Eksodusi 14:1-31
14 Nje-ke uJehova wathi kuMosi:
2 “Tjela ama-Israyeli bona kufuze abuyele emva ayokuhloma amatende phambi kwePi-Harhirothi, hlangana kweMigidoli nelwandle, aqale eBhali-Tsefoni.+ Kufuze ahlome amatende aqale iBhali-Tsefoni hlanu kwelwandle.
3 UFaro uzakuthi ngama-Israyeli, ‘Akhambakhamba enarheni ararekile. Awakghoni ukuphuma emmangweni.’
4 Ngizokuvumela uFaro bona abe nekani+ begodu uzowagijimisa, ngizokuphazimulisa igama lami ngokuhlula uFaro nawo woke amabuthwakhe,+ amaGibhide azokwazi ukuthi nginguJehova.”+ Nje-ke ama-Israyeli enza njalo.
5 Ngokukhamba kwesikhathi, uFaro ikosi yeGibhide wabikelwa bona abantu babalekile. Khonokho, yena neensebenzi zakhe bazisola ukuthi babakhambiseleni abantu,+ bathi: “Kubayini senze into le, satjhaphulula ama-Israyeli bona angasaba ziingqila zethu?”
6 Yeke walungisa iinkarana zakhe zepi, wathatha nabantu bakhe.+
7 Wathatha iinkarana zepi ezima-600 ezikhethekileko nazo zoke ezinye iinkarana zepi zeGibhide, enye nenye yazo inamasotja.
8 UJehova wavumela uFaro ikosi yeGibhide bona abe nekani begodu wagijimisa ama-Israyeli, kukulapho ama-Israyeli akhamba ngesibindi.+
9 Nje-ke amaGibhide agijimisa ama-Israyeli, zoke iinjomani zakaFaro ezidosa iinkarana zepi,+ amasotjakhe akhamba ngeenjomani namabuthwakhe bewabandamela njengombana ama-Israyeli akampe hlanu kwelwandle ngePi-Harhirothi aqale iBhali-Tsefoni.
10 UFaro nakatjhidelako, ama-Israyeli aphakamisa amehlo abona amaGibhide awagijimisa. Nje-ke ama-Israyeli athukwa, athoma ukulilela uJehova.+
11 Athi kuMosi: “Kghani bekunganamaliba eGibhide bona usilethe emmangweni sizokufela khona?+ Yintobani osenze yona le ngokusikhupha eGibhide?
12 Akhenge sikutjele na eGibhide sathi, ‘Silisa, sisebenzele amaGibhide’? Kungcono ukusebenzela amaGibhide kunokuthi siyokufela emmangweni.”+
13 Yeke uMosi wathi ebantwini: “Ningabi nevalo+ kodwana yibani nesibindi, namhlanjesi nizokubona indlela uJehova azonisindisa ngayo.+ AmaGibhide eniwabona namhlanjesi, angeze nisawabona.+
14 UJehova uzonilwela+ begodu nina nizokuthula nibukele.”
15 UJehova wathi kuMosi: “Kubayini usolo ungililela? Tjela ama-Israyeli arage nekhambo lawo.
16 Phakamisa intongakho, welulele isandla sakho phezu kwelwandle ulihlukanise, ukwenzela bona ama-Israyeli akhambe elwandle ehlabathini eyomileko.
17 Mina-ke ngizokuvumela amaGibhide bona abe nekani ukwenzela ukuthi anilandele begodu ngizoziphazimulisa ngoFaro, loke ibutho lakhe, iinkarana zakhe zepi namasotjakhe akhwela iinjomani.+
18 Nangiziphazimulisa ngoFaro, iinkarana zakhe zepi nangamajonakhe akhwela iinjomani, amaGibhide azokwazi ukuthi nginguJehova.”+
19 Nje-ke ingilozi kaZimu weqiniso+ ebeyikhamba phambi kwekampa yama-Israyeli yasuka yaya ngemva kwawo nesika yelifu ebeyiphambi kwawo yasuka yayokujama ngemva kwawo.+
20 Ilifeli belihlukanisa ikampa yamaGibhide nekampa yama-Israyeli.+ Ngakwelinye ihlangothi belimnyama, kwelinye likhanyisa ebusuku.+ AmaGibhide akhenge atjhidele kuma-Israyeli ubusuku boke.
21 UMosi walulela isandla sakhe phezu kwelwandle;+ uJehova wenza ilwandle labuyela emva ngokwenza bona kuvunguze umoya onamandla wepumalanga ubusuku boke. Wenza ihlabathi yelwandle yoma,+ wahlukanisa namanzi.+
22 Ama-Israyeli akhamba phakathi kwelwandle ehlabathini eyomileko,+ kukulapho amanzi aba njengeboda ngesidleni nangesinceleni.+
23 AmaGibhide abalandela begodu zoke iinjomani zakaFaro, iinkarana zakhe zepi namasotjakhe akhamba ngeenjomani abalandela angena phakathi kwelwandle.+
24 Ngamathathakusa,* uJehova waqala ikampa yamaGibhide esikeni yomlilo neyelifu+ bewenza amaGibhide ahlangahlangana.
25 Wakhupha amavili weenkoloyana zawo zepi ukwenzela bona kube budisi ukuzitjhayela, amaGibhide bekasolo athi: “Asibalekeleni ama-Israyeli ngombana uJehova uyawalwela.”+
26 Nje-ke uJehova wathi kuMosi: “Yelulela isandla sakho phezu kwelwandle, ukwenzela bona amanzi agubuzese amaGibhide, iinkarana zawo zepi namasotjawo akhamba ngeenjomani.
27 UMosi walulela isandla sakhe phezu kwelwandle, kuthe nakusako ilwandle labuyela ngendlela ebelingayo. AmaGibhide nakathi ayabaleka, uJehova wawaphosela phakathi kwelwandle.+
28 Amanzi agubuzesa iinkarana zepi namasotja akhamba ngeenjomani, nalo loke ibutho lakaFaro ebelingene elwandle lilandela ama-Israyeli.+ Akekho namunye owasindako.+
29 Kodwana ama-Israyeli akhamba ehlabathini eyomileko phakathi kwelwandle+ begodu amanzi aba njengeboda ngesidleni nangesinceleni.+
30 UJehova wasindisa ama-Israyeli esandleni samaGibhide+ mhlokho begodu ama-Israyeli abona amaGibhide ahlongakele eligwini lelwandle.
31 Ama-Israyeli nawabona ukuthi uJehova utjhabalalise amaGibhide ngamandlakhe amakhulu, athoma ukusaba uJehova, akholwa kuJehova nencekwinakhe uMosi.+
Imitlolo Ephasi
^ Kutjho pheze ngesimbi yesi-2 ekuseni bekube ngesimbi yesi-6 ekuseni.
