Incwadi KaJuda 1:1-25
1 UJuda isigqila sakaJesu Krestu begodu omfowabo kaJakopo,+ kilabo ababiziweko+ abathandwa nguZimu uBaba nababekelwe uJesu Krestu:+
2 Kwanga ningandiselwa isirhawu, ukuthula nethando.
3 Bathandekako, nanyana bengenza koke engingakwenza bona nginitlolele ngesindiso esiyihlanganyelako,+ ngikubone kutlhogeka ukunitlolela bonyana nginikhuthaze ukuthi nikulwele ngamandla ukukholwa+ okunikelwe abacwengileko kwaba kanye kwaphela.
4 Nginitlolele ngebanga lokobana kunabantu abathileko abangene ngokukhukhutha hlangana nani, labo ebebakhethelwe kade isahlulelwesi ngemiTlolo. Bababantu abangamsabiko uZimu, abajika umusa omkhulu kaZimethu bawenze ibanga lokwenza amanyala bangabi neenhloni*+ begodu bazibonakalise banamala eKosinethu okungiyo kwaphela eyasithengako, uJesu Krestu.+
5 Nanyana nizazi kuhle tle zoke izintwezi, ngifuna ukunikhumbuza bona uJehova* wasindisa isitjhaba enarheni yeGibhide,+ ngemva kwalokho watjhabalalisa labo abangatjengisi ukuthi bayakholwa.+
6 Neengilozi ezingakhenge zihlale esikhundleni sazo sekuthomeni kodwana zatjhiya indawazo yokuhlala efaneleko,+ uzibeke ngokubotjhwa kwasafuthi ebumnyameni obukhulu bekufike isahlulelo sazo ngelanga elikhulu.+
7 ISodoma neGomora namadorobho ayibhodileko yenza okufanako, yazinikela ekuziphatheni kumbi ngokomseme* okunyenyisako begodu yalandela iinkanuko zenyama ezingasingezemvelo,+ iindawezi zibekwe phambi kwethu njengesibonelo esisiyeleliso ngokufumana isigwebo sokwahlulelwa somlilo ongapheliko.+
8 Naphezu kwalokhu, abantwaba nabo bazitika ngamabhudango, basilaphaza inyama, badelela abaphetheko begodu bakhuluma kumbi ngabaphazimulako.+
9 Kodwana lokha uMikhayeli+ ingilozi ekulu+ aphikisana noDeveli, baphikisana ngesidumbu sakaMosi,+ wathobeka, akhenge amahlulele ngamezwi amambi+ kodwana wathi: “Kwanga uJehova* angakukhalima.”+
10 Kodwana abantwaba bakhuluma kumbi ngazo zoke izinto abangazizwisisiko.+ Kizo zoke izinto abazizwisisa ngemizwa yemvelo enjengeyeenlwana ezinganangqondo,+ baragela phambili bazonakalisa.
11 Kumbi khulu ngabo ngombana balandele indlela kaKayini+ begodu bagijimela ekambweni yokona kaBhalami+ bona bafumane umvuzo, batjhabalele ekulumweni yokuvukela+ kaKhorarhi!+
12 Laba bamadwala afihleke ngaphasi kwamanzi eminyanyenenu yethando+ kukulapho badla nani, babelusi abazondla bona ngokwabo ngaphandle kokusaba,+ bamamafu anganazulu aphetjhulwa mumoya,+ bamimithi engananthelo ngesiruthwana, efe ukufa begodu yaruthulwa,
13 bamagagasi welwandle anamandla abhubhudlha amahlazwawo,+ baziinkwekwezi ezinganakambiso ebekiweko, ezibekelwe ubumnyama obunzima tshu ngokungapheliko.+
14 Umuntu wekhomba ukusuka ku-Adamu, u-Inogo,+ naye waphorofida ngabo nakathi: “Qalani! UJehova* weza namatjhumi weenkulungwana zeengilozi zakhe ezicwengileko+
15 bona akhuphe isahlulelo kibo boke+ begodu abathwese umlandu boke abangamsabiko malungana nazo zoke izenzo zabo zokungamsabi uZimu abazenzileko namalungana nazo zoke izinto ezithusako izoni ezingamsabiko uZimu ezizikhulumileko ngaye.”+
16 Abantwaba bayabubula,+ abaneliseki ngalokho abanakho, balandela iimfiso zabo+ begodu imilomabo ikhuluma izinto zokuzigqaja okukhulu, kukulapho babuka abanye ukuthi kuzuze bona.+
17 Malungana nani bathandekako, khumbulani amezwi abikezelwa bapostoli beKosethu uJesu Krestu
18 ukuthi bebajayele kangangani ukutjho lokhu kini: “Emihleni yokuphela kuzokuba nabanyefuli, balandela iimfiso zabo zokungasabi uZimu.”+
19 Laba ngibo ababanga ukuhlukana,+ babantu abanobulwana, abanganawo ummoya kaZimu.
20 Kodwana nina bathandekako, zakheni ekukholweni kwenu okucwengeke khulu begodu nithandaze ngommoya ocwengileko,+
21 ukuthi niqiniseke bona nihlala nithandwa nguZimu,+ kukulapho nilinde isirhawu seKosethu uJesu Krestu ngombono wokuphila okungapheliko.+
22 Godu ragelani phambili nibarhawukela+ labo abazazako,+
23 nibasindise+ ngokubadzwebula emlilweni. Kodwana ragelani phambili nirhawukela abanye, nikwenze ngokusaba, kukulapho ninyenya ngitjho nesambatho esinindwe ngenyama.+
24 Nje-ke kiloyo okghona ukunivikela ekuweni begodu anenze nihlale ninganabala+ phambi kwephazimulwakhe* ngethabo elikhulu,
25 kuZimu ekunguye kwaphela uMsindisethu ngoJesu Krestu iKosethu, akube yiphazimulo, ubukhulu obubabazekako, amandla nokubusa kizo zoke iinkhathi ezidlulileko, nje nangokungapheliko. Amen.
Imitlolo Ephasi
^ NgesiGirigi, a·sel′gei·a. Qala Ihlathululo.
^ Qala Ihlathululo.
^ Namkha “ekubeni khona kwakhe okuphazimulako.”
