Doiteronomio 3:1-29
3 “Ke moka ra goma ra sepela ka tsela yeo e yago Bashani, gomme Ogo kgoši ya Bashani a tšwa a na le mašole a gagwe ka moka gore a yo lwa le rena kua Edirei.
2 Ka gona Jehofa a re go nna: ‘O se ke wa mmoifa ka gobane ke tla dira gore o fenye yena, mašole a gagwe ka moka le naga ya gagwe, gomme o mo dire tšeo o di dirilego Sihoni kgoši ya Baamore, yoo a bego a dula Heshibone.’
3 Ka gona Jehofa Modimo wa rena a dira gore re fenye Kgoši Ogo wa Bashani le mašole a gagwe ka moka, ra ba bolaya go fihlela go se na motho yo a phologilego.
4 Ke moka re ile ra tšea metse ya gagwe ka moka. Go be go se na motse le o tee wo re bego re se ra ba tšeela wona. Re ile ra tšea metse e 60 tikologong ka moka ya Arigobo, e lego mmušo wa Ogo kua Bashani.
5 Metse ye ka moka e be e ageleditšwe ka maboto a matelele, e na le dikeiti le dikota. Le gona re ile ra tšea le metsana e mentšhi,
6 eupša re ile ra e fediša ka moka go swana le kamoo re ilego ra fediša motse o mongwe le o mongwe wa Kgoši Sihoni wa Heshibone, le gona re ile ra fediša banna, basadi le bana.
7 Re ile ra ba ra tšea le diruiwa ka moka le dilo tša metseng yeo.
8 “Ka nako yeo re ile ra tšea naga ya dikgoši tše pedi tša Baamore tšeo di bego di dula tikologong ya Noka ya Jorodane, go tloga ka Moedi wa Arinoni go fihla ka Thaba ya Heremone.
9 (Basidone ba be ba bitša Thaba ya Heremone ba re ke Sirione gomme Baamore ba e bitša Senire.)
10 Ra tšea metse ka moka yeo e lego tikologong ya Gileada ka moka gotee le Bashani ka moka go fihla Salika le Edirei, e lego metse ya Kgoši Ogo wa Bashani.
11 Ka gobane Kgoši Ogo wa Bashani e be e le yena wa mafelelo yo a šetšego go Barefai. Setopo sa gagwe se be se beilwe go selo* seo se bego se dirilwe ka tšhipi, gomme selo seo se sa le kua Raba ya Baamoni. Botelele bja selo seo e be e le dimithara tše e ka bago tše nne, gomme bophara bja sona e le dimithara tše e ka bago tše pedi go ya ka tsela e tlwaelegilego ya go meta.
12 Ka nako yeo re ile ra tšea naga ye ya ba ya rena, e lego naga yeo e tlogago ka Aroere yeo e lego kgauswi le Moedi wa Arinoni e bile e akaretšago seripa sa tikologo ya dithaba ya Gileada. Metse ya yona ke ile ka e nea Barubeni le Bagada.
13 Ke moka ke ile ka nea seripa sa moloko wa Manase karolo e šetšego ya Gileada le ya Bashani ka moka ya mmušo wa Ogo. Tikologo ka moka ya Arigobo e lego Bashani, e be e tsebja e le naga ya Barefai.
14 “Jairi morwa wa Manase o ile a tšea tikologo ka moka ya Arigobo go fihla ka mollwane wa Bageshuri le Bamaakati, ke moka a reela metsana yeo ya Bashani ka leina la gagwe a re ke Hafothe-jairi, gomme e sa bitšwa bjalo go fihlela le lehono.
15 Ke moka naga ya Gileada ke e neile Makiri.
16 Barubeni le Bagada ke ba neile go tloga ka naga ya Gileada go fihla ka moedi wa Arinoni, gomme mo bogareng bja moedi e le mollwane, le go fihla ka Jaboko, e lego moedi wo e lego mollwane wa Baamoni.
17 Ke ile ka ba nea le Araba le tikologo ya Noka ya Jorodane le mollwane wa gona, go tloga Khinerethe go fihla lewatleng leo le lego Araba, e lego Lewatle la Letswai, moo go thomago mafelo a theogelago a Pisiga ka thoko ya bohlabela.
18 “Ke moka ke ile ka le laela ka re: ‘Jehofa Modimo wa lena o le neile naga ye gore le e tšee e be ya lena. Mašole a lena ka moka a tla tšea dibetša gomme a tshela pele ga banababo lena, e lego Baisiraele.
19 Metseng yeo ke le neilego yona go tla dula feela basadi ba lena, bana ba lena le diruiwa tša lena (ka gobane ke tseba gabotse gore le na le diruiwa tše ntšhi kudu).
20 Ba tla dula moo go fihlela Jehofa a khutšiša banababo lena go swana le ge a le khutšišitše, le go fihlela ba dutše nageng yeo Jehofa Modimo wa lena a tlago go ba nea yona ka mošola wa Noka ya Jorodane. Ka morago ga moo le tla boa, gomme yo mongwe le yo mongwe a boela nageng yeo ke le neilego yona.’
21 “Ka nako yeo ke ile ka laela Joshua ka re: ‘Wena o bone ka mahlo a gago dilo tšeo Jehofa Modimo wa rena a di dirilego dikgoši tše tše pedi. Jehofa o tla dira se se swanago go mebušo ka moka yeo le tlago go lwa le yona.
22 Le se ke la boifa mebušo yeo ka gobane Jehofa Modimo wa lena ke yena a le lwelago.’
23 “Ka nako yeo ka kgopela Jehofa ka re:
24 ‘Wena Mmuši Morena Jehofa, o šetše o thomile go bontšha nna mohlanka wa gago bogolo bja gago le matla a gago, ka gobane ga go na modimo le ge e le ofe magodimong goba lefaseng yo a dirago dilo tše matla tše di swanago le tšeo o di dirago.
25 Ke kgopela o ntumelele ke fete ke yo bona naga e botse yeo e lego ka mošola wa Noka ya Jorodane, e lego tikologo ya dithaba tše dibotse tša Libanoni.’
26 Eupša Jehofa o be a sa nkgalefetše ka baka la lena gomme o ile a se ntheetše. Go e na le moo, Jehofa o ile a re go nna: ‘Go lekane ka wena! O se ke wa hlwa o bolela le nna gape ka taba ye.
27 Namela o ye ntlheng ya thaba ya Pisiga gomme o lebelele ka bodikela, ka leboa, ka borwa le ka bohlabela, o bone naga ye ka mahlo a gago ka gobane o ka se tshele Noka ye ya Jorodane.
28 Kgetha Joshua gomme o mo kgothatše o be o mo matlafatše, ka gobane ke yena a tlago go eta setšhaba se pele gore se tshelele ka mošola, le gona ke yena a tlago go dira gore se tšee naga yeo o tlago go e bona.’
29 Dilo tše ka moka di diragetše ge re be re sa dula moeding wo o lego ka pele ga Bethe-peoro.
Mengwalo ya tlase
^ Selo se e ka ba e le lepokisi goba leako la go rwala mohu.
