Lengwalo la Pele la Johane 2:1-29
2 Bana ba ka ba ba rategago, ke le ngwalela dilo tše gore le se ke la dira sebe. Eupša ge e ba motho a ka dira sebe, re na le mothuši yo a nago le Tate, e lego Jesu Kriste, yena yo a dirago dilo tše di lokilego pele ga Modimo.
2 Ke sehlabelo seo se neilwego e le gore re boele re be le khutšo le Modimo,* eupša e sego bakeng sa rena feela, le bakeng sa batho ka moka lefaseng.
3 Le gona, ge e ba re tšwela pele re ekwa melao ya gagwe, re tla be re bontšha gore re a mo tseba.
4 Motho yo a rego: “Ke a mo tseba,” eupša a sa phele ka melao ya gagwe, motho yoo o bolela maaka, nnete ga e gona ka pelong ya gagwe.
5 Eupša ge e ba motho a ekwa lentšu la Kriste, gona go tla bonagala gore o rata Modimo e le ka nnete. Ge e ba le rena re ekwa lentšu la gagwe, gona re a tseba gore re boteeng le yena.
6 Yo a rego o dula a le boteeng le yena, o swanetše go tšwela pele a phela ka tsela yeo Jesu a bego a phela ka yona.*
7 Bana bešo le dikgaetšedi, molao wo ke le ngwalelago wona ga se o moswa eupša ke wa kgale, woo le o kwelego go tloga mathomong. Molao woo ke lentšu leo le le kwelego.
8 Le gona ke le ngwalela molao o moswa, e lego molao wo a o latetšego, woo le lena le o latetšego. Ka gobane leswiswi le a feta gomme seetša sa nnete se šetše se bonega.
9 Motho yo a rego o seetšeng eupša a hloile ngwanabo, o sa le leswiswing le gona bjale.
10 Yo a ratago ngwanabo o dula a le seetšeng, gomme ga go na selo seo se ka dirago gore a we.
11 Eupša yo a hloilego ngwanabo o leswiswing e bile o sepela leswiswing, le gona ga a tsebe mo a yago ka gobane leswiswi le mo foufaditše.
12 Bana ba ba rategago, ke le ngwalela dilo tše, ka gobane Modimo o le lebaletše dibe tša lena ka baka la leina la gagwe.*
13 Ke ngwalela lena botate, ka gobane le tseba yo a bilego gona go tloga mathomong. Ke ngwalela lena masogana, ka gobane le fentše Sathane.* Ke ngwalela lena bana ba ba rategago, ka gobane le tseba Modimo Tatago rena.
14 Ke ngwalela lena botate, ka gobane le tseba yo a bilego gona go tloga mathomong. Ke ngwalela lena masogana, ka gobane le tiile e bile le dumela lentšu la Modimo, le gona le fentše Sathane.
15 Le se ke la rata lefase goba dilo tšeo di lego lefaseng. Ge e ba motho a rata lefase, ga a rate Tate.
16 Ka gobane dilo ka moka tšeo di lego lefaseng, tše bjalo ka go duma dilo tšeo mebele ya rena yeo e nago le sebe* e di kganyogago le mahlo a rena a di kganyogago, le go kgantšhetša batho dilo tšeo re nago le tšona, ga di tšwe go Tate, eupša di tšwa bathong ba lefase le.
17 Le gona lefase le le tlo feta, le dilo ka moka tšeo di lego lefaseng le tšeo batho ba di kganyogago di tlo feta. Eupša yo a dirago thato ya Modimo o tla phela go ya go ile.
18 Bana ba ba rategago, nako yeo e šetšego ke e nyenyane, gomme ka ge le kwele gore motho yo a lwago le Kriste o a tla, le gona bjale go tšweletše batho ba bantši bao ba lwago le Kriste, e lego seo se bontšhago gore nako yeo e šetšego ke e kopana.
19 Ba be ba na le rena, eupša ba re tlogela ka gobane e be e se ba sehlopha sa rena. Ge nkabe e be e le ba sehlopha sa rena, nkabe ba šetše le rena. Eupša ba re tlogetše e le gore go bonagale gore ga se ka moka bao e lego ba sehlopha sa rena.
20 Le tloditšwe ka moya ke Modimo yo mokgethwa, gomme ka moka ga lena le tseba nnete.
21 Ke le ngwalela e sego ka gobane le sa tsebe nnete, eupša ka gobane le e tseba, le ka gobane ga go na maaka ao a tšwago nneteng.
22 Ke mang yo a bolelago maaka, na ga se yo a ganago gore Jesu ke Kriste? Yena yoo o lwa le Kriste, ke yena yo a sa dumelego go Tate le go Morwa.
23 Yo mongwe le yo mongwe yo a sa dumelego go Morwa, ga a na segwera le Tate. Eupša yo a dumelago go Morwa, o dumela le go Tate.
24 Ge e le lena, le dule le dira dilo tšeo le di kwelego go tloga mathomong. Ge e ba le tšwela pele le dira dilo tšeo, le tla dula le le boteeng le Morwa e bile le le boteeng le Tate.
25 Go feta moo, seo a re tshepišitšego sona ke go phela go ya go ile.
26 Ke le ngwalela dilo tše mabapi le bao ba lekago go le timetša.
27 Ge e le lena Modimo o le tloditše ka moya wa gagwe, gomme moya woo o dula o le go lena, e bile ga go hlokagale gore go be le motho yo a le rutago. Eupša go tlotšwa moo ka moya ke ga nnete, ga se ga maaka le gona go le ruta dilo ka moka. Go etša ge go tlotšwa moo go le rutile, gona dulang le le boteeng le yena.
28 Ka gona bana ba ba rategago, dulang le le boteeng le yena e le gore ge a bontšha matla a gagwe,* re bolele re lokologile gomme re se ke ra ikutela yena re lewa ke dihlong nakong ya go ba gona ga gagwe.
29 Ge e ba le tseba gore o lokile, gona le tseba gore motho yo mongwe le yo mongwe yo a dirago dilo tše di lokilego ke ngwana wa Modimo.
Mengwalo ya tlase
^ Goba “sehlabelo seo se neilwego e le gore dibe tša rena di lebalelwe.”
^ Phetolelo ya lentšu ka lentšu e re, “go sepela ka tsela yeo a bego a sepela ka yona.”
^ Ke gore, “la Jesu.”
^ Phetolelo ya lentšu ka lentšu e re, “yo mobe.”
^ Phetolelo ya lentšu ka lentšu e re, “kganyogo ya nama.”
^ Phetolelo ya lentšu ka lentšu e re, “ge a bonagatšwa.”
