Psalme 35:1-28
Koša ya Dafida.
35 Wena Jehofa nkemelele go batho bao ba nkganetšago,Elwa le bao ba lwago le nna.
2 Tšea kotse ya gago e kgolo le e nyenyaneGomme o ntšhireletše.
3 Tšea lerumo le selepe sa gago gomme o yo lwa le bao ba lwago le nna.
O mpotše o re: “Ke nna ke go phološago.”
4 Anke bao ba nyakago go mpolaya ba lewe ke dihlong le go nyatšega.
Anke bao ba nyakago go ntlhafišetša bophelo ba tšhabe ba lewa ke dihlong.
5 Anke ba be bjalo ka mooko phefong,Le gona anke morongwa wa Jehofa a ba rake.
6 Anke tsela ya bona e be leswiswi e be e thedimoše,Le gona anke morongwa wa Jehofa a ba rakediše.
7 Ka gobane ba mpeetše molaba gore ba ntanye ntle le lebaka,E bile ba nkepetše molete ntle le lebaka.
8 Anke ba welwe ke mathata ba sa itebetše.Anke molaba woo ba o beilego o tanye bona,Anke ba wele ka go wona gomme ba hwe.
9 Eupša nna ke tla thabela Jehofa,Ke tla thaba ka gobane o mphološitše.
10 Ke tla bolela ka pelo ka moka ka re:
“Wena Jehofa, ke mang yo a swanago le wena?
O phološa motho yo a hlakišwago ke bao ba nago le matla,Wa phološa yo a hlakišwago le modiidi go batho bao ba ba tšeelago dilo tša bona.”
11 Ge ke be ke sekišwa go ile gwa tla batho ba babe,Gomme ba mphara ka molato woo ke sa o tsebego.
12 Ba ntshwere gampe le ge ke se ka ba dira selo,Ka go realo ba nkweša bohloko.
13 Eupša ge ba be ba babja ke ile ka apara lesaka,Ka ikokobetša gomme ka ikona dijo.Ge thapelo ya ka e be e sa arabje,
14 Ke ile ka sepela ke le bjalo ka ge eka ke llela mogwera wa ka goba ngwanešo yo a hlokofetšego,Ka khunama ke nyamile ke le bjalo ka ge eka ke llela mma yo a hlokofetšego.
15 Eupša ge ke be ke kgopša, ba ile ba thaba gomme ba kgobokana.Ba kgobokana gore ba ntlhasele ke sa itebetše.Ba ile ba dulela go bolela maaka ka nna e le gore ba ntlhasele.
16 Batho ba go se boife Modimo ba a nkwera,Ba lomantšha meno ka gobane ba nkgalefetše.
17 Wena Jehofa, o tlo bogela dilo tše go fihla neng?
Mphološe go banna ba,Bao ba nyakago go mpolaya bjalo ka ditawana.
18 Ke tla go reta phuthegong e kgolo.Ke tla go tumiša gare ga mašaba.
19 O se ke wa dumelela bao ba itirago manaba a ka ntle le lebaka ba thaba ka nna.O se ke wa dumelela bao ba ntlhoilego ba thabišwa ke gore ke welwa ke mathata.*
20 Tšeo ba di bolelago ga di dire gore go be le khutšo,Eupša batho bao ba ratago khutšo ba ba logela maano a mabe.
21 Ba nkahlamišetša melomo e le gore ba bolele maaka ka nna.Ba itše: “O laegile! Dilo tše o di dirilego re di bone.”
22 Wena Jehofa, o bone seo se diragetšego. O se ke wa homola.
Hle Jehofa, o se ntlogele.
23 Ema gomme o ntwele,Hle Jehofa Modimo wa ka, ntwele molatong wa ka kgorong ya tsheko.
24 Nkahlole go ya ka toko ya gago, wena Jehofa Modimo wa ka.O se ke wa ba dumelela ba thaba ka nna.
25 Anke ba se ke ba ipotša gore: “Agaa! Se ke sona seo re bego re se nyaka!”
Anke ba se ke ba re: “Re feditše ka yena.”
26 Anke bao ba thabelago gore ke wetšwe ke masetlapeloBa lewe ke dihlong gomme ba gakanege.
Anke bao ba ipotšago gore ba kaone go mpheta ba hlabje ke dihlong gomme ba nyatšege.
27 Eupša anke bao ba kgahlwago ke go loka ga ka ba goeletše ka lethabo.Anke ba dulele gore:
“Anke Jehofa a tumišwe, yena yo a kgahlwago ke khutšo ya mohlanka wa gagwe.”
28 Ke moka ke tla bolela* ka go loka ga gagoGomme ka go tumiša ka mehla.
