Ka letšatši le lengwe Bob o be a otlela ka lebelo la dikhilomithara tše e ka bago tše 100 kua Alberta, Canada, ke moka leotwana la koloi ya gagwe la morago la thunya. Ka letšatši leo go be go tonya kudu. Eupša Bob o ile a se tsebe gore go diregile eng, ke moka a no kgetha go tšwela pele a otlela ka ge go be go šetše dikhilomithara tše hlano gore a fihle gae.

 Lengwalong leo Bob a ilego a le ngwala ke moka a le romela Holong ya Mmušo ya Dihlatse tša Jehofa ya lefelong leo, o hlalositše seo se diragetšego. O ngwadile gore: “Bafsa ba bangwe ba bahlano ba Dihlatse tša Jehofa ba ile ba otlela kgauswi le nna ke moka ba bula lefasetere gore ba mpotše gore leotwana la koloi ya ka le thuntšhitše. Re ile ra ema ka thoko ga tsela ke moka bona ba re ba tla ntsenyetša le lengwe. Ka nako yeo ke be ke sa tsebe ge e ba ke na le leotwana le lengwe la koloi goba jeke. Ge ke be ke dutše ka thoko ga tsela godimo ga wheelchair ya ka, ba ile ba tsena ka fase ga koloi ke moka ba hwetša jeke le leotwana le lengwe gomme ba ntsenyetša lona. Go be go tonya kudu, le lehlwa le be le ena. Ba be ba apere gabotse mara ba no nthuša gore ke kgone go tšwela pele ka leeto. Ke be nka se kgone go dira dilo tšeo ka moka ke nnoši.

 “Ruri ke leboga bana bao ba bahlano ba Dihlatse tša Jehofa ge ba kgonne go nthuša. Ba be ba le tseleng ya go ya ka ntlo le ntlo go yo ruta batho ka Beibele. Ka nnete bana ba ba diriša seo ba se rutago. Ga ke tsebe gore nkabe ke le kae ge e be e se ka bona. Ruri ke tloga ke leboga seo ba ntiretšego sona. Ke ile ka ikwa okare Modimo o be a ba rometše gore ba tle ba nthuše letšatšing leo.”