Psalme 105:1-45
-
Jehofa o dirišana le batho ba gagwe ka go tshepega
105 Lebogang Jehofa, gomme le bitše leina la gagwe.Tsebišang batho dilo tšeo a di dirilego!
2 Mo opeleleng, mo opeleleng dikoša tša go mo reta,Naganišišang* ka mediro ya gagwe ka moka yeo e makatšago.
3 Ikgantšheng ka leina la gagwe le lekgethwa.
Anke dipelo tša bao ba hlankelago Jehofa di thabe.
4 Kgopelang Jehofa gore a le fe matla a gagwe.
Mo kgopeleng gore a dule a le thuša.
5 Gopolang dilo tše di makatšago tšeo a di dirilego,Le gopoleng le mehlolo ya gagwe le kamoo a ahlolago ka go loka,
6 Lena ditlogolo* tša Aborahama mohlanka wa Modimo,Lena barwa ba Jakobo, bao a ba kgethilego.
7 Ke Jehofa Modimo wa rena.
O ahlola lefase ka moka.
8 Modimo le ka mohla ga a lebale kgwerano yeo a e dirilego.O dula a gopola dilo tšeo a di tshepišitšego batho ba gagwe go ya go ile,
9 Yona kgwerano yeo a e dirilego le Aborahama,Le keno yeo a e diretšego Isaka,
10 Gomme a e tiišetša Jakobo,A dira gore e be kgwerano ya go ya go ile go Isiraele,
11 A re: “Ke tla go fa naga ya KananaGore e be bohwa bja gago.”
12 O boletše dilo tše nakong ya ge e be e se ba bantšhi,E be e se ba bantšhi, e bile e be e se badudi ba naga yeo.
13 Ba ile ba tloga setšhabeng se sengwe ba ya go se sengwe,Ba tloga mmušong o mongwe ba ya go o mongwe.
14 Ga se a dumelela motho le ge e le ofe gore a ba gatelele,Eupša o ile a kgalemela dikgoši ka baka la bona.
15 A re: “Le se kgwathe batlotšwa ba ka,Le se ke la dira baporofeta ba ka selo se sebe.”
16 O ile a dira gore nageng go be le tlala,Gomme a se sa ba fa dijo.
17 O ile a romela Josefa gore a ba ete pele,E lego monna yoo a bego a rekišitšwe go ba lekgoba.
18 Ba mo tlema maoto ka diketane,Gomme ba mo tlema molala ka ditšhipi
19 Go fihlela nakong yeo dilo tšeo di boletšwego di phethagala,Dilo tšeo Jehofa a di boletšego di thušitše Josefa gore e be motho yo mokaone.*
20 Kgoši ya laela gore a lokollwe,Yena mmuši yoo wa ditšhaba a mo lokolla tronkong.
21 A mo dira gore e be yo mogolo ntlong ya gagwe,Le gore a laole dilo tša gagwe ka moka,
22 A mo dira gore e be molaodi wa baetapele ba gagwe, gomme o be a tla ba diriša kamoo a bego a rata ka gonaLe gore a rute banna ba gagwe ba bagolo bohlale.
23 Isiraele yena a tla Egepeta,Gomme Jakobo yena a dula nageng ya Hama bjalo ka motšwantle.
24 Modimo a dira gore batho ba gagwe e be ba bantšhi kudu,A ba dira gore ba be matla go feta manaba a bona,
25 A dumelela manaba ao a hloya batho ba gagwe,A ba a dira gore a logele bahlanka ba gagwe maanomabe.
26 A roma mohlanka wa gagwe Moshe,Gomme a kgetha Arone gore a sepele le yena.
27 O ile a ba thuša gore ba dire mehlolo pele ga batho,A ba thuša gore ba bontšhe batho dipontšho nageng ya Hama.
28 Modimo o ile a dira gore nageng ya Egepeta go be le leswiswi.Ba* ile ba kwa mantšu a gagwe.
29 A fetoša meetse a Baegepeta gore e be madi,Gomme a bolaya le dihlapi tša bona.
30 Naga ya bona e ile ya tlala digwagwa,Go akaretša le ka diphapošing tša kgoši.
31 A laela mohuta o itšego wa dintšhi tša go loma gore di ba hlasele,Le menang gore e hlasele ditikologo tša bona ka moka.
32 A ba nešetša sefako,A ba a dira gore magadima* a bethe nageng ya bona.
33 A bolaya meterebe le mego ya bonaGomme a roba mehlare ka moka ya nageng ya bona.
34 A laela ditšie gore di hlasele,E lego ditšie tše dinyenyane tše dintšhintšhi.
35 Tša ja dimela ka moka tša nageng ya bona,Tša ja le dilo tšeo di tšweleditšwego ke mmu wa bona.
36 Ke moka a bolaya leitšibulo le lengwe le le lengwe nageng ya bona,E lego bana ba bona ba mathomothomo.
37 A ntšha batho ba gagwe ba swere silifera le gauta,Gomme gwa se be le o tee melokong ya batho ba gagwe yoo a ilego a kgopša.
38 Baegepeta ba ile ba thaba ge Baisiraele ba tloga,Ka gobane ba be ba ba tšhaba.
39 A romela leru gore le ba šireletše,
A romela le mollo gore o ba bonegele bošego.
40 Ge ba kgopela nama o ile a ba fa dinonyana.*A dula a ba fa dijo tšeo di tšwago legodimong gore ba je ba khore.
41 A bula leswika gomme meetse a elela a etšwa moo,Meetse ao a elela leganateng bjalo ka noka.
42 Ka gobane Modimo o ile a gopola dilo tše kgethwa tšeo a di tshepišitšego mohlanka wa gagwe Aborahama.
43 Ka gona a ntšha batho ba gagwe gomme bona ba thaba,Bona bahlaolwa ba gagwe ba ile ba mo opelela ba thabile.
44 A ba fa dinaga tša ditšhaba,Ba tšea dilo tšeo batho ba bangwe ba di šometšego ka thata,
45 E le gore ba dule ba ekwa melao ya gagweLe go latela ditaelo tša gagwe.
Tumišang Jah!*
Mengwalo ya tlase
^ Goba mohlomongwe, “Bolelang.”
^ Phetolelo ya lentšu ka lentšu e re, “peu.”
^ Lentšu la Seheberu leo le dirišitšwego mo le ra gore go hlwekiša tšhipi ka go e tološa.
^ Go ka direga gore mo go bolelwa ka Moshe le Arone.
^ Goba, “dikgabo tša mollo.”
^ Phetolelo ya lentšu ka lentšu e re, “dikhwiri.” Khwiri ke nonyana e nyenyane ya go nona.
^ Goba, “Haleluya.” Jah ke tsela e kopana ya go bitša leina Jehofa.
