Ekisodo 22:1-31
22 “Ge motho a ka utswa poo goba nku gomme a e hlaba goba a e rekiša, a patele mong wa poo yeo ka dipoo tše hlano, gomme ge e ba a utswitše nku a mo patele ka dinku tše nne.
2 (“Ge e ba lehodu le ka hwetšwa le thuba gomme la bethwa la hwa, motho yo a le bolailego a ka se be le molato wa madi.
3 Eupša ge e ba le ka tla letšatši le šetše le hlabile, gona motho yo a ka le bolayago o tla ba le molato wa madi.)
“Lehodu leo le swanetše go patela. Ge e ba le se na selo, gona le rekišwe gore le patelele dilo tšeo le di utswitšego.
4 Ge e ba le ka hwetšwa le sa swere dilo tšeo le di utswitšego, e ka ba e le poo, tonki goba nku, gona le patele motho yo le mo utsweditšego ka diphoofolo tše pedi.
5 “Ge e ba motho a ka fudiša diphoofolo tša gagwe tšhemong goba serapeng sa diterebe gomme a tlogela tonki ya gagwe e fula ka tšhemong ya motho yo mongwe, gona a patele motho yoo ka dilo tše dibotsebotse tšeo a di bjetšego tšhemong ya gagwe goba tše dibotsebotse tšeo di tšwago serapeng sa gagwe sa diterebe.
6 “Ge e ba motho a ka fiša hlaga, mollo woo wa swara mohlare wa meetlwa wa keka gomme wa fiša dingata tša mabele goba mabele ao a sa hlwago a bunwa goba tšhemo ka moka, gona motho yo a thomilego mollo woo o swanetše go patedišwa seo a se fišitšego.
7 “Ge e ba motho a ka fa motho yo mongwe tšhelete goba dilo tše dingwe gore a mmeele tšona ka ntlong ya gagwe gomme tša utswiwa ka ntlong ya motho yoo, gona ge lehodu leo le ka hwetšwa le swanetše go patelela dilo tšeo gabedi.
8 Ge e ba lehodu leo le ka se hwetšwe, gona mong wa ntlo yeo o swanetše gore a tlišwe pele ga baahlodi e le gore Modimo a ba tsebiše ge e ba motho yoo e le yena a utswitšego dilo tšeo.
9 Ge e ba motho a ka latofatša motho yo mongwe ka gore o utswitše selo se itšego, e ka ba poo, tonki, nku, seaparo goba selo le ge e le sefe seo se timetšego, ba swanetše go tla pele ga baahlodi e le gore Modimo a ba tsebiše gore dilo tšeo ke tša mang. Motho yoo Modimo a tlago gore ke yena a nago le molato, o swanetše go patela mong wa dilo tšeo gabedi.
10 “Ge motho a ka fa motho yo mongwe tonki goba poo goba nku goba seruiwa le ge e le sefe gore a mo hlokomelele sona, gomme sa hwa goba sa golofala goba sa tšewa go se motho yo a bonago seo,
11 gona motho yo a bego a hlokometše diruiwa tšeo o swanetše go ena pele ga Jehofa gore ga se yena a tšerego diruiwa tša motho yoo, gomme mong wa diruiwa tšeo o swanetše go tshepa seo motho yo a se bolelago, ke moka motho yo a bego a di hlokometše a ka se patedišwe selo.
12 Eupša ge e ba seruiwa seo se ka utswiwa se sa hlokometšwe ke yena, gona o swanetše go patela mong wa seruiwa seo.
13 Ge e ba seruiwa se ka bolawa ke sebata, gona a tliše seruiwa seo e le bohlatse. Ga se a swanela go patelela selo seo se bolailwego ke sebata.
14 “Eupša ge motho le ge e le ofe a ka adima seruiwa go motho yo mongwe gomme seruiwa seo sa golofala goba sa hwa mong wa sona a se gona, gona motho yo a se adimilego o swanetše go patela.
15 Ge e ba mong wa sona a le gona, yo a se adimilego a se ke a patela. Ge e ba a se hirišitše, gona tšhelete yeo a e patetšego ge a be a se hiriša e be yona e patelelago seruiwa seo.
16 “Ge monna a ka goketša kgarebe yeo e sego ya tshepišwa go nyalwa gomme a robala le yona, o swanetše go ntšha magadi a e nyale e be mosadi wa gagwe.
17 Ge e ba tatago kgarebe yeo a tloga a gana go nea monna yoo kgarebe yeo, gona monna yoo o swanetše go patela tšhelete e lekanago magadi a go nyala kgarebe.
18 “O se ke wa tlogela moloi* a phela.
19 “Mang le mang yo a robalago le phoofolo a bolawe nyaa!
20 “Motho yo a direlago medimo le ge e le efe dihlabelo ka ntle le go di direla Jehofa a nnoši, a bolawe.
21 “O se ke wa hlakiša motho yo a tšwago nageng e nngwe goba wa mo gatelela, ka gobane le lena le be le dula nageng ya Egepeta yeo e sego ya gabo lena.
22 “Le se ke la hlakiša mohlologadi le ge e le ofe goba tšhiwana.
23 Ge e ba le ka ba hlakiša gomme ba llela go nna, ruri ke tla kwa sello sa bona.
24 Ke tla le galefela kudu, ka le bolaya ka tšhoša gomme basadi ba lena ya ba bahlologadi le bana ba lena ya ba ditšhiwana.
25 “Ge e ba o ka adima yo mongwe wa batho ba ka yo a diilago tšhelete, o se ke wa mo swara go swana le motho yo a adimišago tšhelete. O se ke wa mo patediša tswalo.
26 “Ge e ba o ka tšea seaparo sa motho yo mongwe e le gore o se sware go fihlela a go fa tšhelete yeo a go kolotago yona, gona o se bušetše go yena pele letšatši le sobela,
27 ka gobane seaparo seo ke sona feela se mo thušago gore a dule a ruthetše. Motho yoo o tla apara eng ge a eya go robala? E tla re ge a llela go nna, ke tla mo kwa ka gobane ke na le kwelobohloko.
28 “O se ke wa roga Modimo goba wa roga letona la batho ba geno.
29 “O se ke wa dikadika go ntirela dibego go tšwa go dilo tše dintšhi tšeo o di bunnego goba ka beine le makhura a mantšhi ao a tšwago digatelong tša gago. O nnee morwa wa gago wa mathomo.
30 Ge o tlo nnea leitšibulo la poo ya gago le la nku ya gago o swanetše go dira se: O le tlogele le dule le mmago lona ka matšatši a šupago. Ke moka ka letšatši la seswai o nnee lona.
31 “Le swanetše go ba ba bakgethwa go nna, e bile le se ke la ja nama ya selo le ge e le sefe seo se bolailwego ke phoofolo ya nageng. Le e lahleleng dimpša.
Mengwalo ya tlase
^ Lentšu la Seheberu leo le dirišitšwego mo le šupa go basadi bao ba bego ba loya.
