Boradientšeneare ba leka go dira didirišwa tšeo di ka thušago dingaka ge di dira batho diophareišene ba sa ba sege kudu. Se sengwe sa dilo tšeo di dirilego gore boradientšeneare ba nyake go dira didirišwa tše tše difsa, ke gore ba kgahlilwe ke tsela yeo letsogo la octopus le šomago ka yona, go kobakobega ga lona.

 Ela hloko: Octopus e kgona go tšea dilo, go di swara le go di gatelela ka matsogo a yona a seswai ao a taramologago le ao a kobakobegago. E kgona go dira bjalo gaešita le mašobaneng a manyenyane. Octopus e kgona go koba matsogo a yona gore a lebelele moo e nyakago gona, e bile e kgona le go tiiša dikarolo tše dingwe tša matsogo a yona ge go hlokagala.

 Banyakišiši ba hweditše gore ba ka dira sedirišwa seo se lego boletiana le seo se kobakobegago seo se ka thušago dingaka go dira batho diophareišene tšeo go tšona ba sa ba segego kudu. Sedirišwa sa mohuta woo se ka kgona go šoma le go balwetši bao ba ka hlokago go dirwa ophareišene e kgolo.

 Bona matsogo a octopus ge a šetše a kobakobega

 Sedirišwa se bjalo se šetše se dirilwe gomme se šomišwa ge go dirwa ophareišene yeo e sego ya kgonthe go bona ge e ba se ka šoma gabotse. Karolo e nngwe ya letsogo yeo e ka bago dimilimithara tše 135 e ka kgona go swara ditho tša ka gare tšeo di lego boletiana ntle le go di gobatša, mola e le gore karolo e nngwe ya letsogo le e ka kgona go dira ophareišene ka boyona. Go ya ka Dr. Tommaso Ranzani e lego yo mongwe wa bao ba hlamilego sedirišwa se o re: “Re dumela gore sedirišwa se e tla ba mathomomayo a gore re be le didirišwa tše dingwe tše difsa tšeo di kaonefaditšwego kudu.”

 O nagana eng? Na letsogo la sephedi sa ka meetseng seo se bitšwago octopus le bile gona ka go itiragalela? Goba na le hlamilwe?