Ukucabanga ngokukhula kwami kubuyisa imikhumbulo emnandi endaweni ebesihlala kiyo ngendlini encani esewula yeFrance, lapho ababelethi bami bebahlala khona. Ubaba wangenzela umjinko, begodu bengikuthanda ukugijimagijima ngejarideni. Ngo-1966, aboFakazi bakaJehova basivakatjhela ekhaya begodu bacoca isikhathi eside nobaba. Ngemva kweenyanga ezilikhomba, wazimisela ukuba nguFakazi. Umma naye msinyana wamlandela, begodu bangikhulisela emndenini onethando.

Imirarwami yathoma msinyana ngemva kobana sibuyele eSpain, lapho ababelethi bami bavela khona. Ngathoma ukuzwa ubuhlungu bokuhlatjwa ezandleni zami neengogoriyaneni. Ngemva kweminyaka eembili ngisolo ngiya kibodorhodere, safumana udorhodere wamathambo odumileko, owathi, “Sekulada.” Umma wathoma ukulila. Ngezwa amagama angakajayeleki athi, “autoimmune chronic illness” nathi “juvenile polyarthritis,” *ngekumbeni ebesikiyo. Nanyana bekukuncani engikuzwisisako njengombana bengimntazinyana oneminyaka elitjhumi, kodwana ngalemuka bona lezi ziindaba ezingasimnandi.

Udorhodere wathi kufuze ngilatjhelwe esibhedlela sabantwana. Ekufikeni kwami ngadaniswa kubona umakhiwo wakhona. Nomthetho walapho bewuqinile: Abafazi besondo abangatjhadiko (nuns) bangiguda iinhluthu zami begodu bangimbathisa izambatho ezimbi. Ngilila ngapha ngicabanga, ‘Ngizoyikghodlhelelela njani ipilo yala?’

Ngombana ababelethi bami bebangifundisile ukukhonza uJehova, ngala ukuhlanganyela emasikweni wobuKatolika esibhedlela. Abafazi besondo abangatjhadiko (nuns) gade bangazwisisi bonyana kubayini ngala. Ngabawa uJehova bona angangilahli, begodu msinyana ngasizwa isivikelo sakhe, njengokwanga okuvela kubaba onethando.

Ababelethi bami bebavumelekile bona bangivakatjhele kancani ngaboMgqibelo. Bangiphathela iincwadi ezisekelwe eBhayibhelini bona ngifunde ukwenzela bonyana ngiqinise ukukholwa kwami. Ngokujayelekileko abantwana bebangavunyelwa bona babe  neencwadi zabo, kodwana ama-nun angivumela bona ngibe nazo neBhayibheli lami, ebengilifunda qobe langa. Godu ngakhuluma nabanye abantazana ngethemba lami lokuphila ngokungapheliko ePharadesi ephasini, lapho kungeze kusaba nomuntu ogulako. (IsAmbulo 21:3, 4) Nanyana ngezinye iinkhathi bengizizwa ngidanile begodu nginesizungu, bekungithabisa ukubona ukukholwa nokuthembela kwami kuJehova kuqina.

Ngemva kweenyanga ezide ezisithandathu, abodorhodere bangithumela ekhaya. Ukugula kwami bekungasingcono, kodwana kwangithabisa ukubuyela ebabelethini bami. Amalungwami agobana khulu, ngizwa nobuhlungu obukhulu. Ngangena eminyakenami yobutjha ngibuthakathaka khulu. Nokho, nengineminyaka eli-14, ngabhajadiswa, ngazimisela ukukhonza uBaba wezulwini ngendlela engingakghona ngayo. Nanyana kunjalo, ngezinye iinkhathi bengimbeka umlandu. Bengithandaza ngithi, “Kubayini lokhu kwenzeka kimi? Ngibawa ungilaphe.” “Awuboni bona ngizwa ubuhlungu kangangani?”

Iminyaka yobutjha beyibudisi khulu kimi. Bekufuze ngamukele bona ngeze ngibe ngcono. Bengingalisi ukuzimadanisa nabangani bami—abaphile kuhle nabathabela ukuphila. Bengizizwa ngingasililitho begodu ngineenhloni. Nanyana kunjalo, umndeni nabangani bami bangisekela khulu. Ngikhumbula u-Alicia—ongidlula ngeminyaka ema-20—owaba mnganami omkhulu. Wangisiza bona ngiqale ngale kokugula kwami begodu ngikhathalele abanye kunokobana ngidzimelele emirarwenami.

Nengineminyaka eli-18, ngezinye iinkhathi bengiba ngcono isikhatjhana bese ngithoma phasi godu, ngitjho nokuya emihlanganweni yobuKrestu bekungitjhiya ngiqobekile. Nanyana kunjalo, bengisisebenzisa kuhle “isikhathi sami sokuphumula” ekhaya bona ngifunde iBhayibheli. Incwadi kaJobhi neyamaRhubo zangisiza ngazwisisa bonyana kwanje uJehova uZimu usitlhogomela ngezinto ezingokomoya kunezingokwenyama. Ukuthandaza kwami qobe kwangilethela “amandla amakhulu” ‘nokuthula kwakaZimu okudlula koke ukuzwisisa.’—2 Korinte 4:7; Filipi 4:6, 7.

