“UZimu wezulwini uzakujamisa umbuso ongasoze wapheliswa namkha udluliselwe kabanye abantu. Uzakutshidlha bewuphelise yoke imibuso eminye, kodwana wona uzakujama nini nanini.”​—Danyela 2:44.

UmBuso kaZimu ungurhulumende wezulwini. UmBusi wawo okhethiweko, uJesu Krestu uzokuthatha isikhundla sababusi babantu begodu ukuzokuqinisekisa bona intando kaZimu iyenziwa ingasi ezulwini kwaphela kodwana nephasini. (Matewu 6:9, 10) Urhulumende lo ngeze ajanyiselelwe nginanyana ngimuphi urhulumende wabantu ngombana ‘mbuso ongapheliko weKosethu noMsindisi, uJesu Krestu.’ Ngokuqinisekileko kuzokuba nokuthula okungapheliko.​—2 Pitrosi 1:11.

“Ngitjho noSathana uyazitjhatjhanisa azenze ingilozi yokukhanya. Nje-ke akurari lokha iinceku zakhe nazo nazizitjhatjhanisako zizenze inga ziziinceku zokulunga. Isiphetho sazo sizakufanelana nezenzo zazo.”​—2 Korinte 11:14, 15.

Ikolo yamala izokuvezwa tjhatjhalazi imsebenzi kaDeveli begodu izokupheliswa ephasini. Ngeze kusaba nebandlululo elingokwekolo nokuphalazwa kweengazi. Lokhu kuzokwenza boke abantu abathanda “uZimu weqiniso nophilako” bona bamkhonze “ekukholweni kunye” begodu ‘ngomoya nangeqiniso.’ Qala bona lokhu kuzokuletha ukuthula nobunye kangangani!​—1 Thesalonika 1:9; Efesu 4:5; Jwanisi 4:23.

“UZimu ngokwakhe uzakuba nabo. Uzokwesula zoke iinyembezi emehlwenabo. Ukufa angekhe kusaba khona, ngitjho nokulila nobuhlungu angekhe kusaba khona ngombana izinto zokuthoma zidlulile.”​—IsAmbulo 21:3, 4.

UJehova uZimu wenza kwakghoneka ukufumana lokhu ngeNdodanakhe, uJesu, eyanikela ngokuphila kwayo ephasini ngebanga labantu. (Jwanisi 3:16) Ngaphasi kokunqotjhiswa nguJesu, abantu bazokuphelela. Ngeze kusaba khona umtlhago ngombana “uZimu ngokwakhe uzakuba nabo” begodu uzokusula “zoke iinyembezi emehlwenabo.” Msinyana ukungapheleli kwabantu nomtlhago kuzokuba zizinto zesikhathi esidlulileko; “abalungileko bazakuzuza inarha, bahlale kiyo nini nanini.”​—IRhubo 37:29.

“Yabamba [uJesu Krestu] unomrhaso okutjho inyoka endala yambopha ikulungwana yeminyaka, yamphosela ngemgodini onganamkhawulo, yamvalela ngci beyabeka iphawu phezu kwakhe khona angazubuya aluthe izizwe.”​—IsAmbulo 20:2, 3.

Yoke imithelela kaSathana izabe ingasekho lokha uSathana namadimoni babotjhwa begodu baphoselwa “ngemgodini onganamkhawulo,” ubujamo bokungenzi litho. Ngeze basasebenzisa ubumbi babo ukulawula abantu. Qala bona kuzokuba yipumuzo kangangani ukuphila ephasini elinganayo imithelela kaSathana nemimoya emimbi!

‘Imihla yokuphela’ izokuphela ngalokho uJesu akubiza ngokuthi ‘ziinhlupheko ezimbi.’ Wathi: “Ngombana iinhlupheko ngesikhatheso zizabe zizimbi khulu, zingalingani nalezo ezakhe zaba khona kusukela ekuthomeni kwephasi bekwaba kunjesi nezingasoze zaba khona godu.”​—Matewu 24:21.

Iinhlupheko zizokuba zimbi khulu ngomqondo wokobana kuzokuba neenhlekelele ezingakhange zibe khona. Lokhu kuzokuba yivuthondaba ‘epini yelanga elikhulu lakaZimu uMninimandlawoke’ eyaziwa ngokobana “yi-Arimagedoni.”​—IsAmbulo 16:14, 16.

Abantu kizo zoke iindawo abathanda okulungileko baqale phambili ekupheleni kwephasi lakaSathana elimbeli. Cabanga ngeembusiso ezimbalwa abazozifumana ngaphasi komBuso kaZimu.

“Isiqubuthu esikhulu” sizokungena ephasini elitjha elinokuthula: IliZwi lakaZimu lithi “isiqubuthu esikhulu” sabantu esingabalekikweso ‘sizokuphuma ekuhluphekeni okukhulu’ begodu singene siphila ephasini elitjha lokulunga. (IsAmbulo 7:9, 10, 14; 2 Pitrosi 3:13) Sizabe siphuluswe nguJesu Krestu, “iMvana kaZimu, esusa isono sephasi.”​—Jwanisi 1:29.

Ifundiso kaZimu izokuletha iinzuzo ezikulu: Ephasini elitjha, “iphasi lizakuzala ilwazi lakaSomnini [“uJehova,” NW].” (Isaya 11:9) Ifundiso kaZimu le izokuhlanganisa isinqophiso sendlela yokuphila ngokuthula nabantu boke begodu ngokuvumelana nobujamo. UZimu uyathembisa: “Mina Somnini [“Jehova,” NW] nginguZimakho okufundisako ukuze kukukhambele kuhle lokha nangikuhlahlako endleleni ekufanele uyikhambe.”​—Isaya 48:17.

Abantu esibathandako abafileko bazokuvuswa emathuneni: Nakasephasini, uJesu wavusa umnganakhe uLazaru ekufeni. (Jwanisi 11:1, 5, 38-44) Ngalokhu bekatjengisa lokho azokwenza ngezinga elikhulu ngaphasi kwelungiselelo lomBuso kaZimu.​—Jwanisi 5:28, 29.

Ukuthula nokulunga kuzokuhlala ngokungapheliko: Ngaphasi kobubusi bakaKrestu, ukungabi namthetho kuzokuba yinto edlulileko. Sikwazi njani lokho? Ngombana uJesu uyakwazi ukufunda iinhliziyo, begodu uzokusebenzisa ikghonwelo ukwahlulela hlangana kokulungileko nokumbi. Labo abangafuni ukutjhentjha iindlela zabo ezimbi angekhe bavunyelwe ukuphila ephasini elitjha lakaZimu.​—IRhubo 37:9, 10; Isaya 11:3, 4; 65:20; Matewu 9:4.

Sesifunde ngezimbalwa kwezinengi iimphorofido zeBhayibheli ezikhuluma ngesikhathi esimnandi esizako. UmBuso kaZimu newuletha ububusi ephasini, “ukuthula okukhulu” kuzokuhlala ngokungapheliko. (IRhubo 37:11, 29) Boke abanobangela bobuhlungu nomtlhago abatshwenya abantu angeze basaba khona. Singaqiniseka ngalokhu ngombana uZimu uyathembisa: “Qala, ngenza koke kube kutjha. . . . Amezwi la athembekile begodu aliqiniso.”​—IsAmbulo 21:5.