Psalme 61:1-8
-
Modimo ke tora yeo e šireletšago go manaba
-
“Ke tla ba moeng ka tenteng ya gago” (4)
-
Ditaelo tšeo di yago go mohlahli: Koša ya Dafida. Diriša diletšo tša metato.
61 Ntheetše ge ke llela gore o nthuše, hle Modimo.
Ke kgopela o theetše thapelo ya ka.
2 Ke tla lla ke le mafelelong a lefase ge pelo ya ka e fokola.Ntlhahle gomme o nnametše leswikeng le legolo.
3 Gobane o lefelo leo ke tšhabelago go lona,O tora yeo e ntšhireletšago go lenaba.
4 Ke tla ba moeng ka tenteng ya gago go ya go ile.Ke tla tšhabela ka tlase ga maphego a gago. (Selah)
5 Ka gobane wena Modimo o nkwele ge ke go direla dikeno.
O nneile bohwa bjoo o bo fago batho bao ba boifago leina la gago.
6 O tla okeletša kgoši matšatši a yona a bophelo,E bile e tla phela mengwaga e mentšhi.
7 E tla dula sedulong sa bogoši pele ga Modimo go ya go ile.Anke o e bontšhe gore o a e rata* e bile o a e botegela e le gore e dule e šireletšegile.
8 Ke tla go opelela dikoša tša go reta leina la gago go ya go ile,Ge ke dutše ke phetha dikeno tša ka letšatši le letšatši.
Mengwalo ya tlase
^ Goba, “o na le lerato le le botegago.”