Nengineminyaka ema-22, kwafuze ngamukele bona kwanje ngibetjhelwe esitulweni sabarholopheko. Bengisaba bona abantu angeze basanginaka begodu bazokubona kwaphela isitulo sabarholopheleko nomfazi ogulako. Nanyana kunjalo, isitulwesi savuselela ukuzijamela kwami, begodu lokhu ebengicabanga bona kumbi kwaba sibusiso. Umnganami ibizo lakhe lingu-Isabel wathi ngizibekele imbagana yokusebenza naye ama-awara ama-60 emsebenzini wokutjhumayela inyanga yinye.

Ekuthomeni, ngacabanga bona udlala ngami. Kodwana ngabawa isizo kuJehova, begodu ngesekelo lomndeni nabangani, ngaphumelela. Inyanga emajadu leyo yadlula msinyana, begodu ngahlula koke ukusaba kwami nehlazo. Ngayithabela khulu kangangobana ngo-1996 ngaqunta ukuba liphayona lesikhathi esizeleko—ngisebenza ama-awara athileko ekonzweni qobe nyanga. Bekungesinye seenqunto ezihle engakhe ngasenza, esangitjhideza kuZimu begodu sangiqinisa ngokwenyama. Ukuba sekonzweni kwanginikela ithuba lokuhlanganyela nabanye lokho engikukholelwako nokusiza abanye babe bangani bakaZimu.

Ngehlobo lango-2001, ngaba sengozini embi yekoloyi begodu ngaphuka imilenze yombili. Njengombana ngilele esibhedlela ngizwa ubuhlungu obukhulu, ngathandaza buthule ngathi: “Ngiyakubawa Jehova, ungangitjhiyi!” Msinyana ngemva kwalokho, umfazi ogade alele embhedeni oseduze newami wangibuza, “UnguFakazi kaJehova na?” Benginganamandla wokumphendula, ngamane ngavuma ngehloko. Wathi, “Ngiyanazi! Ngihlala ngibafunda abomagazini benu.” Amezwi layo angiduduza khulu. Ngitjho nanyana bengisebujamweni obubuhlungu, ngakghona ukufakaza ngoJehova. Qala bona yintwehle kangakani le!

Nengibangconywana, ngaqunta ukufakaza ngokungeziweko. Umma bekangisunduza ngesitulo sabarholopheleko sibhode amawadi wesibhedlela ngifakwe isamende imilenze yombili. Qobe langa, besivakatjhela iingulani ezimbalwa, sizibuze bona zizizwa njani, sizitjhiyele iincwadi ezisekelwe eBhayibhelini. Ukuvakatjhokhu bekudinisa, kodwana uJehova wanginikela amandla ebengiwatlhoga.

 Eminyakeni embalwa edlulileko, ubuhlungu bami bangezeleleka nokuhlongakalelwa ngubaba kwangezelela ebuhlungwini bami. Nanyana kunjalo, ngalinga ukuba nombono omuhle. Njani? Bengilinga ngakho koke ukuba nabangani neenhlobo, begodu lokho bekungisiza ngingacabangi ngemirarwami. Nengingedwa, ngiyafunda, ngitaditjhe iBhayibheli, namtjhana ngitjhumayele kwabanye ngomtato.

Godu ngilinga ukuthabela izinto ezilula, njengokubetjhwa mumoya omnandi ebusweni namtjhana ukurhogela iphunga elimnandi lamabhlomu. Lokhu bekunginikela amabanga wokuthokoza. Ukuhleka nakho kwenza okukhulu. Ngelinye ilanga siyokutjhumayela, umnganami obekangisunduza ngesitulo sabarholopheleko wajama kancani bona atlole okuthileko. Kungakalindeleki ngazibona ngigedeka bengayokuqhula ekoloyini ejamileko. Sobabili sathukwa, kodwana nesibona bonyana akunalitho elikhulu elenzekileko, sahleka khulu.

Kunezinto ezinengi ekuphileni engingeze ngakghona ukuzenza. Ngizibiza ngokobana ziimfiso engisazilinde bona zizaliseke. Kanengi ngivala amehlo ngicabange ngephasi elitjha uZimu alithembisako. (2 Pitrosi 3:13) Ngizicabanga ngiphilile, ngikghona ukukhamba begodu ngithabela ukuphila ngokuzeleko. Ngikhumbula amezwi kaDavida athi: “Qalelela uSomnini, uqine, ihliziywakho ibe nesibindi.” (IRhubo 27:14) Nanyana umzimbami bewuba buthakathaka khulu, uJehova wangiqinisa. Ngaragela phambili ngifumana amandla ebuthakathakeni bami.