Ge ke be ke sa le ngwana ke be ke tsena kereke ya Katholika kua Rochester, New York. Batswadi ba ka ba kgaogane ge ke be ke na le mengwaga e seswai. Ke be ke dula le mma yoo a bego a dula lefelong leo go bego go dula batho ba badiitšana gomme mafelobekeng ke be ke etela tate yoo a bego a dula moo go dulago batho bao ba bego ba na le sa bona. Ge ke be ke bona mma yoo a bego a thatafalelwa ke go godiša bana ba tshela, ke ile ka ipotša gore ke nyaka go tlo huma gore ke tle ke mo thuše.

 Ka ge tate a be a nyaka ke atlega mo bophelong, o ile a nnyakela sekolo sa maemo a godimo gore ke yo ithutela go ba molaodi wa hotele. Ke ile ka se rata gomme ka nyaka go tsena moo ka ge ke be ke bona e le tsela yeo Modimo a bego a araba dithapelo tša ka tša gore ke tle ke thabe le go huma. Ke feditše mengwaga e mehlano ke ithutela go ba molaodi wa hotele, ke ithuta ka melao ya kgwebo le kamoo tšhelete ya kgwebo e dirišwago ka gona e bile ke šoma hoteleng yeo e nago le casino kua Las Vegas, Nevada.

 Ge ke be ke na le mengwaga e 22, ke be ke le mothuši wa motlatši wa mopresidente wa hotele yeo e nago le casino. Ke be ke lebelelwa ke le mohumi e bile ke atlegile. Gantši ke be ke ipshina ka go ja dijo tša maemo a godimo le go nwa mabjala le diwaene tša go tura kudu. Bagwera ba ka bao e bego e le bo rakgwebo ba be ba mpotša gore: “O se ke wa lebala gore tšhelete e bohlokwa kudu bophelong.” Go bona, selo seo se bego se tliša lethabo la nnete e be e le tšhelete.

 Mošomo wa ka e be e le go hlokomela batho bao ba bego ba humile kudu, bao ba bego ba tlile Las Vegas go tlo petšha. Le ge ba be ba humile kudu, ba be ba bonagala ba se ba thaba. Le nna ke ile ka thoma go se sa thaba. Ge ke be ke thoma go huma kudu ke ile ka thoma go tshwenyega le go se sa robala. Le gona ke ile ka thoma go nyaka go ipolaya. Ka ge bophelo bja ka bo be bo hlakahlakane, ke ile ka thoma go rapela gomme ka botšiša Modimo gore, “Nka hwetša kae lethabo la nnete?”

 Ka nako yeo, Diana (sesi yo mogolo) le Melina (sesi wa bone) e lego bosesi ba ka bao e bego e le Dihlatse tša Jehofa ba ile ba hudugela Las Vegas. Le ge ke be ke gana go amogela dikgatišo tša bona, eupša ke ile ka dumela go ithuta Beibele le bona. Ka Beibeleng ya ka, mantšu a Jesu a be a ngwadilwe ka mmala o mokhwibidu. Ka ge ke be ke amogela mantšu ka moka ao Jesu a bego a a bolela, bosesi ba ka ba ile ba nthuta kudu ka ona. Le gona, ke be ke bala Beibele ke nnoši.

 Dilo tše dintši tšeo ke bego ke di bala di ile tša mmakatša kudu. Ka mohlala, Jesu o itše: “Ge o rapela, o se ke wa boaboetša dilo tše di swanago, go etša ge batho ba ditšhaba ba dira, gobane ba akanya gore ba tla kwewa ka go diriša ga bona mantšu a mantši.” (Mateo 6:7) Le gona, moruti o be a mphile seswantšho sa Jesu gomme a mpotša gore ge nka rapela seswantšho seo, ke boaboetša thapelo ya “Tate Wešo wa Magodimong” le ya go “Hlompha Maria” ka makga a lesome, Modimo o be a tlo mpha tšhelete e nngwe le e nngwe yeo ke e nyakago. Eupša ke ile ka lemoga gore ge nka boaboetša mantšu ao a lego dithapelong tšeo, ke tla be ke boaboetša mantšu ao a ka se nthušego ka selo. Le gona, ke ile ka bala mantšu a Jesu ao a rego: “Le se ke la bitša motho mo lefaseng la re tate, gobane Tatago lena ke o tee, Yo a lego legodimong.” (Mateo 23:9) Ka gona ke ile ka ipotšiša gore: ‘Ke ka baka la’ng nna le batho ba bangwe bao ba tsenago kereke ya Katholika re re moruti wa rena ke “Tate”?’

