Psalme 78:1-72
-
Modimo o hlokomela Baisiraele eupša bona ga ba na tumelo
Maskile.* Koša ya Asafa.
78 Lena batho ba ka, theetšang molao wa ka,Le be le theetšeng seo ke le botšago sona.
2 Ke tla bolela seema,
Ka utolla diphiri tša kgale.
3 Dilo tšeo re di kwelego le dilo tšeo re di tsebago,Tšeo botatago rena ba re boditšego tšona,
4 Re tla di botša barwa ba rena.Re tla anegela moloko o tlagoDilo tše dikgolo tšeo Jehofa a di dirilego le matla a gagwe,Le dilo tše di makatšago tšeo a di dirilego.
5 O ile a fa ditlogolo tša JakoboLe ditlogolo tša Isiraele melao.A laela botatago renaGore ba tsebiše bana ba bona ka dilo tše,
6 E le gore bana bao ba sa tlago go belegwaBa kgone go di tseba,
Gomme le bona ba tle ba di anegele bana ba bona.
7 Ke moka bana bao ba tla ithekga ka Modimo.
Ba ka se lebale dilo tšeo Modimo a di dirilego,Eupša ba tla latela melao ya gagwe.
8 Ka gona ba ka se swane le borakgolokhukhu ba bona,Bao ba bego ba na le dihlogo tše thata e bile ba sa kwe Modimo,Moloko woo o bego o sa tsebe gore o nyaka eng,*Le woo o bego o sa botegele Modimo.
9 Le ge Baefuraime ba be ba swere bora,Ba ile ba tšhaba letšatšing la ntwa.
10 Ga se ba boloka kgwerano ya Modimo,E bile ba ganne go kwa molao wa gagwe.
11 Le gona ba ile ba lebala le dilo tšeo a di dirilegoE lego mehlolo yeo a ilego a ba bontšha yona.
12 O dirile mehlolo pele ga borakgolokhukhu ba bonaNageng ya Egepeta, tikologong ya Tsoane.
13 O arogantše lewatle gore ba kgone go feta ka gare ga lona,Gomme a dira gore meetse a eme go swana le letamo.
14 Mosegare o be a ba hlahla ka leruGomme bošego ka moka a ba hlahla ka seetša sa mollo.
15 A pharola maswika lešokeng,A ba dumelela gore ba nwe meetse gomme ba kgolwe. Meetse ao e be e le a mantšhi tše e kego ke meetse a ka lewatleng.
16 A dira gore leswika le tšwe meetse a mantšhi,Gomme a dira gore a elele bjalo ka dinoka.
17 Eupša ba tšwela pele ba dira sebeKa go hlanogela yo Godimodimo leganateng.
18 Ba leka Modimo ka boomoKa go gapeletša gore a ba fe dijo tšeo ba bego ba di nyaka.
19 Ka gona ba bolela Modimo gampe,Ba re: “Na Modimo a ka kgona go re fa dijo lešokeng?”
20 O ile a itia leswikaGomme meetse a mantšhi a tšwa a ba a elela.
Eupša ba sa botšiša gore:“Na a ka kgona go re nea le dijo,
Goba na a ka kgona go fa batho ba gagwe nama?”
21 Ge Jehofa a ba kwa, o ile a galefa,A hlasela ditlogolo tša Jakobo ka mollo,Gomme a galefela batho ba Isiraele
22 Ka gobane ga se ba dumela go yena.Ga se ba ka ba tshepa gore a ka kgona go ba phološa.
23 Ka gona a laela maru a godimo,Gomme a bula mejako ya legodimo.
24 A ba tšhollela manna gore ba je,A ba fa dijo tšeo di tšwago legodimong.
25 Batho ba ja dijo tša barongwa.*A ba fa dijo tša go ba khoriša.
26 A tsoša phefo ya bohlabela kua magodimongGomme ka matla a gagwe a dira gore go foke phefo ya borwa.
27 A ba nešetša nama ya ba e ntšhi bjalo ka lerole,A ba fa dinonyana tše dintšhi bjalo ka santa ya lewatleng.
28 A dira gore di wele kampeng ya bona,Le go dikologa ditente tša bona.*
29 Ba ja gomme ba khora go feta tekanyo,A ba fa tšeo ba bego ba di duma.
30 Eupša ge ba sa dutše ba nyaka dijo tše dingwe,Mola ba sa na le dijo tše dingwe ka ganong,
31 Modimo a ba galefela.
A bolaya banna ba bona ba dinatla,A bolaya le masogana a Isiraele.
32 Lega go le bjalo, ba ile ba dira dibe le go fetaGomme ba se dumele le ge ba bone mediro ya gagwe e makatšago.
33 A dira gore matšatši a bona a bophelo a fele bjalo ka ge eka ke mohemo feela,A ba tlišetša masetlapelo ba sa letela gomme ba hwa.
34 Nako le nako ge a be a bolaya ba bangwe ba bona, ba be ba mo kgopela gore a ba thuše.Ba be ba boela go Modimo.
35 Ba gopola gore Modimo e be e le Leswika la bona,Le gore Modimo yo Godimodimo e be e le Morekolodi* wa bona.
36 Eupša ba ile ba leka go mo fora ka mantšu a bona,Gomme ba mmotša maaka ka maleme a bona.
37 Ba be ba sa mmotegele ka dipelo tša bona ka moka.Le gona ga se ba botegela kgwerano yeo ba bego ba e dirile le yena.
38 Eupša o ile a ba gaugela,O be a ba lebalela diphošo tša bona gomme a sa ba otle gabohloko.
Go e na le gore a ba galefele kudu,Gantšhi o be a thibela bogale bja gagwe.
