ngingakuthabela lokho. b