 Ke ile ka thoma go naganišiša ka seo ke bego ke se dira bophelong ge ke be ke bala puku ya Jakobo ka Beibeleng. Go kgaolo 4, Jakobo o ngwadile gore: “Na ga le tsebe gore go gwerana le lefase ke bonaba go Modimo? Ka gona mang le mang yo a nyakago go ba mogwera wa lefase o itira lenaba la Modimo.” (Jakobo 4:4) Ke ile ka makala kudu ge ke be ke bala temana ya 17 yeo e rego: “Ge e ba motho a tseba go dira seo se lokilego, fela a sa se dire, gona o dira sebe.” Ke ile ka founela bosesi gomme ka ba botša gore ke tlogela go šoma hoteleng yeo e nago le casino ka ge ke be ke dira dilo tšeo di bego di sa amogelege, go swana le go petša le go nyaka go ba le tšhelete e ntši.

 Ke be ke nyaka go ba le segwera se sebotse le Modimo, le batswadi ba ka le bana bešo. Ke ile ka nolofatša bophelo bja ka e le gore ke kgone go dira seo. Eupša go dira diphethogo go be go se bonolo. Ka mohlala, ke ile ka tshepišwa mošomo wa maemo a godimo hoteleng yeo e nago le casino. Mošomo woo o be o tlo dira gore ke hwetše tšhelete yeo e fetago yeo ke bego ke e gola gabedi goba gararo. Eupša ka morago ga gore ke rapele ka taba ye, ke ile ka phetha ka gore ga ke sa nyaka go phela bophelo bja mohuta wo. Ke ile ka tlogela mošomo gomme ka lokiša garage ya bomma e le gore ke kgone go thoma kgwebo e nyenyane ya go khabara di-menu ka dipolasitiki.

 Le ge Beibele e be e nthušitše gore bophelo bja ka bo be kaone, ke be ke sa ye lefelong leo Dihlatse tša Jehofa di bokanago go lona. Bosesi ba ile ba mpotšiša gore ke ka baka la eng ke hloile Dihlatse tša Jehofa. Ke ile ka araba ka gore: “Ke ka gobane Modimo wa lena e lego Jehofa, o nyaka gore malapa a arogane. Nako feela yeo nka bago le lena ke ka Keresemose le ka matšatši a matswalo, eupša lena ga le keteke matšatši ao.” Yo mongwe wa bosesi ba ka o ile thoma go lla gomme a mpotšiša gore: “Matšatši a mangwe mo ngwageng o ba o le kae? Re nyaka go ba le wena neng le neng, eupša wena o nyaka go ba le rena ka matšatši ao feela le gona ka gobane o gapeletšega.” Mantšu a gagwe a ile a nkgoma pelo gomme le nna ka thoma go lla.

 Ge ke be ke bona gore Dihlatse tša Jehofa di rata malapa a gabo tšona le go bona gore ka nnete ga di aroganye malapa, ka letšatši le lengwe ke ile ka di etela lefelong leo di bokanago go lona leo le bitšwago Holo ya Mmušo. Ge ke be ke le moo, ke ile ka kopana le Kevin yoo a nago le bokgoni bja go ruta Beibele gomme a thoma go ithuta Beibele le nna.

 Kevin le mosadi wa gagwe ba be ba phela bophelo bjo bobotse e bile ba se na dilo tše dintši. Ba be ba kgona go fetša nako ya bona e ntši ba thuša batho ba bangwe gore ba kwešiše Beibele. Tšhelete yeo ba bego ba na le yona e ile ya ba thuša gore ba etele naga ya Afrika le Central America, moo ba bego ba thuša go aga diofisi tša makala tša Dihlatse tša Jehofa. Ba be ba thabile kudu e bile ba ratana. Ke ile ka ipotša gore, ‘Bjo ke bophelo bjoo ke nyakago go bo phela.’

 Kevin o ile a mpontšha bidio yeo e bontšhago kamoo a ipshinago ka gona ge a hlankela Jehofa modirong wa boromiwa, gomme ke ile ka phetha ka gore se ke se ke nyakago go se dira. Ka 1995, ka morago ga gore ke ithute Beibele ka mo go tseneletšego ka dikgwedi tše tshela, ke ile ka kolobetšwa gore ke be yo mongwe wa Dihlatse tša Jehofa. Go e na le gore ke kgopele Modimo gore a mphe mahumo, ke ile ka rapela ka gore: “O se nnee bodiidi goba mahumo.”—Diema 30:8.

 Gona bjale ga ke sa le mohumi ka gobane ga ke sa na tšhelete e ntši, eupša ke mohumi ka gobane ke na le segwera se sebotse le Modimo. Ke ile ka kopana le mosadi wa ka Nuria, kua Honduras. Ke moka ra ba baromiwa Panama le kua Mexico. Ruri Beibele e bolela nnete ge e re: “Tšhegofatšo ya Jehofa e a humiša, ga a e okeletše ka bohloko”!—Diema 10:22.