Dihlatse tša Jehofa di lebelela Beibele e le bohlokwa kudu go feta puku le ge e le efe. Di e ithuta yona ka mehla le go e diriša go ruta ba bangwe ditaba tše dibotse tša Mmušo wa Modimo. (Mateo 24:14) Ka ge Dibeibele tša tšona di dirišwa ka mehla, se se dira gore di hlagale ka pela. Ka gona, Dihlatse di dirile maiteko a magolo go kgonthišetša gore Phetolelo ya Lefase le Lefsa ya Mangwalo a Makgethwa e kaonefaditšwego ya 2013 e be e bogegago le go se hlagale ka pela.

Go be go nyakega gore Beibele ye e mpsha e tie. Ge baemedi ba Dihlatse bao ba šomago mafelong a go gatiša dipuku le dipukwana kua Wallkill, New York, U.S.A., ba be ba kopane le molaodi yo mongwe wa khamphani yeo e dirago dipuku ba boledišana le yena ka maikemišetšo a bona a go tšweletša Beibele ye, molaodi yoo o ba boditše gore: “Ga go kgonege go dira Beibele yeo le e nyakago.” O okeditše ka gore: “Ke therešo gore Dibeibele tše dintši di diretšwe gore di bogege ge di le tafoleng goba rakeng ya dipuku—eupša seo se nyamišago ke gore ga se tša tia.”

Dikgatišo tša pejana tša Phetolelo ya Lefase le Lefsa di be di sa tia—ka dinako tše dingwe di be di kgeiga ge go ge go fiša kudu. Bašomi ba ba lefelong la kgatišo ba ile ba hlahloba matlakala a ka ntle a Beibele, dikgomaretši le mekgwa e sa swanego ya go dira dipuku e le gore ba tšweletše Beibele yeo e bego e tla kgona go dirišwa ka mehla tlase ga maemo a sa swanego a leratadima. Go ya ka seo ba se hweditšego, ba ile ba tšweletša Dibeibele tšeo ba dirilego diteko ka tšona gomme ba di romela go Dihlatse tšeo di tšwago dinageng tša go ba le maemo a go se swane a leratadima, go tloga dinageng tšeo di fišago kudu go ya go tšeo di tonyago kudu.

Ka morago ga dikgwedi tše tshelelago, Dibeibele tšeo di ile tša bušetšwa morago gore di hlahlobje. Ke moka, bašomi bao ba ile ba kaonefatša Dibeibele tšeo gomme ba di romela gape go Dihlatse. Ka kakaretšo, Dihlatse di ile tša romelwa Dibeibele tše 1 697 gore go dirwe diteko ka tšona. Ka phošo, tše mmalwa tša tšona di ile tša se swarwe gabotse. Ka mohlala, Beibele e nngwe e ile ya nelwa ke pula bošego ka moka gomme e nngwe ya nwelela meetseng a mafula ao a bakilwego ke ledimo le legolo. Dipoelo tša diteko tšeo di thušitše go bona ge e ba Dibeibele tšeo di tiile goba go se bjalo.

Ka 2011, ge go be go dirwa diteko, Dihlatse di ile tša reka motšhene o mofsa wa lebelo le legolo wa go dira dipuku le dipukwana mafelong a tšona a bogatišetšo a kua Wallkill Ebina le Japane. Tabakgolo e be e se feela go tšweletša Dibeibele tše di lekanego tšeo di bego di tla lokollwa sebokeng sa ngwaga le ngwaga, eupša gape go be go swanetše go gatišwa Dibeibele tšeo di swanago mafelong ao.

Mathomong a 2012, mafelo a a mabedi a ile a thoma go diriša matlakala a ka ntle ao a manegilwego ka polasitiki kgatišong ya Phetolelo ya Lefase le Lefsa yeo e bego e dutše e le gona ka mmala o moso le o mohwibidu. Lega go le bjalo, metšhene ye e mefsa e be e diriša sekgomaretši le polasitiki go manega matlakala a ka ntle a Beibele ao a se a hlwago a dirwa diteko, ke moka matlakala ao a ka ntle a tšweleditšwego a be a kobega kudu gateetee ge a be a kgomaretšwa Beibeleng. Maiteko a pele a go rarolla bothata bjo a ile a folotša, ka gona go tšweletšwa ga Beibele go ile gwa emišwa.

Badiri ba bangwe ba ditlabakelo tša matlakala a ka ntle a dipuku ba lemogile gore dipuku tšeo di dirilwego ka matlakala a ka ntle a boleta di na le bothata bja go kobega e bile go ka thatafa go fediša bothata bjo. Lega go le bjalo, go e na le gore Dihlatse di diriše matlakala a thata, di ile tša ikemišetša go tšweletša Beibele yeo e nago le matlakala a ka ntle a boleta ao a tla dirago gore e dule e bogega. Ka morago ga dikgwedi tše nne tša go dira diteko tša go tšweletša letlakala la ka ntle la Beibele leo le sa hlagalego ka pela moo go akareditšego go kopanywa ga dikgomaretši le polasitiki, Dihlatse di ile tša hwetša ditlabakelo tšeo di ka di dirišago go dira letlakala le ke moka se se ile sa dira gore mošomo wa go tšweletša Beibele o tšwele pele—ga bjale di diriša letlakala le boleta le leo le sa kokomogego.

Ka September 2012, go ile gwa laelwa gore mafelo a go gatiša a kgaotše go gatiša kgatišo ya nakong yeo ya letlakala la boleta gomme Dibeibele tšeo ka moka di romelwe diphuthegong, ke moka go letelwe go tšweletšwa ga kgatišo e kaonefaditšwego ya Phetolelo ya Lefase le Lefsa. Kgatišo ye e be e tla lokollwa ka October 5, 2013, sebokeng sa ngwaga le ngwaga sa Watch Tower Bible and Tract Society of Pennsylvania.

Ka Labohlano, August 9, 2013, mafelo a go gatiša a ile a romelwa difaele tša elektroniki tša go gatiša Beibele ye e mpsha gomme letšatšing le le latelago gwa thongwa ka modiro wa go gatiša. Ka August 15, Beibele ya mathomo e feletšego e ile ya tšweletšwa. Dibekeng tše šupago tše di latetšego, bao ba šomago mafelong a go gatiša dipuku le dipukwana kua Wallkill le Ebina ba be ba šoma bošego le mosegare go tšweletša le go romela Dibeibele tše fetago tše 1 600 000, gore motho yo mongwe le yo mongwe yo a tlago go ba gona lenaneong la seboka sa ngwaga le ngwaga a ikhweletše kopi.

Le ge Beibele ye e mpsha e le e botse e bile e diretšwe gore e se hlagale ka pela, e hupere molaetša o neago bophelo le wo bohlokwa kudu. Letšatši ka morago ga go hwetša Beibele ya gagwe e mpsha, mosadi yo mongwe yo a tšwago kua United States o ngwadile gore: “Ka baka la kgatišo ye e mpsha, bjale ke kgona go kwešiša Beibele gakaone.”