Psalme 106:1-48
106 Tumišang Jah!*
Lebogang Jehofa, ka gobane o lokile.Lerato la gagwe le le botegago le dula le le gona go ya go ile.
2 Ke mang a ka bolelago ka dilo ka moka tšeo Jehofa a di dirilego ka matla a gagweGoba ke mang a ka tsebišago batho ka dilo tše dikgolo tšeo a di dirilego?
3 Go thaba bao ba dirago dilo ka toka,Le bao ba dulago ba dira dilo tša go loka.
4 Nkgopole hle Jehofa, gomme o mpontšhe botho bjo o bo bontšhago batho ba gago.
Ntlhokomele gomme o mphološe,
5 E le gore ke ipshine ka dilo tše dibotse tšeo o di fago batho bao o ba kgethilego,Gore ke thabe le setšhaba sa gago,Le gore ke go tumiše le batho ba gago.
6 Re dirile sebe go swana le borakgolokhukhu ba rena.Re dirile diphošo e bile re dirile dilo tše mpe.
7 Borakgolokhukhu ba rena ga se ba leboga mediro ya gago e megolo kua Egepeta.
Ba ile ba lebala gore o ile wa ba bontšha lerato la gago le le botegago.Ba ile ba go hlanogela kua lewatleng, lona Lewatle le Lehwibidu.
8 Eupša Modimo o ile a ba phološa e le gore leina la gagwe le retwe,Le gore batho ba bone gore o na le matla.
9 O ile a ntšha taelo gomme Lewatle le Lehwibidu la gopa.A fetiša batho ba gagwe ka gare ga lewatle bjalo ka ge eka ba feta leganateng.
10 O ile a ba phološa go batho bao ba ba hloilegoLe go ba phološa go manaba a bona.
11 Meetse a ile a khupetša manaba a bona,Gomme gwa se phologe le le letee.
12 Ke moka ba thoma go ba le tumelo dilong tšeo a di tshepišitšego,Ba thoma go mo opelela koša ya go mo tumiša.
13 Eupša ba ile ba lebala ka pela dilo tšeo a di dirilego,Gomme ba se letele gore a ba botše seo ba swanetšego go se dira.
14 Ge ba le lešokeng ba ile ba nyaka dilo tše dintšhi tša go bontšha gore ba inaganela ba nnošiGomme ba leka Modimo ba le leganateng.
15 Yena a ba nea seo ba bego ba se kgopela,Eupša a ba hlasela le ka bolwetši bjo bo ilego bja ba fetša matla gomme bja ba bolaya.
16 Kua kampeng, ba ile ba thoma go jela Moshe mona,Ba jela le Arone mokgethwa wa Jehofa mona.
17 Ke moka lefase la bulega la metša Dathane,La ba la metša le bao ba bego ba na le Abirama.
18 Gwa tuka mollo gare ga bona,Wa tšhuma batho ba babe gomme wa ba fediša.
19 Ba ile ba dira namane kua HorebeGomme ba khunamela modimo yoo wa seswantšho,
20 Go e na le gore ba rete nna,Ba ile ba reta seswantšho sa poo yeo e fulago bjang.
21 Ba ile ba lebala Modimo yo a ba phološago,Yo a dirilego dilo tše dikgolo kua Egepeta,
22 Le yo a dirilego dilo tše di makatšago kua nageng ya Hama,Le dilo tše di boifišago Lewatleng le Lehwibidu.
23 O be a le kgauswi le go laela gore ba fedišwe,Eupša Moshe mohlanka wa gagwe a tsena ditaba gareGomme a kgopela gore a se sa ba galefela le go ba fediša.
24 Ba thoma go nyatša naga e botse kudu,Ba se sa dumela ditshepišo tša gagwe.
25 Ba dula ba ngunanguna ka ditenteng tša bona,Ba se theetše lentšu la Jehofa.
26 Ka gona, a ba enela goreBa tla hwela lešokeng,
27 Le gore o tla gašanya ditlogolo tša bona le dinaga,Le gona di tla hwela dinageng tše dingwe.
28 Ba thoma go rapela Baali wa Peoro,Le go ja dihlabelo tšeo di hlabetšwego bahu.*
29 Ba ile ba mo galefiša ka dilo tšeo ba di dirago,Gomme a ba otla ka bolwetši.
30 Eupša bolwetši bjoo bo ile bja felaGe Finease a tsena ditaba gare.
31 Ke moka Modimo a mo lebelela e le motho wa go lokaMelokong ka moka le go ya go ile.
32 Ba ile ba galefiša Modimo meetseng a Meriba,Moo Moshe a ilego a otlwa ka baka la bona.
33 Ba ile ba galefiša Moshe,Gomme yena a ba hlaba ka mantšu.
34 Ga sa nka ba kwa seo Jehofa a ba boditšego sona,Ge a re ba fediše batho ba ditšhaba tše dingwe.
35 Eupša bona ba ile ba itswakanya le ditšhaba tšeoGomme ba ithuta mekgwa ya tšona.
36 Ba dula ba hlankela medingwana ya bona,Gomme yona ya fetoga molaba go bona.
37 Ba be ba direla batemona dihlabelo ka barwa ba bonaLe barwedi ba bona.
38 Ba dulela go tšholla madi a batho bao ba se nago molato,E lego madi a barwa ba bona le barwedi ba bonaBao ba diretšego medingwana ya Kanana dihlabelo ka bona.Naga e ile ya šilafala ka baka la go tšhollwa ga madi a batho bao ba se nago molato.
39 Ba šilafatšwa ke mediro ya bona,Ba se botegele Modimo ka baka la mediro ya bona.*
40 Ke moka Jehofa a galefela batho ba gagwe,Gomme a ba hloya.
41 A dula a ba tlogela gore ditšhaba tše dingwe di ba fenye,E le gore ba bušwe ke batho bao ba ba hloilego.
42 Manaba a bona a ile a ba gatelela,Gomme ba bušwa ke ona.
43 O ba phološitše gantšhi,Eupša bona ba dula ba mo hlanogela le go se mo kwe,E bile melato ya bona e be e dira gore ba nyatšege.
44 Eupša o be a bona tlalelo ya bonaE bile a ekwa sello sa bona ge ba be ba mo llela gore a ba thuše.
45 O be a gopola kgwerano ya gagwe yeo a e dirilego le bona,Gomme a ba kwela bohloko ka baka la lerato la gagwe le legolo leo le botegago.
46 O be a dira gore batho ka moka bao ba ba thopilegoBa ba šokele.
47 Re phološe hle Jehofa Modimo wa rena,Gomme o re kgoboketše go tšwa ditšhabengE le gore re tle re rete leina la gago le lekgethwaGomme re go tumiše re thabile.
48 A go retwe Jehofa Modimo wa IsiraeleGona bjale le go ya go ile.*
Anke batho ka moka ba re: “Amene.”*
Tumišang Jah!*
Mengwalo ya tlase
^ Goba, “Haleluya.” Jah ke tsela e kopana ya go bitša leina Jehofa.
^ Ke gore, dihlabelo tšeo di bego di direlwa bahu goba tše di bego di hlabelwa medimo yeo e sa phelego.
^ Phetolelo ya lentšu ka lentšu e re, “ba otswa le medingwana.”
^ Goba, “go tloga mehleng ya neng le neng le go iša mehleng ya neng le neng.”
^ Goba, “a go be bjalo.”
^ Goba, “Haleluya.” Jah ke tsela e kopana ya go bitša leina Jehofa.
