Psalme 66:1-20
Ditaelo tšeo di yago go mohlahli. Koša.
66 Lena batho ba lefase ka moka, opelelang Modimo koša ya phenyo.
2 Opelelang leina la gagwe le be le le rete.
Mo neeng letago le be le mo tumiše.
3 Botšang Modimo le re: “Ruri mediro ya gago e a boifiša!
Manaba a gago a tla tla go wena a thothomelaKa baka la matla a gago a magolo.
4 Batho ka moka lefaseng ba tla go khunamela.Ba tla go opelela dikoša tša go go reta,Ba tla opela dikoša tša go reta leina la gago.” (Selah)
5 Etlang le bone dilo tšeo Modimo a di dirilego.
O diretše batho dilo tšeo di kgahlišago.
6 O fetošitše lewatle gore e be naga yeo e omilego.Batho ba ile ba tshela noka ka maoto.
Re ile ra thaba ka baka la dilo tšeo a re diretšego tšona.
7 O buša go ya go ile ka baka la matla a gagwe.
O dula a lebeletše batho ba ditšhaba.
Batho ba dinganga ga se ba swanela go ikgantšha. (Selah)
8 Lena batho, retang Modimo wa rena,Anke batho bohle ba kwe gore o a tumišwa.
9 O dira gore re dule re phela.Ga a dumelele gore re we.
10 Ka gobane wena Modimo o re hlahlobile.O re sekišitše ka mokgwa wo silifera e sekišwago ka gona.
11 O re tantše ka nete ya gago ya go rea dihlapi.O re rwešitše morwalo o boima.
12 O dumeletše batho ba re gatakela.Re wetšwe ke mathata tše e kego re feta ka gare ga mollo le ka gare ga meetse,Ke moka wa re iša lefelong leo le šireletšegilego.
13 Ke tla tla ntlong ya gago le dihlabelo tša go fišwa.Ke tla phetha dilo tšeo ke go tshepišitšego tšona,
14 Dilo tšeo ke go tshepišitšego tšona le tšeo ke di boletšego ge ke be ke le mathateng ao a šiišago.
15 Ke tla go direla dihlabelo tša go fišwa ka diphoofolo tšeo di nonnegoLe ka dinku tše ditona.
Ke tla go direla dihlabelo ka dipoo le diphooko. (Selah)
16 Etlang le theetše lena ka moka bao le boifago Modimo,Gomme ke tla le botša seo a ntiretšego sona.
17 Ke mo lletše gore a nthušeGomme ka mo reta.
18 Ge e ba ke be ke naganne selo le ge e le sefe seo se kwešago bohloko pelong ya ka,Jehofa o be a ka se nkwe.
19 Eupša Modimo o nkwele.O kwele thapelo ya ka.
20 A go retwe Modimo yo a ilego a kwa thapelo ya ka,A ba a mpontšha lerato la gagwe le le botegago.
