Newulalela iindaba zephasi, mhlamunye utjhejile bona izinto ezimbi ngezinye iinkhathi zenziwa ebizweni lekolo. Akusizo zoke iinkolo ezivela kuZimu weqiniso. (Matewu 7:15) Kwamambala, abantu abanengi bakhohlisiwe.—Funda yoku-1 Jwanisi 5:19.

Nanyana kunjalo, uZimu uyabatjheja abantu abathembekileko abathanda okuhle neqiniso. (Jwanisi 4:23) UJehova umema abantu abanjalo bona bafunde iqiniso eliZwini lakhe, iBhayibheli.—Funda yoku-1 Thimothi 2:3-5.

UJehova uZimu uhlanganisa abantu abavela eenkolweni ezinengi ngokubafundisa iqiniso nangokubafundisa ukuthandana. (Mikha 4:2, 3) Ngalokho, abantu abasekolweni yeqiniso ungababona ngendlela abatlhogomelana ngayo.—Funda uJwanisi 13:35.

Abakhulekeli beqiniso basekela lokho abakukholelwako nendlelabo yokuphila eBhayibhelini. (2 Thimothi 3:16) Bahlonipha ibizo lakaZimu. (IRhubo 83:19 [83:18, NW]) Bafundisa nokuthi umBuso kaZimu kuphela kwethemba labantu. (Danyela 2:44) Balingisa uJesu ngokuvumela ‘ukukhanya kwabo kukhanye,’ benze okuhle kibomakhelwana babo. (Matewu 5:16) AmaKrestu weqiniso angabonakala ngokuvakatjhela abantu emizinabo ngomnqopho wokuhlanganyela nabo iindaba ezimnandi zomBuso kaZimu.—Funda uMatewu 24:14; IzEnzo 5:42; 20:20.