Ekisodo 5:1-23
5 Ka morago ga moo Moshe le Arone ba ya go Farao gomme ba bolela le yena ba re: “Jehofa Modimo wa Isiraele o re: ‘Tlogela batho ba ka gore ba yo ntirela monyanya kua lešokeng.’”
2 Eupša Farao a re: “Jehofa ke mang, moo nka kwago seo a se bolelago gomme ka tlogela Baisiraele ba sepela? Ga ke tsebe Jehofa yoo, le gona nka se tlogele Baisiraele ba sepela.”
3 Eupša bona ba re: “Modimo yo Baheberu ba mo hlankelago o boletše le rena. Hle re dumelele gore re sepele re tšee leeto la matšatši a mararo gomme re ye lešokeng re yo direla Jehofa Modimo wa rena dihlabelo. Go sego bjalo o tlo re bolaya ka bolwetši goba ka tšhoša.”
4 Kgoši ya Egepeta ya re go Moshe le Arone: “Ke ka baka la’ng le nyaka go tlogediša batho ba mešomo ya bona? Boelang mešomong ya lena e boima!”
5 Le gona Farao a re: “Bonang gore batho bao ba šomago mo nageng ke ba bantšhi bjang, eupša lena le nyaka go ba tlogediša mošomo wa bona.”
6 Letšatšing lona leo, Farao a laela balaodi ba mošomo wa gagwe le batho bao ba hlokomelago Baisiraele ge ba šoma, a re:
7 “Le se sa fa batho ba mahlaka a gore ba dire ditena.* Bona a ba ye go yo itopela mahlaka.
8 Eupša palo ya ditena tšeo di nyakegago le e tlogele e le bjalo. Le se ke la e fokotša ka gobane batho ba ba a tšwafa. Ke ka baka leo ba nago le matepe e bile ba rego: ‘Re nyaka go sepela, re nyaka go direla Modimo wa rena dihlabelo!’
9 Le se ke la ba khutšiša! Ba berekišeng ga boima gore ba tlogele go hlwa ba theetša maaka.”
10 Ka gona balaodi ba mošomo le batho bao ba bego ba hlokomela Baisiraele ge ba šoma, ba ile ba botša Baisiraele gore: “Farao o re: ‘Le ka se sa fiwa mahlaka.
11 Sepelang le yo inyakela mahlaka mo le ka a hwetšago gona, eupša le tsebe gore mošomo wa lena o ka se fokotšwe le ganyenyane.’”
12 Ke moka batho ba gašana le naga ka moka ya Egepeta ba yo topa dingatana tša mahlaka.
13 Balaodi ba mošomo ba dulela go ba botša gore: “Ka moka ga lena le swanetše go fetša mešomo ya lena letšatši le letšatši go swana le ge le be le fiwa mahlaka.”
14 Balaodi ba mošomo ba Farao ba ile ba thoma go itia Baisiraele bao ba bego ba ba kgethile gore ba hlokomele Baisiraele ba bangwe ge ba šoma. Balaodi bao ba ile ba ba botšiša gore: “Ke ka baka la’ng maabane le lehono, le se la fetša go dira ditena tšeo le bego le swanetše go di dira ka letšatši?”
15 Ka gona Baisiraele bao ba bego ba hlokomela Baisiraele ba bangwe ge ba šoma ba ya ba yo llela Farao ba re: “Go re’ng o swara rena bahlanka ba gago ka tsela ye?
16 Rena bahlanka ba gago ga ba re nee mahlaka eupša ba re botša gore: ‘Dirang ditena!’ E bile ba a re itia mola phošo e le ya batho ba gago.”
17 Eupša yena a re: “Le a tšwafa, le a tšwafa! Ke ka baka leo le rego: ‘Re nyaka go sepela, re nyaka go direla Jehofa dihlabelo.’
18 Bjale boelang mošomong! Le ge ba sa le nee mahlaka, le swanetše go no tšwela pele le dira palo yeo e nyakegago ya ditena.”
19 Baisiraele bao ba bego ba hlokomela Baisiraele ba bangwe ge ba šoma, ba bona gore ba be ba le bothateng bjo bogolo ge ba ekwa taelo ya gore: “Ga se la swanela go fokotša palo ya ditena tšeo motho a swanetšego go di dira ka letšatši.”
20 Ka morago ga moo ba kopana le Moshe le Arone, bao ba bego ba eme moo go tlo ba gahlanetša ge ba etšwa go Farao.
21 Ke moka ba re go bona: “Anke Jehofa a bone seo le re dirilego sona e bile a le ahlole, ka ge le dirile gore Farao le bahlanka ba gagwe ba re hloye e bile le mo file lebaka la gore a re bolaye.”
22 Ke moka Moshe a rapela Jehofa a re: “Jehofa, ke ka baka la’ng o dumelela batho ba gago gore ba tlaišege? Ke ka baka la’ng o romile nna?
23 Ga e sa le go tloga ke bolela le Farao ka leina la gago, o dirile batho ba gago dilo tše mpe le go feta gomme wena ga se wa ka wa ba phološa.”
Mengwalo ya tlase
^ Ditena tšeo go bolelwago ka tšona mo, di be di dirwa ka mahlaka le leraga goba letsopa.
