Psalme 9:1-20
Ditaelo tšeo di yago go mohlahli: Diriša molodi wa Muthe-labene.* Koša ya Dafida.
א [Aleph]
9 Wena Jehofa, ke tla go reta ka pelo ya ka ka moka.Ke tla bolela ka mediro ya gago ka moka e makatšago.
2 Ke tla thaba kudu ka baka la dilo tšeo o di dirilego,Ke tla go opelela ke reta leina la gago, wena yo Godimodimo.
ב [Beth]
3 Ge manaba a ka a boela morago,O tla dira gore a kgopše gomme a hwele pele ga gago.
4 Ka gobane o a nkemelela kgorong ya tsheko.O dula sedulong sa gago sa bogoši gomme wa ahlola ka toko.
ג [Gimel]
5 O kgalemetše ditšhaba gomme wa fediša ba babe.Wa dira gore ba se sa gopolwa le gatee.
6 O fedišeditše manaba sa ruri,Wa ba wa phušola le metse ya ona.Go ka se sa bolelwa ka ona le gatee.
ה [He]
7 Eupša Jehofa o dutše sedulong sa gagwe sa bogoši go ya go ile,O buša go ya go ile e bile o dula a ahlola ka toka.
8 O tla ahlola batho bao ba dulago lefaseng ka toka,O tlo ahlola ditšhaba ka toka.
ו [Waw]
9 Jehofa e tla ba lefelo leo batho ba tšhabelago go lona ge ba na le mathata,A ba lefelo leo batho ba tšhabelago go lona ge ba le tlalelong.
10 Bao ba tsebago leina la gago ba tla ithekga ka wena.Wena Jehofa o ka se tlogele bao ba go hlankelago.
ז [Zayin]
11 Opelelang Jehofa yo a dulago Tsione.Tsebišang batho mediro ya gagwe.
12 O tla gopola bahlanka ba gagwe gomme a lefetša madi a bona.A ka se lebale gore ba ile ba mo llela ba nyaka thušo.
ח [Heth]
13 Nkgaugele hle Jehofa, bona mohlako wo ke o tlišetšwago ke batho bao ba ntlhoilego,Wena yo a mphološago lehung,*
14 E le gore ke bolele ka ditiro tša gago tšeo di swanelwago ke go tumišwa dikeiting tša motse wa Tsione,*Le gore ke thabe ka gobane o mphološitše.
ט [Teth]
15 Ditšhaba di wetše ka moleteng wo di o epilego.Maoto a tšona a tantšwe ke nete ya go rea dihlapi yeo di e utilego.
16 Batho ba tseba Jehofa ka dikahlolo tšeo a di dirago.
Yo mobe o tantšwe ke mediro ya diatla tša gagwe.
Higayone.* (Selah)
י [Yod]
17 Batho ba babe ba tla ya Lebitleng,*Le ditšhaba ka moka tšeo di lebalago Modimo di tla ya gona.
18 Eupša a ka se lebale modiidi,Le gona kholofelo ya ba boleta e ka se be ya lefeela.
כ [Kaph]
19 Ema hle Jehofa! O se ke wa dumelela motho wa nama le madi a fenya.
Anke o ahlole ditšhaba o be o di otle.
20 Di dire gore di boife, hle Jehofa.Dira gore ditšhaba di tsebe gore e no ba feela batho ba nama le madi. (Selah)
Mengwalo ya tlase
^ Bona Tlhaloso ya Mantšu.
^ Phetolelo ya lentšu ka lentšu e re, “dikeiting tša lehu.”
^ Phetolelo ya lentšu ka lentšu e re, “morwedi wa Tsione.”
^ Bona Tlhaloso ya Mantšu.
^ Bona Tlhaloso ya Mantšu.
