Psalme 108:1-13
Koša ya Dafida.
108 Wena Modimo, pelo ya ka e a botega.
Ke tla go opelela dikoša tša go go reta ka pelo ya ka ka moka.
2 Wena seletšo sa metato le wena harepa, phafogang.
Ke tla tsoga pele letšatši le hlaba.
3 Wena Jehofa, ke tla go reta gare ga batho.E bile ke tla go opelela dikoša tša go go reta gare ga ditšhaba.
4 Gobane lerato* la gago ke le legolo e bile le phagame go swana le magodimo,Gomme go tshepega ga gago ke mo gogolo go fihla leratadimeng.
5 Wena Modimo, anke o phagamišetšwe ka godimo ga magodimo.Bontšha batho letago la gago lefaseng ka moka.
6 Anke o re phološe ka matla a gago o be o re arabe,E le gore o phološe bao o ba ratago.
7 Modimo yo mokgethwa* o boletše a re:
“Ke tla thaba ge ke nea batho ba ka Shikeme gore e be bohwa bja bona.Ke tla aroganya Moedi wa Sukothe.
8 Gileada ke ya ka le Manase ke ya ka,Gomme Efuraime ke kefa yeo e ntšhireletšago hlogo.Juda e swantšhetša matla ao ke nago le ona.
9 Moaba ke sekotlelo sa ka sa go hlapela.
Ke tla foša Edomo ka ramphašane ya ka.
Ke tla goeletša ke thabile ka gobane ke tlo fenya Filisita.”
10 Ke mang a tlago go nthuša gore ke fenye motse wo o dikaneditšwego?
Ke mang a tlago go nketa pele gore ke yo fenya Edomo?
11 Ke wena Modimo wa rena yo a tlago go re thuša gore re fenye.Eupša gona bjale o re lahlile, e bile ga o sa thuša mašole a rena, wena Modimo wa rena.
12 Re thuše ge re tlaletšwe,Ka gobane re ka se holege ka selo ge re ka letela gore batho ba re phološe.
13 Modimo o tla re nea matla,Gomme o tlo fenya manaba a rena.
Mengwalo ya tlase
^ Goba, “lerato la gago le le botegago.”
^ Goba mohlomongwe, “Modimo o boletše a le lefelong la gagwe le lekgethwa.”
