IsAmbulo Esiya KuJwanisi 11:1-19
11 Nganikelwa umhlanga wokulinganisa*+ njengombana kuthiwa kimi: “Sikima ulinganise indawo ecwengileko yethempeli lakaZimu ne-aldara nalabo abalotjha kilo.
2 Kodwana malungana nesirhodlo esingaphandle kwendawo ecwengileko yethempeli, silise ungasilinganisi ngombana sinikelwe iintjhaba, zizoligadanga ngeenyawo idorobho elicwengileko+ iinyanga ezima-42.+
3 Ngizokubangela bona abofakazi bami ababili baphorofide bambethe imigodla amalanga ayi-1 260.”
4 Laba bafanekiselwa mimithi emibili ye-oliva+ namalithi amabili weembani+ begodu bajame phambi kweKosi yephasi.+
5 Nangabe kunomuntu ofuna ukubalimaza, kuphuma umlilo emlonyenabo uqede izitha zabo. Nangabe kunomuntu ofuna ukubalimaza, kufuze abulawe ngendlela le.
6 Laba banamandla wokuvala umkayi+ bona izulu lingani+ hlangana namalanga wokuphorofida kwabo begodu banamandla phezu kwamanzi ukuthi bawatjhugulule abe ziingazi+ nokubetha iphasi ngayo yoke imihlobo yeembetho kanengi ngendlela abathanda ngayo.
7 Nasele baqede ukufakaza kwabo, isibandana esikhuphuka siphuma emgodini onganamkhawulo sizokulwa nabo sibahlule besibabulale.+
8 Iindumbu zabo zizokuba sendleleni ekulu yedorobho elikhulu elibizwa ngokuthi yiSodoma neGibhide ngomqondo ongokomfanekiso, lapho iKosabo yabulawelwa khona esigodweni.
9 Abantu beenhlanga ezihlukahlukeneko, iinkoro, amalimi neentjhaba bazokuqala iindumbu zabo amalanga amathathu nesiquntu,+ bangavumi bona iindumbu zabo zibulungwe emathuneni.
10 Labo abahlala ephasini bayathaba ngabo begodu bagidinge, bazokuthumelana izipho ngombana abaphorofidi ababilaba babahlunguphaza labo abahlala ephasini.
11 Ngemva kwamalanga amathathu nesiquntu, ummoya wokuphila ovela kuZimu wangena kibo,+ bajama ngeenyawo, labo abababonako bafikelwa kukwesaba okukhulu.
12 Bezwa ilizwi elikhulu livela ezulwini lithi kibo: “Yizani lapha.” Bakhuphukela ezulwini ngelifu, izitha zabo zababona.*
13 Nge-irelo kwaba nokusikinyeka kwephasi okukhulu, ingcenye yetjhumi yedorobho yawa; abantu abazii-7 000 babulawa kusikinyekokho, abanye basaba begodu baphazimulisa uZimu wezulwini.
14 Umaye wesibili+ udlulile. Qala! Umaye wesithathu uyeza msinyana.
15 Ingilozi yekhomba yabetha ibhorompitayo.+ Kwazwakala namezwi amakhulu ezulwini, athi: “Umbuso wephasi ube mBuso weKosethu+ nokaKrestu wayo,+ uzokubusa njengekosi bekube nini nanini.”+
16 Abadala abama-24+ ebebahlezi phambi kwakaZimu eenhlalweni zabo zobukhosi bakhothama ngobuso babo balotjha uZimu,
17 bathi: “Siyakuthokoza Jehova* Zimu, Mninimandla Woke, loyo okhona+ nobekakhona ngombana uthethe amandlakho amakhulu wathoma ukubusa njengekosi.+
18 Kodwana iintjhaba zaba nelaka, kwafika ilaka lakho, kwafika isikhathi esibekiweko lapho kuzokwahlulelwa abafileko nokunikela iinceku zakho abaphorofidi+ nabacwengileko umvuzo+ nalabo abasaba igama lakho, abancani nabakhulu nokutjhabalalisa labo abatjhabalalisa iphasi.”+
19 Indawo ecwengileko yethempeli lakaZimu ezulwini yavulwa, kwabonakala umfaji wesivumelwano sakhe usendaweni ecwengileko yethempeli.+ Kwaba nokuphazima kombani, amezwi, ukuduma kwezulu, ukusikinyeka kwephasi nesinanja esikhulu.