39 Ka gobane o be a gopola gore e be e no ba batho,Bao ba swanago le moya wo o fokago gomme wa se hlwe o boa.
40 Ba mo hlanogetše gantšhi kua lešokeng,Gomme ba mo kweša bohloko kua leganateng!
41 Ba be ba leka Modimo gantšhi,Gomme ba kweša Mokgethwa wa Isiraele bohloko.
42 Ga se ba gopola matla a gagwe,Ba ile ba lebala letšatši leo a ba phološitšego go manaba a bona,
43 Ba lebala mehlolo yeo a e dirilego kua EgepetaLe yeo a e dirilego tikologong ya Tsoane,
44 Le kamoo a ilego a fetoša meetse a dinokana tšeo di tšwago Nile gore e be madi,E le gore ba se ke ba kgona go a nwa.
45 A ba romela metšhitšhi ya mohuta o itšego wa dintšhi tša go loma gore di ba lome,Le digwagwa gore di senye naga.
46 A dumelela ditšie tše dikgolo gore di je dibjalo tša bona,Gomme tšeo ba di šometšego ka thata tša jewa ke ditšie tše dingwe.
47 A senya meterebe ya bonaLe mego* ya bona ka sefako.
48 A bolaya diphoofolo tša bona tša go rwala merwalo ka sefako,A ba a bolaya le diruiwa tša bona ka magadima.*
49 A ba galefela kudu,A ba a ba dira gore ba tlalelwe,A romela le barongwa ba bantšhi gore ba ba tlišetše masetlapelo.
50 A ntšha bogale bja gagwe ka moka.
A ba otla gomme a ba bolaya,A ba tlogela ba hlaselwa ke leuba la bolwetši go fihlela le ba bolaya.
51 Mafelelong a bolaya maitšibulo ka moka a Egepeta,E lego bana ba mathomo bao ba belegetšwego ditenteng tša Hama.
52 Ka morago ga moo, a ntšha batho ba gagwe Egepeta,Gomme a ba diša go swana le dinku lešokeng.
53 A ba hlahla gomme a dira gore ba dule ba šireletšegileE bile ba sa tšhabe selo.Lewatle le meditše manaba a bona.
54 A ba tliša nageng ya gagwe e kgethwa,E lego tikologo ya dithabeng yeo a e fentšego ka matla a gagwe.
55 A raka ditšhaba pele ga bona,A ba fa naga ya bohwa bja bona yeo a e metilego ka thapo,Gomme a nea meloko ya Isiraele magae.
56 Eupša batho ba meloko yeo ba tšwela pele ba leka Modimo yo Godimodimo le go se mo kwe.Ga se ba latela melao ya gagwe.
57 Le gona, go swana le borakgolokhukhu ba bona, le bona ba ile ba hlanoga gomme ba dira tša boradia.
Ba be ba sa tshepege go no swana le bora bjo bo senyegilego.
58 Ba ile ba dulela go mo kgopiša ka go rapela medimo ya bona ya maaka mafelong a phagamego,Ba mo galefiša ka go dira diswantšho tšeo di betlilwego.
59 Modimo o ile a bona seo ba se dirago gomme a ba galefela,Ke moka a lahlela Isiraele sa ruri.
60 Mafelelong a tlogela taberenakele ya Shilo,E lego tente yeo a bego a dula go yona gare ga batho.
61 A dumelela Areka gore e tšewe ke manaba a gagweA a dumelela gore a tšee leswao la matla a gagwe le bogolo bja gagwe.
62 A dumelela gore batho ba gagwe ba bolawe ka tšhoša,A ba a ba galefela kudu.
63 Masogana a gagwe a bolawa ka mollo,Gomme dikgarebe tša gagwe tša se opelelwe dikoša tša lenyalo.
64 Baperisita ba gagwe ba ile ba bolawa ka tšhoša,Gomme basadi ba bona ba se ba llele.
65 Ke moka, Jehofa a tsoga bjalo ka ge eka o be a robetšeGo swana le monna yo matla yo a tsogago ka morago ga ge a nwele beine e ntšhi.
66 A bolaya manaba a gagwe ao a bego a re a a mo tšhabela.A dira gore a hlabje ke dihlong go ya go ile.
67 A gana tente ya Josefa,Gomme a se kgethe moloko wa Efuraime.
68 Eupša a kgetha moloko wa Juda,E lego Thaba ya Tsione yeo a e ratago.
69 A aga sekgethwa sa gagwe seo se tiilego go swana le magodimo,Go swana le lefase leo a dirilego gore le be gona go ya go ile.
70 A kgetha Dafida mohlanka wa gagweGomme a mo ntšha mašakeng a dinku.
71 A mo tšea e le modiši wa dinku tšeo di nago le dikwana,A mo dira gore e be modiši wa JakoboLe modiši wa Isiraele, e lego batho ba gagwe.
72 A ba diša ka pelo ya gagwe ka moka le ka go tshepega.Le gona ka ge a be a na le bokgoni o ile a ba eta pele.
Mengwalo ya tlase
^ Bona Tlhaloso ya Mantšu.
^ Phetolelo ya lentšu ka lentšu e re, “Moloko wo o sa kago wa lokiša pelo ya wona.”
^ Phetolelo ya lentšu ka lentšu e re, “ba matla.”
^ Phetolelo ya lentšu ka lentšu e re, “A dira gore di wele kampeng ya gagwe le go dikologa ditenteng tša gagwe.” Go ka ba go bolelwa ka Modimo goba Isiraele.
^ Goba, “Molefeletši.”
^ Goba, “mesikamore.”
^ Goba mohlomongwe, “ka letadi.”
