Serurubele se ithekgile ka mahlasedi a letšatši gore se ruthetše mešifa ya sona pele se ka fofa. Eupša ka letšatši leo go nago le maru, mešifa ya serurubele seo se bitšwago cabbage white e ruthela ka pela go feta ya dirurubele tše dingwe, ke moka se tlo fofa pele ga ge tše dingwe di ka fofa. Se thušwa ke eng?

 Ela hloko: Pele dirurubele tša mehutahuta di ka fofa, di thoma ka go fofafofa letšatšing di phurolotše maphego a tšona goba di a tswaletše gore di ruthele. Eupša serurubele seo se bitšwago cabbage white se no ema ka sebopego sa hlaka V gore se ruthele. Banyakišiši ba re e le gore serurubele se se ruthele, se swanetše go bula maphego a sona gore a be ka sebopego sa hlaka V. Ge se butše maphego a sona ka tsela yeo, mahlasedi a letšatši a tla kgona go ruthetša mešifa ya sona yeo e tlago go se thuša gore se kgone go fofa.

 Banyakišiši ba go tšwa Yunibesithing ya Exeter, kua England, ba ile ba dira nyakišišo ya ge e ba ba ka kgona go hlama motšhene wa solar woo o lego ka sebopego sa go swana le sa serurubele seo se bitšwago cabbage white. Ka go dira bjalo, ba ile ba hwetša gore motšhene wa solar o okeditše mafolofolo a go šoma ga mohlagase ka diperesente tše e ka bago tše 50.

 Banyakišiši ba ile ba lemoga gape gore maphego a serurubele seo a a phadima. Le gona ba ile ba hlama motšhene wa solar woo o lego ka sebopego sa V wa go swana le serurubele seo se bitšwago cabbage white. Seo se ile sa dira gore Moprofesara Richard ffrench-Constant, yoo e lego yo mongwe wa banyakišiši, a bolele ka serurubele seo se bitšwago cabbage white gore, “serurubele se se bopegile ka tsela yeo se kgonago go hwetša maatla mahlaseding a letšatši ka tsela e makatšago.”

 O nagana eng? Na tsela yeo serurubele seo se bitšwago cabbage white se ruthelago ka yona e no itiragalela? Goba na e hlamilwe?