Psalme 44:1-26
Ditaelo tšeo di yago go mohlahli. Koša ya barwa ba Kora. Maskile.*
44 Wena Modimo, re kwele ka ditsebe tša rena,Borakgolokhukhu ba rena le bona ba re anegetšeKa dilo tšeo o di dirilego mehleng ya bona,Mehleng ya kgalekgale.
2 O rakile ditšhaba ka seatla sa gago,Gomme wa tšea naga ya tšona wa e fa borakgolokhukhu ba rena.
O otlile ditšhaba tšeo di bego di dula nageng yeo gomme wa di raka.
3 Borakgolokhukhu ba rena ga se ba thušwa ke ditšhoša tša bona gore ba tšee naga gomme ba dule go yona,E bile ga se ba fenya ka baka la matla a bona.
Ka ge o be o ba rata,O ile wa ba thuša ka seatla sa gago sa le letona, ka matla a gago le ka go ba bontšha gore o a ba amogela.
4 Wena Modimo, o Kgoši ya ka.Ntšha taelo ya gore Jakobo a fenye.
5 Ka thušo ya gago re tla kgorometša manaba a rena.Ka leina la gago re tla fenya bao ba lwago le rena.
6 Gobane ga se ka ithekga ka bora bja ka,E bile le tšhoša ya ka e ka se mphološe.
7 Ke wena o re phološitšego go manaba a rena,E bile o dirile gore bao ba re hloilego ba lewe ke dihlong.
8 Wena Modimo re tla go tumiša letšatši ka moka,Re tla reta leina la gago go ya go ile. (Selah)
9 Eupša bjale o re lahlile e bile o a re kokobetša,Le gona ga o thekge mašole a rena.
10 O dira gore re tšhabe manaba a rena,Bao ba re hloilego ba itšeela dilo tše dingwe le tše dingwe tšeo ba di ratago gore ba ikhole.
11 O dumelela manaba a rena gore a re bolaye go swana le dinku,O dirile gore re gašane le lefase le ka moka.
12 O rekiša batho ba gago ka theko ya tlase kudu,Ga o boelwe ke selo ge o ba rekišitše.
13 O dira gore baagišane ba rena ba re nyatše,Wa dira gore batho bao ba lego kgauswi le rena ba re kwere le go re sega.
14 O dira gore ditšhaba di re kwere,Wa dira gore batho ge ba re bona ba šikinye dihlogo.
15 Ke kwa ke nyatšega letšatši ka moka,E bile ke lewa ke dihlong kudu,
16 Ka baka la bao ba nkwerago le go mpolela gampe,Le ka baka la manaba a rena ao a itefeletšago.
17 Dilo tše ka moka di re wetše eupša ga se ra go lebala,Le gona ga se ra hlanogela kgwerano ya gago.
18 Dipelo tša rena ga se tša go hlanogela,Le gona ga se ra aroga tseleng ya gago.
19 O dumeletše gore re fenywe gomme wa re tlogela lefelong leo diphukubje di kgobokanago go lona.O re apešitše leswiswi le lesoleso.
20 Ge e ba re lebetše leina la Modimo wa rena,Goba ge e ba re rapela modimo o šele,
21 Na Modimo yena a ka se bone se?
O tseba diphiri tšeo di lego pelong.
22 Re bolawa letšatši ka moka ka ge re go hlankela.Manaba a rena a re lebelela re le dinku tšeo di swanetšego go hlabja.
23 Wena Jehofa, ke ka baka la’ng o itira okare o robetše?
Tsoga gomme o re thuše! O se ke wa re lahlela sa ruri.
24 O re’ng o se na taba le rena?
Ke ka baka la’ng o dumelela gore re tlaišwe le go gatelelwa?
25 Gobane re lahletšwe fase leroleng,Mebele ya rena e rapaletše fase.
26 Ema o re thuše,
Re phološe ka baka la lerato la gago le legolo.*
