Ga go bonolo go fetolela koša go tloga lelemeng le lengwe go ya go le lengwe. Go fetolela kopelo ka moka ya dikoša tše 135 e tloga e se papadi.

Dihlatse tša Jehofa di kgonne go dira seo ka mengwaga e meraro gomme di fetoletše puku ya tšona e mpsha ya dikopelo ka moka ya Opelela Jehofa ka maleme a 116. Maleme a mangwe a 55 a na le puku ya dikopelo ya dikoša tše 55. Mola maleme a mangwe a mantši a sa dutše a fetolela puku yeo.

Dihlatse tša Jehofa di šetše di fetolela dikgatišo tša go ithuta Beibele ka maleme a ka bago a 600, ao a 400 a ona a šetšego a le gona inthaneteng. Eupša go fetolela puku ya dikopelo ga go bonolo. Ka baka la’ng? Ka gobane le ge mantšu a kopelo a fetoletšwe ka maleme a mantši, melotšana ya Opelela Jehofa e dula e swana.

Go ngwala mantšu a kopelo ga go swane le go fetolela mantšu a makasine. Ka mohlala, ge go fetolelwa makasine wa Morokami lelemeng le lengwe, bafetoledi ba katanela go fetišetša kgopolo ka moo go nepagetšego. Lega go le bjalo, mmino o fetolelwa ka tsela e fapanego.

Bafetoledi ba dikopelo ba tšea lemanoga le le fapanego ge ba fetolela dikopelo ka ge mantšu a tšona a swanetše go ba le molaetša o matla, a kgahlišago le go gopolega gabonolo.

Mantšu ao a dirišwago dikopelong tša ditumišo a swanetše go ba bonolo kudu gore seopedi se kgone go kwešiša gabotse molaetša le morero wa lentšu le lengwe le le lengwe. Ka leleme le lengwe le le lengwe, mantšu le mmino di swanetše go sepedišana le go ba le morethetho, e be bjalo ka ge eka ke mantšu a seopedi.

Bafetoledi ba fihleletše se bjang? Go e na le go fetolela lentšu ka lentšu go tšwa go puku ya dikopelo ya Opelela Jehofa ya Seisemane, dihlopha tša bafetoledi di ile tša kgopelwa go ngwala mantšu a mafsa ao a fetišago kgopolo le maikwelo a swanago le Seisemane. Ge ba dutše ba katanela go kgomarela kgopolo ya Mangwalo ya kopelo e nngwe le e nngwe, bafetoledi ba ile ba diriša mantšu a tlwaelegilego ka leleme la gabo bona ao a kwešišegago le go gopolega gabonolo.

Mogato wa mathomo e be e le go fetolela kopelo ya Seisemane lentšu ka lentšu. Ke moka, Hlatse e nago le bokgoni bja go ngwala mantšu a dikoša e leka go fetoša seo se fetoletšwego ka leleme le lefsa gore se be le bophelo le molaetša o matla. Dihlopha tše tša bafetoledi gotee le bahlahlobi ba tša mmalelo ba hlahloba mošomo woo wa mongwadi wa mantšu, ka mehla ba kgonthišetša gore dikoša di latela Mangwalo.

Dihlatse tša Jehofa lefaseng ka bophara di thabetše go hwetša puku ya dikopelo e mpsha gomme maleme a mangwe le ona a fagahletše kudu go ba le yona.