Psalme 81:1-16
Ditaelo tšeo di yago go mohlahli: Diriša molodi wa Gitithe.* Koša ya Asafa.
81 Opelelang Modimo le thabile, yena matla a rena.
Goeletšang le thabile gomme le rete Modimo wa Jakobo.
2 Letšang mmino gomme le tšee moropa,Harepa yeo e letšago mmino o mobose le seletšo sa metato.
3 Letšang naka mathomong a kgwedi,Le nakong ya ge ngwedi o tletše, ge re keteka monyanya wa rena.
4 Gobane ke taelo yeo e yago go Isiraele,Ke molao wa Modimo wa Jakobo.
5 O o neile Josefa gore a o gopole,Ge Modimo a be a eya go lwa le naga ya Egepeta.
Ke ile ka kwa lentšu* leo ke sa le tsebego le re:
6 “Ke ile ka mo rola morwalo woo o bego o mo imela,Gomme ka dira gore a se sa imelwa ke morwalo wa gagwe.*
7 O mpiditše o le tlalelong gomme ka go phološa,Ka go araba ke le lerung le lekoto.
Ka go leka meetseng a Meriba. (Selah)
8 Lena batho ba ka, ntheetšeng gomme ke tla le lemoša.
Wena Isiraele, ge nkabe o be o ntheetša,
9 Go be go ka se be le modimo yo mongwe gare ga lena,Le gona le be le ka se khunamele modimo o šele.
10 Nna Jehofa, ke Modimo wa lena,Ke nna ke le ntšhitšego nageng ya Egepeta.
Ke tla le fa dijo go fihla le khora.
11 Eupša batho ba ka ga se ba nkwa,Isiraele ga se ya ikokobeletša nna.
12 Ka gona ke ile ka ba lesa ba thatafiša dipelo tša bona,Ba ile ba dira tšeo ba di ratago.
13 Ge nkabe batho ba ka ba be ba ntheetša,Ge nkabe Baisiraele ba be ba phela ka melao ya ka,
14 Ke be ke tla fenya manaba a bona kapelapela,Gomme ka otla bao ba lwago le bona.
15 Ge e le bao ba hloilego Jehofa, ba tla tla go yena ba thothomela e bile ba tšhogile,Gomme kotlo ya bona e tla ba ya sa ruri.
16 Eupša ke tla fepa batho ba ka ka korong e kaonekaone,*Gomme ka ba fa todi e ntšhi ya dinose yeo e tšwago leswikeng.”
Mengwalo ya tlase
^ Bona Tlhaloso ya Mantšu.
^ Goba, “leleme.”
^ Phetolelo ya lentšu ka lentšu e re, “seroto sa gagwe.”
^ Phetolelo ya lentšu ka lentšu e re, “e nonnego.”
