ISIHLOKO ESINGAPHANDLE | INGA-KGHANI UZIMU UNENDABA NAWE?
UZimu Uyakududuza
“UZimu oduduza abadanileko, wasiduduza.” —2 KORINTE 7:6.
‘INdodana kaZimu . . . yangithanda beyanikela ipilwayo ngebanga lami.’—GALATIYA 2:20
OKWENZA ABANTU ABANENGI BAZAZE: Abantu abanengi ngitjho nanyana batlhoga ukududuzwa, bakubona kukukuba marhamaru ukubawa uZimu bona angenele abasize bakghone ukuqalana nemirarwabo. Omunye umfazi okuthiwa nguRaquel uthi, “Nengiqala inani labantu ephasini—nemiraro emikhulu abaqalana nayo, ukutshwenyeka kwami kubonakala kungasililitho kangangobana ngizaza nokubawa isizo kuZimu.”
OKUFUNDISWA LILIZWI LAKAZIMU: UZimu ungenele ngendlela ephawulekako bona asize begodu aduduze abantu. Woke umuntu namhlanjesi ephasini unesono asizuze njengelifa—ubhalelwa kuphila ngokuvumelana neemfuneko zakaZimu. Nokho, uZimu ‘wasithanda bewasithumela neNdodanakhe [uJesu Krestu] bona ibe mhlabelo oyihlawulo yezono zethu.’ (1 Jwanisi 4:10) Ngokufa kwakaJesu okumhlatjelo, uZimu wakwenza kwakghoneka ngathi bona silitjalelwe izono zethu, sibe nesazela esihlwengileko, nethemba lokufumana ukuphila okungapheliko ephasini elitjha elinokuthula. * Inga-kghani umhlatjelo loyo ngowabantu boke, namkha utjengisa ikareko uZimu anayo kuwe mathupha?
Cabanga ngompostoli uPowula. Umhlatjelo kaJesu wamtjhukumisela bona atlole lokhu: ‘Ngiphila ngokukholwa eNdodaneni kaZimu, eyangithandako beyanikela ipilwayo ngebanga lami.’ (Galatiya 2:20) Liqiniso, uJesu wahlongakala ngaphambi kobana uPowula abe mKrestu. Nanyana kunjalo, uPowula waqala umhlatjelo loyo njengesipho asinikelwa nguZimu mathupha.
Ukufa kwakaJesu okumhlatjelo kusisipho uZimu akunikela sona mathupha. Isiphweso sitjengisa indlela oqakatheke ngayo kuZimu. Singakunikela ‘ukududuzeka okungapheliko kanye nethemba elihle,’ begodu ‘sikuqinise ngawo woke umsebenzi omuhle kanye nangelizwi.’—2 Thesalonika 2:16, 17.
Nokho, uJesu wanikela ngokuphila kwakhe pheze eminyakeni ezi-2 000 edlulileko. Ngibuphi ubufakazi obukhona bokobana uZimu ufuna ukuba nobuhlobo nawe namhlanje?
^ isig. 5 Bona ufunde okungeziweko ngomhlatjelo kaJesu, qala isahluko 5 sencwadi ethi Khuyini Kwamambala Okufundiswa YiBhayibhili? egadangiswa boFakazi bakaJehova.
