Eksodusi 37:1-29
37 Ngemva kwalokho uBhetsaleli+ wenza umFaji+ ngesigodo somunga. Bewumakhubhithi* amabili nesiquntu ubude, ulikhubhithi nesiquntu ububanzi, ukuphakama kufuze ube yikhubhithi nesiquntu.+
2 Wawunameka ngegolide elihlwengileko ngaphakathi nangaphandle begodu wenza umphetho wegolide magega nawo.+
3 Ngemva kwalokho wawenzela amasongo amane wegolide, wawanamathisela ngaphezu kweenyawo zawo ezine, amasongo amabili aba ngakwelinye ihlangothi begodu amanye amabili aba ngakwelinye ihlangothi.
4 Ngemva kwalokho, wenza iingodo ngomuthi womunga, wazinameka ngegolide.+
5 Wafaka iingodwezo emasongweni angemahlangothini womFaji ukwenzela bona umFaji uthwalwe ngazo.+
6 Wenza isivalo ngegolide elihlwengileko.+ Besimakhubhithi amabili nesiquntu ubude begodu silikhubhithi nesiquntu ububanzi.+
7 Ngemva kwalokho wenza amakherubhi amabili+ wawabumba ngegolide, wabeka elinye ekuthomeni kwesivalo elinye walibeka ekugcineni kwaso.+
8 Elinye ikherubhi belisekuthomeni kwesivalo, elinye lisekugcineni kwaso. Wenza womabili amakherubhi wawabeka ekugcineni kwaso.
9 Amakherubhi amabili la athabululela iimpiko zawo phezulu, avala isivalo ngeempiko zawo.+ Bewaqalene, ubuso bawo buqale phasi esivalweni.+
10 Wenza itafula ngomuthi womunga.+ Beyimakhubhithi amabili ubude, ilikhubhithi ububanzi begodu ilikhubhithi nesiquntu ukuphakama.+
11 Wayinameka ngegolide elihlwengileko begodu wenza umphetho wegolide magega nayo.
12 Ngemva kwalokho, wayenzela iplanka magega nayo, ububanzi bayo bebulingana nesandla* begodu wahlobisa umphethwayo ngegolide.
13 Wayenzela amasongo amane wegolide, wawafaka emakhoneni amane lapho bekuneenyawo khona.
14 Amasongo lawo bewaseduze neplanka ukwenzela abona asekele iingodo ezithwele itafula.
15 Ngemva kwalokho, wenza iingodo ngomuthi womunga, wazinameka ngegolide bona kuthwalwe ngazo itafula.
16 Ngemva kwalokho, wenza izitja ebezisetafuleni ngegolide elihlwengileko: Izitja zayo, iinkomitji zayo, iinkotlelo zayo namajegayo ebekuthelwa ngazo iminikelo yeenselo.+
17 Wenza ilithi lesibani+ ngegolide elihlwengileko, walikhanda. Isisekelo salo, isiqu salo, amathuthumbalo abumbeke njengamathuthumbo we-almondi, iinqumbe zalo namathuthumbalo, bekuyinto yinye.+
18 Iimpande ezisithandathu beziphuma esiqwini saso, iimpande ezintathu zelithi lesibani bezingakwelinye ihlangothi bese kuthi nangakwelinye ihlangothi kube neempande ezintathu.
19 Epandeni yinye bekunamathuthumbo amathathu abumbeke njengamathuthumbo we-almondi, kuneenqumbe namathuthumbo kulandelana, bekunjalo nangakwelinye ihlangothi lepande. Ngilokhu okwenziwako eempandeni ezisithandathu eziphuma esiqwini selithi lesibani.
20 Esiqwini selithi lesibani bekunamathuthumbo amane abumbeke njengamathuthumbo we-almondi, kuneenqumbe namathuthumbo ngokulandelana.
21 Ngaphasi kweempande ezimbili zokuthoma eziphuma esiqwini bekunequmbe, kuthi ngaphasi kweempande ezimbili ezilandelako kube nequmbe nangaphasi kweempande ezimbili ezilandelako kube nequmbe, kwaba njalo kizo zoke iimpande ezisithandathu eziphuma esiqwini selithi lesibani.
22 Iinqumbe, iimpande nalo loke ilithi lesibani kwenziwa ngesiqetjhana sinye esikhandiweko segolide elihlwengileko.
23 Wenzela ilithi lesibani iimbani ezilikhomba,+ iincimasibani zalo nezinto zokuphatha umlilo ngegolide elihlwengileko.
24 Walenza nezitja zalo zoke ngetalende* legolide elihlwengileko.
25 Nje-ke wenza i-aldara lephepho+ ngomuthi womunga. Belisikwere, lilikhubhithi ubude, lilikhubhithi ububanzi, limakhubhithi amabili ukuphakama. Iimpondo zalo bezifana nalo.+
26 Walinameka ngegolide elihlwengileko phezulu, ngemaqadi neempondweni zalo, walenzela nomphetho wegolide magega nalo.
27 Wenza amasongo amabili wegolide ngaphasi komphetho emahlangothini womabili bona abambe iingodo ekuthwalwa ngazo i-aldara.
28 Ngemva kwalokho, wenza iingodo ngomuthi womunga, wazinameka ngegolide.
29 Wenza namafutha acwengileko wokuzesa+ nepepho ehlwengileko enuka kamnandi,+ ehlanganiswe ngendlela ekuhlanganiswa ngayo iinthako.
Imitlolo Ephasi
^ Ikhubhithi belilingana namasentimitha ayi-44.5. Qala Isith. B14.
^ Bebungaba masentimitha ayi-7.4. Qala Isith. B14.
^ Italende beyilingana namakhilogremu ayi-34.2. Qala Isith. B14.
