Doiteronomio 11:1-32
11 “O rate Jehofa Modimo wa gago, gomme ka mehla o phethe boikarabelo bja gago bja gore o kwe melao ya gagwe le ditaelo tša gagwe.
2 Le tseba gabotse gore lehono ke bolela le lena, e sego bana ba lena bao ba sa tsebego goba ba sego ba bona dikotlo tša Jehofa Modimo wa lena, bogolo bja gagwe le matla a gagwe a magolo.
3 Ga se ba ka ba bona mehlolo le dilo tšeo Modimo a di dirilego Farao kgoši ya Egepeta le naga ya gagwe ka moka.
4 Goba seo a se dirilego mašole a Baegepeta, dipere tša Farao le dikariki tša ntwa tšeo di ilego tša nwelela ka meetseng a Lewatle le Lehwibidu ge ba be ba le rakediša, gomme Jehofa a ba fediša gatee ya ba moka.
5 Ga se ba ka ba bona seo Modimo a le diretšego sona kua lešokeng, go ba go fihlela le fihla lefelong le.
6 Goba seo a se dirilego Dathane le Abirama barwa ba Eliaba morwa wa Rubeni, ge lefase le be le bulega gomme le ba metša pele ga Baisiraele ka moka. Ge le be le metša bona, malapa a bona, ditente tša bona, gotee le diphoofolo ka moka le batho ka moka bao ba bego ba ba latela.
7 Ke lena le bonego dilo ka moka tše dikgolo tšeo Jehofa a di dirilego.
8 “Le latele ditaelo ka moka tšeo ke le neago tšona lehono, e le gore le be le matla gomme le tshelele nageng yeo le tlago go e tšea gore e be ya lena,
9 le gore le phele nako e telele nageng yeo Jehofa a enetšego borakgolokhukhu ba lena gore o tla ba nea yona le bana ba bona, e lego naga yeo e elago maswi le todi ya dinose.
10 “Naga yeo le yago go e tšea gore e be ya lena ga e swane le naga ya Egepeta yeo le tšwilego go yona, moo le bego le bjala dipeu tša lena gomme le šoma ka thata gore le nošetše mašemo a lena, go swana le ge le be le nošetša dirapa tša lena tša merogo.
11 Eupša naga yeo le tlago go tshelela go yona gore le e tšee e be ya lena, ke naga ya dithaba le meedi. E nošetšwa gabotse ke pula ya magodimong.
12 Ke naga yeo Jehofa Modimo wa lena a e hlokometšego. Jehofa Modimo wa lena o dula a e lebeletše, go tloga ge ngwaga o thoma go fihla ge o fela.
13 “Ge e ba le ka kwa ditaelo tša ka tšeo ke le laelago tšona lehono, gomme la rata Jehofa Modimo wa lena ka dipelo tša lena ka moka la ba la mo hlankela ka dipelo tša lena ka moka le ka moya wa lena ka moka,
14 gona ke tla dira le gore nageng ya lena go ne pula ka nako ya gona, e lego pula ya lehlabula le ya selemo. E bile le tla kgoboketša mabele a lena, beine ya lena e mpsha le makhura a lena.
15 Le gona, ke tla dira gore nageng ya lena go mele bjang gore diruiwa tša lena di fule, gomme lena le tla ja la ba la khora.
16 Le itlhokomeleng gore le se ke la goketšega gomme la aroga la rapela medimo e mengwe le go e khunamela.
17 Go sego bjalo, Jehofa o tla le galefela gomme a tswalela magodimo gore pula e se ke ya na, gomme naga e ka se tšweletše selo. Ke moka lena le tla hwa kapela nageng e botse yeo Jehofa a le neago yona.
18 “Le nweletše mantšu a a ka ka dipelong tša lena le menaganong ya lena, le a tlemelele diatleng tša lena e le gore le a gopole, e bile a be bjalo ka seka* mo diphatleng tša lena.
19 Le a rute bana ba lena, le bolele ka ona ge le dutše ka dintlong tša lena, ge le sepela tseleng, ge le robala le ge le tsoga.
20 Le a ngwale diforeimeng tša mejako ya dintlo tša lena le dikeiting tša lena,
21 e le gore lena le bana ba lena le tle le phele nako e telele nageng yeo Jehofa a enetšego borakgolokhukhu ba lena gore o tla ba fa yona, ge feela magodimo a sa dutše a le ka godimo ga lefase.
22 “Ge e ba le ka kwa ditaelo tša ka tšeo ke le neago tšona gomme la di latela, la rata Jehofa Modimo wa lena, la sepela ditseleng tša gagwe ka moka le go mmotegela,
23 gona Jehofa o tla raka ditšhaba tše ka moka tša nageng yeo le yago go yona, gomme le tla fenya ditšhaba tše, tšeo di le fetago ka bogolo le tšeo di nago le batho ba bantšhi go le feta.
24 Lefelo le lengwe le le lengwe leo le yago go lona e tla ba la lena. Mollwane wa lena o tla tloga lešokeng wa fihla Libanoni, gomme wa tloga ka noka ya Eforate, wa fihla lewatleng la ka bodikela.
25 Ga go na motho yo a tlago go le thibela. Jehofa Modimo wa lena o tla dira gore le tšhoše batho ka moka ba nageng yeo le yago go yona e bile ba le boife, feela bjalo ka ge a le tshepišitše.
26 “Bonang, lehono kgethang go šegofatšwa goba go welwa ke madimabe.
27 Le tla šegofatšwa ge e ba le ekwa ditaelo tša Jehofa Modimo wa lena tšeo ke le neago tšona lehono.
28 Le gona le tla welwa ke madimabe ge e ba le sa kwe ditaelo tša Jehofa Modimo wa lena gomme le aroga tseleng yeo ke le laelago gore le sepele go yona lehono, ke moka la latela medimo e mengwe yeo le sa e tsebego.
29 “Ge Jehofa Modimo wa lena a dira gore le fihle nageng yeo le yago go e tšea gore e be ya lena, le šegofatše batho Thabeng ya Geritsima, gomme le rogake batho Thabeng ya Ebala.
30 Na kgane dithaba tšeo ga di kgauswi le Noka ya Jorodane ka thoko ya bodikela, nageng ya Bakanana bao ba dulago Araba, go lebana le Giligala kgauswi le mehlare e megolo ya More?
31 Bjale le tshela Noka ya Jorodane gore le yo tšea naga yeo Jehofa Modimo wa lena a le neago yona gore e be ya lena. Ge le šetše le e tšere gore e be ya lena gomme le dula go yona,
32 le netefatše gore le latela melao le ditaelo ka moka tšeo ke le neago tšona lehono.
Mengwalo ya tlase
^ Goba “lepanta la hlogong.”
