Beibele e bolela gatee feela ka di-tattoo goba go ikgaya go Lefitiko 19:28, yeo e rego: “Le se ke la ikgaya mebeleng.” Modimo o ile a nea setšhaba sa Isiraele molao wo e le go se hlaola go ditšhaba tše dingwe tšeo di bego di agišane le sona tšeo matlalong a tšona di bego di gaya maina goba dika tša medimo ya tšona. (Doiteronomio 14:2) Le ge Molao woo o neilwego Baisiraele o sa tlame Bakriste, molao wa motheo woo o thekgago molao wo o swanetše go elwa hloko.

Na Mokriste a ka ba le tattoo goba a ithala diswantšho mmeleng?

 Ditemana tše di latelago tša Beibele di ka go thuša go dira phetho tabeng ye:

•   “Basadi ba ikgabiše ... ka go se solege.” (1 Timotheo 2:9) Molao wo wa motheo o šoma go basadi le go banna. Re swanetše go hlompha maikwelo a batho ba bangwe gomme re se ke ra ipakela mahlo a batho.

•   Ba bangwe ba nyaka go bontšha gore ke bona bomang mola ba bangwe ba dira tattoo go bontšha gore ba na le tshwanelo ya go dira seo ba se ratago ka mebele ya bona. Lega go le bjalo, Beibele e kgothatša Bakriste ka gore: “Le neele mebele ya lena e le sehlabelo se se phelago, se sekgethwa, se se amogelegago go Modimo, tirelo e kgethwa ka matla a lena a tlhaologanyo.” (Baroma 12:1) Diriša ‘matla a gago a tlhaologanyo’ go lekodišiša lebaka leo o nyakago go ba le tattoo. Ge e ba e le ka baka la ge o nyaka go ba fešeneng goba go bontšha gore o setho sa sehlopha se itšego, gona o tla tle o itshola ka morago. Go hlahloba maikemišetšo a gago go ka go thuša go dira phetho e bohlale.—Diema 4:7.

•   “Maano a motho yo mafolofolo a a mo hola, eupša mang le mang yo a akgofago o wela bohloking.” (Diema 21:5) Gantši phetho ya go dira tattoo e dirwa ka lepotlapotla, eupša e ka ba le ditlamorago tša nako e telele ditswalanong tša motho le mošomong. Le gona go bitša tšhelete e ntši e bile go bohloko go tloša di-tattoo. Nyakišišo gotee le kgwebo yeo e golago ya go tloša di-tattoo di bontšha gore batho ba bantši bao ba dirago di-tattoo ka morago ba duma ge nkabe ba sa ka ba di dira.