Modiro wa rena wa boboledi o thekgwa kudu ka ditšhelete ke meneelo ya boithatelo yeo e tšwago go Dihlatse tša Jehofa. a Dibokeng tša rena ga go ntšhiwe dikoleke, le gona ga se gwa letelwa gore ditho tša phuthego di ntšhe karolo ya lesome. (Mateo 10:7, 8) Go e na le moo, mafelong a rena a diboka go na le mapokisi a meneelo e le gore ge e ba motho a kganyoga go neela a ka dira bjalo. Ga go bolelwe maina a bao ba ntšhago meneelo.

Lebaka le lengwe la gore re kgone go hlokomela ditšhelete tša rena gabotse ke gore ga re na baruti bao ba lefšago. Go oketša moo, Dihlatse ga di lefše gore di ye ka ntlo le ntlo le gona mafelo a rena a borapedi ga se a mabaibai.

Meneelo le ge e le efe yeo e romelwago diofising tša makala a Dihlatse tša Jehofa e dirišetšwa go thuša bao ba wetšwego ke dikotsi tša tlhago, go hlokomela baromiwa ba rena le badiredi ba basepedi, go thuša go aga mafelo a rena a borapedi dinageng tšeo di diilago le go gatiša Dibeibele le dikgatišo tše dingwe tša Bokriste gotee le go di romela mafelong a mangwe.

Motho yo mongwe le yo mongwe o dira phetho ya ge e ba a nyaka go ntšha moneelo wa go lefelela ditshenyagalelo tša lefelong la gabo, tša modiro wa rena wa lefaseng ka bophara goba ka bobedi. Ka mehla phuthego e nngwe le e nngwe e nea ditho tša yona pego ya ditšhelete.

• Mapokisi a meneelo: O ka tsenya tšhelete goba tšheke ka mapokising a meneelo ao a lego Diholong tša Mmušo, Diholong tša Kopano goba mafelong a mangwe moo diboka tša rena di swarelwago gona.

• Go diriša Inthanete: Dinageng tše dintši o ka diriša karolo yeo e rego “Go Ntšhetša Dihlatse tša Jehofa Moneelo” gore o ntšhe moneelo o diriša credit card, debit card, o romela tšhelete ka panka o diriša inthanete le mekgwa e mengwe. b Dihlatse tša Jehofa tše dingwe di beela “se sengwe ka thoko” kgwedi e nngwe le e nngwe ka go neela di diriša o mongwe wa mekgwa ye.—1 Bakorinthe 16:2.

• ● Go rulaganya go tlo neeela: Mekgwa e mengwe ya go ntšha moneelo e nyaka gore motho a rulaganye e sa le pele goba a nyake keletšo go boramolao. Go rulaganya ka tsela yeo go ka go thuša gore o se ke wa tla wa ntšha tšhelete e ntšhi kudu ya tax. Batho ba bantši ba holegile kudu ka go ithuta ka mekgwa e mengwe ya go ntšha meneelo yeo motho a ka e ntšhago a sa phela goba ya tla ya ntšhiwa ka morago ga gore a hlokofale. Hle ikgokaganye le ofisi ya lekala ya Dihlatse tša Jehofa ya nageng ya geno ge e ba o nyaka go tseba ka:

  • ● diakhaonto tša panka

  • ● inšorense le ditšhelete tša phenšene

  • ● dintlo

  • ● tšhelete yeo e bolokilwego

  • ● di-will le dithoto tše dingwe

Ge o nyaka go tseba ka mekgwa e mengwe yeo o ka e dirišago go ntšha moneelo nageng ya geno, eya karolong yeo e rego “Go Ntšhetša Dihlatse tša Jehofa Moneelo.”