Diema 13:1-25
13 Morwa yo bohlale o amogela tayo ya tatagwe,Eupša motho yo a ikgantšhago, ga a theetše ge a kgalemelwa.
2 Dilo tše dibotse tšeo motho a di bolelago, di tla mo hola,Eupša moradia o rata bošoro.
3 Yo a šetšago seo a se bolelago, o šireletša bophelo bja gagwe.Eupša yo a bolelago kudu o tla welwa ke masetlapelo.
4 Sebodu se duma dilo mola se se na selo.Eupša motho yo a šomago ka thata o tla atlega.
5 Moloki o hloile maakaEupša dilo tšeo batho ba babe ba di dirago, di tla dira gore ba swabe ba be ba lewe ke dihlong.
6 Dilo tša go loka di šireletša motho yo a hlokago molato,Eupša dilo tše mpe di dira gore modiradibe a welwe ke masetlapelo.
7 Go na le yo a itirago eka o humile eupša a se na selo.Go na le yo a itirago eka o a diila eupša a humile kudu.
8 Mohumi o šireletša bophelo bja gagwe ka mahumo a gagwe,Eupša modiidi yena ga a tšhošwe ke selo.
9 Moloki o swana le lebone leo le phadimago kudu,Eupša lebone la yo mobe le tla tingwa.
10 Motho yo a ikgogomošago o dira gore go be le dintwa,Eupša bao ba tsomago keletšo ba bohlale.
11 Mahumo ao a tlago ka pela a tla fela ganyenyane-ganyenyane,Eupša lehumo leo le kgoboketšwago ganyenyane-ganyenyane le tla oketšega.
12 Ge motho a letetše selo gomme se sa tle ka pela, a ka nyama.Eupša ge seo a se letetšego se etla, se ba bjalo ka mohlare wo o neago bophelo.
13 Yo a sa latelego ditaelo, o tla lebana le ditlamorago.Eupša yo a kwago molao o tla putswa.
14 Dilo tšeo motho yo bohlale a di rutago di a phediša,E bile di ka phološa motho lehung.
15 Motho yo a nago le temogo o tla ratwa ke batho ba bangwe,Eupša wa go rata maaka o baka mathata a mantšhi.
16 Motho yo bohlale o nagana pele a dira dilo,Eupša setlaela se ikgantšha ka bošilo bja sona.
17 Moromiwa yo a sa tshepegego o tla wela mathateng,Eupša moromiwa yo a tshepegago o a lapološa.
18 Yo a ganago tayo o tla diila a ba a lewa ke dihlong,Eupša yo a amogelago kgalemelo o tla hlomphiwa.
19 Motho o a thaba ge a hwetša seo a se kganyogago,Eupša setlaela ga se nyake go kgaogana le dilo tše mpe.
20 Yo a gweranago* le ba bohlale o tla hlalefa,Eupša yo a gweranago le ditlaela, dilo di ka se mo sepelele gabotse.
21 Badiradibe ba welwa ke masetlapelo,Eupša baloki ba tla putswa ka dilo tše dibotse.
22 Motho yo a dirago dilo tša go loka, o tlogelela ditlogolo tša gagwe bohwa,Eupša lehumo la modiradibe le tla tlogelelwa moloki.
23 Tšhemo yeo e lemilwego ya modiidi e tšweletša dijo tše dintšhi kudu,Eupša a ka amogwa tšhemo yeo ka baka la go hloka toka.
24 Yo a sa kgalego morwa wa gagwe ka kgati o mo hloile,Eupša yo a mo ratago o mo kgalemela gabotse.*
25 Moloki o a ja gomme a khora,Eupša batho ba babe ba bolawa ke tlala.
Mengwalo ya tlase
^ Phetolelo ya lentšu ka lentšu e re, “Yo a sepelago.”
^ Goba mohlomongwe, “kapelapela.”
